albert veliu

Babale-1280x700.jpg
Sej rie18:30 | 17/04/2019

Gjykata e Krimeve të Rënda pushoi hetimet për procedimin e regjistruar pa emër për trafik narkotikësh, pas publikimit te audio-përgjimit të “Babales”.

Gjykata e Krimeve të Rënda ka vendosur që të pushojë hetimet për dosjen e cila ishte e regjistruar pa emër, pas publikimit nga Partia Demokratike të audio-përgjimit të ashtuquajtur të “Babales”. Procedimi penal mbi te cilin nisen hetimet, ishte regjistruar për trafik të lëndëve narkotike.

Prokuroria e Krimeve të Rënda e përfaqësuar nga Përparim Kulluri e nisi hetimin për trafikim të lëndëve narkotike por pa i vendosur një emër konkret dosjes.

Pas disa muajsh hetime Krimet e Rënda e ndanë dosjen “Balale”në dy pjesë ku trafikimi i drogës do hetohej nga Krimet e Rënda dhe “kallëzimi i rrem” do hetohej nga Prokuroria e Tiranës. Më herët Prokurori Kulluri i kishte pezulluar hetimet dhe e kishte kthyer dosjen për rihetim në polici, por duke qenë se polica nuk mundi të siguronte asnjë të dhënë të re shtese për këtë procedim penal, prokurori kërkoi që të pushohen hetimet.

Nga ana tjetër Gjykata e Tiranës ka dërguar për gjykim për kallëzim të rreme 4 të pandehur , ish-deputeti i PD-së Ervin Salianji, gazetari Jetmir Olldashi, Albert Veliu i njohur ndryshe si “Dëshmitari X” dhe Fredi Alizotin,  person i cili dyshohet se ka imituar zërin e Agron Xhafajt në audio-përgjimin e publikuar nga Partia Demokratike./abcnews.al

albert-veliu.png
G. P.16:55 | 26/10/2018

Prokuroria për Krimet e Rënda shpalli moskompetencë për hetimin e çështjes “Babalja”. Dosja me katër persona të akuzuar për “kallëzim të rremë”, mes të cilëve edhe deputeti Ervin Salianji, i ka kaluar Prokurorisë së Tiranës.

Prokuroria për Krimet e Rënda ia ka kaluar Prokurorisë së Tiranës përgjegjësinë e hetimit të çështjes “Babalja”. Më shumë se gjashtë muaj nga nisja e procedimit penal pas publikimit të një audio-regjistrimi ku pretendohej se Albert Veliu, Babalja, fliste me vëllain e ministrit të Brendshëm për çështje droge, Krimet e Rënda shpallën moskompetencë. Shkak është bërë akuza e “kallëzimit të rremë” e ngritur ndaj katër personave për çështjen, vepër penale jashtë kompetencës së Krimeve të Rënda. Nga ana tjetër, kjo prokurori do të vazhdojë hetimin për “trafikun e narkotikëve” veprën penale për të cilën u regjistrua procedimi penal. Dosja “Babalja” u dërgua në Prokurorinë e Tiranës me katër persona nën hetim, deputetin Ervin Salianji, Albert Veliun, Fredi Alizotin dhe gazetarin Jetmir Olldashi.

Hetimi i çështjes “Babalja”, histori që trazoi jo pak skenën politike në vend, mori tjetër rrjedhë pasi Fredi Alizoi pranoi të kishte qenë aktruesi i zërit të Agron Xhafajt, vëllait të Fatmir Xhafajt, në audio-përgjimin e “Babales”. Por, pas arrestimit të tij në Tetor 2018 u publikua një video-përgjim ku pohonte se ishte shoqëruar për Prokurorinë për Krimet e Rënda nga kreu i Policisë së Shtetit. Për llogari të hetimit dhe dinamikave të papritura të tij, Prokuroria për Krimet e Rënda mori deklarimet e më shumë se 15 personave, mes të cilëve edhe deputetët Salianji e Taulant Balla, si dhe ish-kreut të Policisë Bashkike të Tiranës, Florenc Hoxha./abcnews.al

ALIZOTI-BALLAFAQIMI-1280x720.jpg
ent ela15:02 | 14/10/2018

Fredi Alizoti, i vetëdeklaruar si aktori i zërit të Agron Xhafajt në audio-përgjiminqë trazoi politikën shqiptare, është i gatshëm të përballet me “Babalen”. Avokati i Alizotit tha për “ABC News” se do të kërkojë në vijim këtë lloj veprimi hetimor.

Fredi Alizoti, i dyshuari si imituesi i zërit të vëllait të ministrit të brenshëm në audiopërgjimin  e “Babales”, është i gatshëm të përballet me Albert Veliun.

Pretendimi i 45 vjeçarit, që deklaroi para prokurorëve se iu premtuan 100 mijë euro për aktrimin e Agron Xhafajt, u konfirmua për “ABC News” nga avokati i tij, Ilir Dode.

I kontaktuar përmes telefonit, avokati Dode tha se ballafaqimi mes Alizotit dhe Veliut është një nga veprimet hetimore që do të kërkohet edhe prej tij në vijim.

“Klienti im është i gatshëm për një ballafaqim me Albert Veliun, pasi ka interes të dalë në dritë e gjithë e vërteta që pretendon. E vërteta që i mbrojturi prej meje ka pohuar edhe në deklarimet e tij para Prokurorëve për Krimet e Rënda. Në ditët në vijim, në funksion të një hetimit të plotë dhe të gjithanshëm, do të kërkojmë kryerjen e një ballafaqimi, por edhe të disa veprimeve të tjera hetimore”.

Por ky veprim duket në kufijtë e të pamundurës derisa Albert Veliu të jetë në duart e autoriteteve shqiptare. Aktualisht “Babalja” ndodhet në Kosovë në statusin e azilkërkuesit politik. Të enjten ai u arrestua nga Policia e Kosovës bazuar në një masë sigurie “arrest në burg” caktuar për të në mungesë nga Krimet e Rënda, por një ditë më vonë Gjykata Themelore e Prishtinës e liroi, duke refuzuar kërkesën e prokurorisë për izolim në paraburgim. Në mungesë të një marrëveshjeje ekstradimi me Kosovën, sjellja e tij në Shqipëri pritet të bazohet në marrëveshjet përkatëse juridike ndërshtetërore për dorëzim në pikëkalimin kufitar.

Aktualisht për çështjen “Babalja” Prokuroria për Krimet e Rënda ka regjistruar si persona nën hetim Albert Veliun, Fredi Alizoti, gazetarin Jetimir Olldashi dhe deputetin Ervin Salianji. /abcnews.al

 

 

gjataa.png
G. P.14:29 | 09/10/2018

Gjykata për Krimet e Rënda la të pandryshuar masën e sigurisë “arrest në burg” për Fredi Alizotin, i akuzuar si aktori që luajti vëllain e ministrit të Brendshëm në audiopërgjimin e Babales. Në fuqi u la edhe masa “detyrim paraqitje” për gazetarin Jetmir Olldashi, që përmes avokatit, kundërshtoi akuzën e “kallëzimit të rremë”.

Ky është Fredi Alizoti, personi që sipas Prokurorisë për Krimet e Rënda ka aktruar zërin e vëllait të ministrit të Brendshëm, Fatmir Xhafaj, në audiopërgjimin e pretenduar mes tij dhe Albert Veliut, i njohur si “Babalja”. 45 vjeçari nga Fieri doli para Gjykatës për tu njohur me masën e sigurisë “arrest në burg” caktuar në mungesë ndaj tij. Në tavolinën e të akuzuarve ishte edhe i dyshuari tjetër nën hetim, gazetari Jetmir Olldashi, personi që pretendohet të jetë autori i investigimit kur është realizuar audio-përgjimi. Gjykata për Krimet e Rënda vendosi të mos ndryshojë masat e sigurisë duke lënë në “arrest në burg” Alizotin dhe në “detyrim për paraqitje” gazetarin Olldashi të akuzuar për “kallëzim të rremë”.

Të dyshuarit zgjodhën të mos japin shpjegime para gjykatës. Përmes avokatit të tij Ilir Dode, i dyshuari Alizoti, i cili ka pranuar të ketë bërë zërin e Gernon Xhafajt në audio-regjistrim, kërkoi një masë më të butë sigurie. Sipas avokatit Dodë, klienti i tij ka qenë bashkëpunues me prokurorinë dhe ka vërtetuar që nuk ka rrezik ikjeje. Avokatët e Olldashit kërkuan shfuqizim të masës “detyrim për paraqitje”. Sipas tyre, gazetari nuk ka konsumuar asnjë element të veprës penale dhe se prokuroria ka shkelje proceduriale Nga ana e tyre prokurorët thanë se gazetari nuk e ka regjistruar bisedën mes Xhafajt dhe Albert Veliut dhe se nuk e ka dorëzuar pajisjen me të cilën është kryer përgjimi. Pretendimet u kundërshtuan nga avokatët edhe pas përfundimit të seancës. 

“Nuk ka pasur asnjëherë njohje vizuale, kontakt telefonik në asnjë lloj rasti midis gazetarit Olldashi dhe personit nën hetim Fredi Alizoti.”

“Për mendimin tonë nuk ishte arresti me burg i justifikuar në kuptimin e parashikimit ligjor.”

Masat e sigurisë të lëna në fuqi nga gjykata u caktuan në mungesë nga Krimet e Rënda në 6 tetor 2018./abcnews.al

ervin-salianji-1280x729.png
G. P.19:23 | 06/10/2018

Disa orë pasi Gjykata për Krime të Rënda miratoi kërkesën “arrest me burg” për Albert Veliun ose i njohur ndryshe si “Babalja” ka reaguar edhe deputeti i Partisë Demokratike, Ervin Salianji.

Sipas Salianjit, Edi Rama vendosi që ditën e parë që audiopërgjimi ka qenë fals dhe në të njëjtën linjë ka qenë dhe vendimi i prokurorisë. Salianji gjatë deklaratës së tij tha se kryeministri arreston denoncuesit dhe jo kriminelët sa herë që kapet në krim.

“Që ditën e parë, Edi Rama foli për audio-përgjim të sajuar dhe prokuroria kështu vendosi. Që ditën e parë Edi Rama shpalli se në vend të Agron Xhafajt ishte një aktor dhe prokuroria kështu vendosi. Që ditën e parë, Edi Rama shpalli të pafajshëm Agron Xhafën nga akuza për trafik droge dhe prokuroria kështu vendosi. Është e vërtetuar se sa herë kapet në krim Edi Rama arreston denoncuesit dhe jo kriminelët, duke përdorur çdo shantazh në favor të skenarit të tij kriminal. Deklarimi i pafajshëm i vëllait të ministrit të Brendshëm ka qenë qëllimi kryesor i prokurorisë i paracaktuar që nga dita e publikimit të skandalit nga ana e PD-së. Me urdhër të Edi Ramës, hetimi u drejtua personalisht nga vetë Fatmir Xhafaj nën kontrollin e të cilit është si prokurorja e Përgjithshme ashtu dhe prokurorja e Krimeve të Rënda”, deklaroi Salianji.

Prokurorët e çështjes kërkuan arrestimin e Albert Veliut, të njohur si “Babalja” me akuzën e kallëzimit të rremë. Për të njëjtën akuzë u caktua arrest me burg edhe për kunatin e tij, Fredi Alizotin. Ndërsa për gazetarin Jetmir Olldashi, autori i investigimit gjatë të cilit u pretendua të jetë bërë audio-përgjimi, u vendos detyrim paraqitje.

Të premten Prokuroria për Krimet e Rënda mori në pyetje si person që ka dijeni për rrethanat e hetimit deputetin demokrat Ervin Salianji. Ai tha se kishte depozituar prova të reja dhe pretendoi se prokuroria po zvarrit hetimin e dosjes./abcnews.al

BABALE-1280x720.jpg
ent ela14:28 | 06/10/2018

Me kërkesë të Prokurorisë, Gjykata për Krimet e Rënda lëshoi një urdhër arresti për Albert Veliun, i njohur si “Babalja” dhe kunatin e tij, Fredi Alizoti. Ata dyshohet se kanë inskenuar audio-përgjimin e pretenduar mes Veliut dhe vëllait të ministrit të Brendshëm. Kërkesa për masë erdhi pasi akt-ekspertiza britanike konstatoi se audio-përgjimi ishte i montuar.

Prokuroria për Krimet e Rënda i dha një kthesë të papritur hetimit të çështjes “Babalja”, lidhur me audio-përgjimin e publikuar nga PD si denoncim për përfshirjen e vëllait të ministrit të brendshëm në trafikun e drogës.

Prokurorët e çështjes, Përparim Kulluri dhe Gentian Osmani kërkuan arrestimin e Albert Veliut, të njohur si “Babalja”, personit që pretendoi të ketë bërë bisedën në fjalë me Agron Xhafajn, për akuzën e “kallëzimit të rremë”, kërkesë që u miratua nga gjykata.

Sipas Prokurorisë për Krimet e Rënda, nga veprimet hetimore të kryera lidhur me audio-regjistrimin mes “Bashkëpunëtorit X” dhe Agron Xhafajt ekziston dyshimi se jemi para veprës “kallëzim i rremë”, në bashkëpunim, e kryer në formën e krijimit të provave të rreme me qëllim që të bëhet ndjekje penale.

Arrestimi i Babales u kërkua pak ditë pasi akt-ekspertiza teknike e kryer mbi audi-përgjimin në një laborator në Britaninë e Madhe mbërriti në duart e prokurorëve të Krimeve.

Sipas ekspertizës britanike, audio-përgjimi ishte i montuar dhe se në të nuk identifikohet zëri i Geron Xhafajt. Aktualisht Albert Veliu ndodhet në Kosovë, ku ka kërkuar azil politik.

Për akuzën e “kallëzimit të rremë” u caktua masa e sigurisë “arrest në burg” edhe për Fredi Alizotin, kunatin e Babales. Dyshohet se ai është personi tjetër që dëgjohet në audio-përgjim në rolin e Agron Xhafajt. Ndërsa për gazetarin Jetmir Olldashi, autori i investigimit gjatë të cilit u pretendua të jetë bërë audio-përgjimi u vendos detyrim paraqitje.

Të premten Prokuroria për Krimet e Rënda mori në pyetjes si person që ka dijeni për rrethanat e hetimit deputetin demokrat Ervin Salianji. Deputeti tha se kishte depozituar prova të reja dhe pretendoi se prokuroria po zvarrit hetimin e dosjes./abcnews.al

albert-Veliu-1.jpg
ent ela10:59 | 02/06/2018

Ministri i Brendshëm i Kosovës Bejtush Gashi i pyetur nga gazetarët në lidhje me ndalimin e  Albert Veliut  tha se po kryhen të gjitha procedurat ligjore pasi dëshmitari X ka kërkuar azil politik. Deklaratën Gashi e bëri gjatë një vizite në pikën kufitare të Morinës për masat e marra për sezonin turistik.

Bejtush Gashi Ministri i Brendshëm i Kosovës gjatë një vizitë në pikën kufitare të Morinës u pyet nga gazetarët për Albert Veliun i njohur ndryshe si Babalja ose Dëshmitari X. Ai tha se për Veliun e ndaluar në Kosovë po kryhen të gjitha procedurat sipas legjislacionit në fuqi dhe konventave ndërkombëtare.

“Po ndiqen të gjitha procedurat, kosova ëhstë e obliguatr të respektojë të drjetën ndërkombëtare të të drejtave të njeriut”

Gashi pranon se dëshmitari X ka kërkuar azil politik në Kosovë.

“Po ka kërkuar azil politik në Kosovë dhe është në procedurë të autoriteteve të rastit”

Mesohet se autoritetet kosovare kanë kërkuar informacion nga Shqipëria për Veliun.

Ministri Gashi i shoqëruar edhe nga ambasadori i Shqipërisë në Kosove Qemal Minxhozi inspekoi pikat kufitare të Morinës dhe Shishtavecit për bashkëpunimin e dy policive kufitare gjatë sezonit turistik.   /abcnews.al

INTERVIST-ERVIN-SALIANJI-1280x720.jpg
ent ela23:40 | 31/05/2018

Deputeti demokrat Ervin Salianji i ftuar në Mbrëmje në ABC News ka folur në lidhje me ndalimin e Albert Veliut në Kosovë. Ai mohoi faktin që Veliu të jetë arrestuar për ndalim të paligjshëm, por me kërkesë të palës shqiptare.

“E gjitha është bërë për të mbajtur nën kontroll se nëse nuk bashkëpunon me ne atëherë do t’i ndodhë ajo që do t’i ndodhë”- shprehet Salianji. /abcnews.al

albert-Veliu-1.jpg
G. P.15:27 | 31/05/2018

Autoritetet kosovare nuk kanë paraqitur ende asnjë kërkesë apo dokument për të vënë në dijeni homologët shqiptarë, mbi kërkesën e shtetasit Albert Veliu për të marrë azil në Kosovë. 51-vjeçari u ndalua disa ditë më parë bashkë me djalin e tij dhe kërkoi të mos të kthehet në Shqipëri pasi i rrezikohet jeta.

Autoritetet Shqiptare nuk kanë marrë asnjë kërkesë nga homologët e tyre në Kosovë për procedurat e azilit të kërkuara nga Albert Veliu, i njohur ndryshe si “Dëshmitari X” .

ABC News u interesua pranë Ministrisë së Brendshme, Prokurorisë së Përgjithshme dhe në Ministrinë e Drejtësisë, ku pohojnë se organet ligjzbatuese të Kosovës deri tani nuk kanë paraqitur asnjë kërkesë në vendin tonë Albert Veliun.

51-vjeçari u ndalua bashkë me të birin pak ditë më parë nga autoritetet policore në Kosovë, nën dyshimet se kishte hyrë ilegalisht në territorin e saj. Ministria e Brendshme e Kosovës konfirmon se, Veliu ka kërkuar azil me motivin se në Shqipëri i kërcënohet jeta.

Prokuroria e Krimeve të Rënda edhe më herët, ishte shprehur se ndaj Veliut nuk ka urdhër-ndalimi lidhur me procedimin penal të nisur nga organi i akuzës për veprën penale të “Trafikimit të narkotikëve”. Për  këtë çështje, Albert Veliu është pyetur në prokurori dhe më pas është lënë i lirë.

Për kërkesën për azil, të bërë nga shtetasi Albert Veliu, autoritetet e Kosovës kanë pohuar se do të konsultohen edhe me homologët e tyre shqiptarë. Veliu, një ish-i dënuar për trafik droge, pranoi publikisht se zëri në audiopërgjimin e bërë publik nga Partia Demokratike ishte i tij./abcnews.al

ARTAN-HOXHA-PER-BABALEN-1280x720.jpg
ent ela20:41 | 28/05/2018

Në studion e ABC News, gazetari Artan Hoxha ka deklaruar se bazuar në burimet e tij, Albert Veliu është arrestuar në Kosovë bashkë me djalin, për kalim të paligjshëm të kufirit. Gazetari tha se në sistemin TIMS, është regjistruar edhe largimi nga Shqipëria drejt Brukselit, i bashkëshortes së Veliut, me djalin tjetër, përmes doganës së Hanit të Hotit.

“Në mesnatën e  16 majit duke gdhirë 17 Maji ai ka tentuar të largohet nga Shqipëria, bashkë me të birin e vet dhe është kapur në një pikë karburanti në rrugën e Kombit në Milot-Kukës.  Po atë natë  bashkëshortja dhe djali i madh i Albert Veliut po udhëtonin në Mal të Zi dhe nga Podgorica kanë marrë një avion për në Bruksel.

Albert Veliu deri ditën e protestës ka qenë në Shqipëri. Nuk del i regjistruar, gjë që vërteton se ky e ka kaluar ilegalisht kufirin. Dikush ia ka çuar informacionin që ata ta mdalojnë këtë person”. /abcnews.al

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono