akuzat

george-soros-1280x720.jpg
nev ila22:28 | 08/07/2019

Fondacioni “Soros” i ka cilësuar si “të çuditshme” akuzat e presidentit Meta ndaj themeluesit Xhorxh Soros, se po organizonte një përplasje civile në Shqipëri. Në reagimin e tij, fondacioni ka deklaruar se misioni i tij është të ndihmojë në reformat në sektorë të ndryshëm, përfshirë atë në drejtësi.

Fondacioni “Shoqëria e Hapur”, i njohur ndryshe edhe si fondacioni “Soros” e ka cilësuar si të “çuditshme” deklaratën e presidentit të Shqipërisë Ilir Meta, që akuzonte themeluesin Xhorxh Soros për ndërhyrje në zhvillimet e brendshme të Shqipërisë e veçanërisht në reformën në drejtësi.

Në një reagim zëdhënësja e fondacionit, Laura Silber ka deklaruar se “Shoqëria e Hapur” është krenare për rolin që ka luajtur në mbështetje të sistemit gjyqësor në Shqipëri, që siç ka vënë në dukje ajo, është një kërkesë e domosdoshme për hapjen e negociatave me BE-në.

“Karakterizimi që presidenti Meta i ka bërë kësaj përpjekjeje kaq publike si një komplot, është i çuditshëm. Ne presim që të takohemi në të ardhmen e afërt me presidentin Meta, në bazë të ftesës që na ka dërguar”, ka thënë zëdhënësja Silber.

Fondacioni për një Shoqëri të Hapur është një rrjet ndërkombëtar organizatash jofitimprurëse, të pavarura, joqeveritare dhe jopolitike që mbështesin financiarisht grupe të shoqërisë civile në sektorë të drejtësisë, arsimit, shëndetit publik dhe shtypit të pavarur në mbarë botën. Në Shqipëri Fondacioni “Soros” e zhvillon aktivitetin e tij që prej vitit 1994.

Meta e akuzoi zotin Soros se qëndronte pas “një komploti të kurdisur prej kohësh për të ushqyer përplasjen civile më 30 qershor, si dhe për të ndikuar reformën në drejtësi”./abcnews.al

BISEDE-NE-STUDIO-ORA-18.mpg_snapshot_07.28-1280x720.jpg
ent ela18:43 | 02/07/2019

“Për mënyrën si është kompozuar KQZ  ka shumë mundësi që politika ta reflektojë antagonizmin e vet në të”. Është kjo përgjigjia që dha ish Kreu i KQZ-së Ilrijan Celibashi në studion e ABC News me gazetaren Bruna Çifligu, i pyetur për ndarjen e dukshme mes anëtareve dhe kryetarit Zguri në zgjedhjet e 30 qershorit.

I pyetur për besueshmërinë e KQZ si organ i vetëm, Celibashi tha se sa kohë që propozimet për anëtarët vijnë nga partitë politike është shumë e vështirë t’i qëndrosh presionit dhe tundimit kundrejt atij që të ka propozuar dhe kjo e bën të vështirë KQZ-në si institucion të pavarur.

“Për mënyrën si është kompozuar KQZ, pa vlerësuar individët veçmas,  duke qenë se propozimet vijnë nga partitë politike është e vështirë që sado vlerë profesionale dhe karakteriale të kesh t’i qëndrosh presioneve dhe tundimit kundrejt atij që të ka propozuar, shto këtu dhe presioni politik është patakt dhe kjo e bën të vështirë KQZ-në si institucion të pavarur. KQZ është përpjekur që të tregojë një lloj pavarësie”.

Duke krahasuar modelin e sotëm të kompozimit të institucionit të KQZ dhe atë të kohës kur ai ishte në krye të saj, Celibahsi thekson se në atë kohë formual e asaj kohe garantonte në letër pavarësi më të madhe sesa sot të këtij institucioni.

“Sa kohë vijnë nga zyrat e partive ky nuk është modeli më i mirëz dhe duhet konsideruar. Në kohën kur unë isha kryetar i KQZ ka qenë një formulë më e mirë dhe pse atëherë ka pasur kontestime. Formula atëherë garantone në letër një pavarësi më të madhe të KQZ. Presidenti emerontë dy kuvendi 2 dhe këto kandidatura kishin një proces vetingu. Në atë kohë synohej një zgjedhje më e mirë e anëtarëve. Ne vinim  nga trupa gjyqësore s’kishim angazhimm politik atëherë krijon një balancë institucioni”.

Për sa u takon gabimet me shifrat nga KQZ, Celibashi thekson se kjo është lehtësisht e verifikueshme  dhe sipas tij në këtë çështje KQZ nuk duhet të jetë e ndarë. në këndvështrimin e tij ky një lloj preteksi për të shtuar konfliktualitetin politik

“Gjithmonë ka vend për pasaktësira dhe vend për korrigjime. Mbetet për t’u verifikuar për shkak të gabimeve njerëzore. Do ishte mirë që KQZ në këtë çështje mos ishte e ndarë në këtë çështje, sepse shumë kollaj mund ta verifikojnë. Më duket një lloj preteksi për të shtuar konfliktualitetin politik. Vetë KQZ mund ta verifikojë shumë lehtë”.

Për situatën aktuale politike në vend Celibashi sugjeron se vetëm zhvillimi i një debati politik dhe më gjerë mund të sjellë zgjidhje.

“Ka vetëm një mënyrë për të dalë nga ky ngërç. Zhvillimi i një debati politik dhe më gjerë dhe me siguri do gjenden rrugët e zgjidhjes së situatës”. /abcnews.al

policia-e-shtetit.jpg
nev ila22:32 | 26/06/2019

Ish-deputeti i PD Xhemal Gjunkshi në një komunikatë për mediat nga selia blu deklaroi se drejtuesit e policisë  në Dibër po shpërndajnë pistoleta për militantët e Rilindjes, si dhe po kërcënohen me jetë qytetarët që të dalin dhe të votojnë në 30 qershor.

Gjunkshi tha se drejtuesit e policisë në Dibër iu bëjnë presion qytetarëve që të japin votat. Ai shtoi se ministri Lleshaj gënjeu publikisht kur tha se ka shkarkuar drejtuesit policorë në Dibër, pasi ata janë akoma duke punuar.

Për këtë deklaratë të Gjunkshit ditënn e sotme, ka reaguar Policia e shtetit e cila mohon akuzat dhe thotë se deklarata e Gjunkshit është një shpifje e ulët.

“Reagim i Policisë së Shtetit

Lidhur me deklarimin e sotëm publik të ish-deputetit të PD, Xhemal Gjunkshi, ku aludon se Policia e Dibrës ka shpërndarë armë në qytet, sqarojmë se:

Kjo deklaratë është krejtësisht një shpifje e ulët dhe plotësisht e fabrikuar.

Policia e Shtetit e hedh poshtë me përbuzje një deklarim të tillë, që në fakt të vetmin reagim që meriton është padia ndaj deklaruesit Gjunkshi në gjykatë.

Aty ai do të duhet që përpara ligjit të sqarojë motivet e kësaj insinuate të ulët.

Policia e Shtetit gjen rastin të garantojë qytetarët se është në krye të detyrës dhe e angazhuar për mbarëvajtjen e procesit zgjedhor dhe sigurinë e tyre në tërësi.

Për çdo informacion që disponon, çdokush mund të denoncojë në kushte anonimati në numrin unik 112 ose numrin falas të SHÇBA, 0800 90 90″./abcnews.al

Gazment-Bardhi-1-1280x853.jpeg
ent ela14:49 | 11/06/2019

Krijimi i Aleancës me Qytetarët për Mbrojtjen e Demokracisë dhe Rendit kushtetues do ti japë fund qeverisjes së kryeministrit Rama dhe do të jetë garanti i zgjedhjeve të lira e të ndershme. Kështu ka deklaruar nga selia e Partisë Demokratike sekretari i përgjithshëm Gazment Bardhi.

Deklarata e sekretarit të përgjithshëm të Partisë Demokratike, Gazment Bardhi:

Edi Rama është sot njeriu më i rrezikshëm për stabilitetin e vendit, për funksionimin e shtetit ligjor dhe sigurinë e qytetarëve.

 Ai po provon çdo ditë se për pushtetin e tij personal, të blerë në bashkëpunim me krimin e organizuar, është gati të sakrifikojë gjithçka, rendin kushtetues, demokracinë, paqen sociale.

 Kryeministri ilegjitim i bandës së Avdyljave ka përqendruar çdo pushtet në dorën e tij ose duke i asgjësuar institucionet, ose duke i marrë ato nën kontroll.

 Edi Rama ka asgjesuar Gjykatën Kushtetuese, ka asgjesuar Gjykatën e Lartë, ka asgjesuar Prokurorin e Përgjithshëm, ka marrë nën kontroll organet e reja të drejtësisë, përdor si instrumenta politikë kundër kundërshtarëve politikë Shërbimin Informativ të Shtetit dhe Policinë e Shtetit, përdor si kamikazë kundër zgjedhjeve të lira e të ndershme anëtarët e Komisionit Qendror të Zgjedhjeve.   

Përgjimet tronditëse, të publikuara pak ditë më parë nga gazeta gjermane BILD, provuan se Edi Rama  e mori dhe e mban pushtetin vetëm me ndihmën e krimit të organizuar dhe të bandave.  

 Përgjimet faktuan çdo denoncim të bërë nga Partia Demokratike këto 6 vjet se  për të ardhur në pushtet, Edi Rama bëri marrëveshje me krimin e organizuar dhe e shndërroi Shqipërinë në një narkoshtet në mes të Europës. Pakti i tij me krimin është arsyeja madhore që na ka mbyllur derën e Europës dhe po rrezikon rikthimin e vizave për shqiptarët.

Pakti i Edi Ramës me krimin është pakt për të vjedhur Shqipërinë. Bashkë me një grusht oligarkësh, ai e ka kthyer Shqipërinë në pronë private të tij, ku pasuritë dhe buxheti i Shtetit është në dorën e pak njerëzve që kanë lidhje të ngushta me Kryeministrin e dalë nga vota e blerë nëpërmjet avdyljave në të gjithë Shqipërinë. 

 Është pakti i Edi Ramës me krimin dhe një grusht oligarkësh, arsyeja kryesore që  ka rrënuar ekonominë, ka larguar investitorët e huaj dhe ka mbyllur me mijëra biznese të ndershme shqiptare, duke rritur papunësinë, duke penguar hapjen e vendeve të reja të punës, duke detyruar me qindra mijëra shqiptarë të largohen pa shpresë nga vendi i tyre.  

 Për shkak të paktit të Edi Ramës me krimin, Shqipëria ndodhet sot në një udhëkryq të rrezikshëm, në të cilin demokracia dhe e drejta themelore e qytetarëve për të zgjedhur të lirë qeverisjen që duan, është drejt asgjwsimit të plotë.

 Ne nuk do ta pranojmë kurrë që Edi Rama të destabilizojë Shqipërinë, të instalojë në vend një diktaturë të re të krimit dhe oligarkisë, dy instrumentat e tij kryesorë për t’u pasuruar në mënyrë të paligjshme dhe për të ruajtur më dhunë pushtetin e tij të kriminalizuar.

 Së bashku me elitën e shoqërisë, me qytetarët që duan ndryshimin e këtij sistemi të kalbur nga krimi dhe korrupsioni, së bashku me rininë që e do Shqipërinë si gjithë Europa, ne po krijojmë Aleancën e vlerave, Aleancën me Qytetarët për Mbrojtjen e Demokracisë dhe Rendit kushtetues.

 Së bashku me elitën e shoqërisë, me qytetarët që duan ndryshimin e këtij sistemi të kalbur nga krimi dhe korrupsioni, së bashku me rininë që e do Shqipërinë si gjithë Europa, ne do të mbrojmë parimet. /abcnews.al

neymar-1.jpg
nev ila22:45 | 07/06/2019

Futbollisti Brazilian Neymar ka dëshmuar në polici në lidhje me publikimin e disa imazheve të pautorizuara nga modelja Najila Trindade. Akuzat për përdhunim kanë ndikuar edhe tek kontratat sponsorizuese te futbollistit.

Momente delikate me stres dhe të vështira për brazilianin Neymar pas videove të fundit të bëra publike dhe që rëndojnë në reputacionin e tij, por edhe në përballjet me drejtësinë. Kështu, 27-vjeçarit iu desh të dëshmonte, për skandalin që ka shpërthyer së fundmi, teksa është akuzuar nga modelja Najila Trindade për përdhunim.

Futbollisti i PSG-së mësohet se ka lënë spitalin, pas dëmtimit në ndeshjen miqësore ndaj Katarit, teksa është nisur menjëherë drejt policisë, ku ka dëshmuar në lidhje me publikimin e disa imazheve të pautorizuar. Kjo gjë në Brazil konsiderohet një krim.

Neymar është marrë dy orë në pyetje, duke dëshmuar gjithçka. Sa i përket akuzave për përdhunim, kjo gjë mund t’i kushtojë shtrenjtë yllit brazilian, teksa mediat e huaja raportojnë se sponsorët që i garantojnë atij 40 milionë euro në vit kanë filluar të “firojnë”, duke projektuar edhe tërheqjen e publiciteteve, por edhe kontratave që kishin një pikë të lartë marketimi.

Një markë e njohur e kartës së krediti anuloi një fushatë reklamuese për shkak të këtij skandali, gjithashtu edhe kompania presigjioze “Nike” është i “shqetësuar” dhe do të ndjekë me kujdes këtë çështje, por nuk ka marrë asnjë vendim për momentin në lidhje me ecurinë e bashkëpunimit me Neymar, pavarësisht faktit se mes tij dhe kompanisë ka një kontratë bashkëpunimi që kërkon respektim nga palët./ABC News Albania 24/7

hashim-thaci.jpg
ent ela15:34 | 24/05/2019

Me anë të një postimi të gjatë në profilin e tij zyrtar në Facebook, presidenti i Kosovës Hashim Thaçi ka reaguar ndaj deklaratave të një dite më parë të ish-kryeministrit shqiptar Sali Berisha. Kreu i Shtetit të Kosovës, akuzoi sërish Berishën se i ka shërbyer Millosheviçit duke i shitur armë Serbisë.

Vijon përplasja në distancë mes ish-kryeministrit shqiptar Sali Berisha dhe presidentit të Kosovës Hashim Thaçi. Ky i fundit ka reaguar me një postim të gjatë në profilin e tij zyrtar në Facebook, ndaj deklaratave të bëra nga Berisha në emisionin “Opinion” të gazetarit Blendi Fevziu, mbrëmjen e së enjtes.

Berisha, foli për përplasjen me Thaçin, duke përsëritur qëndrimin e tij se e konsideron presidentin si një argat të Serbisë, si dhe ka treguar edhe arsyen e ndalimit të Thaçit nga autoritetet shqiptare.

Berisha tha se Thaçin e kishin ndaluar, për ta marrë në pyetje rreth vrasjes së gazetarit Ali Uka, pasi kishte fjetur në të njëjtën dhomë me Thaçin, e në të njëjtën dhomë ishte gjetur i vdekur.

Thaçi nga ana e tij në reagimin në Facebook përsëriti akuzat se Berisha i ka shërbyer Sllobodan Milloshevic, duke i shitur armë Serbisë, në kohën kur Kosova ishte në luftë.

Ndër të tjera ai thotë se ia ka pasur frikën gjithmonë një gjuhe të tillë, për të cilën thotë se tashmë është zhvendosur edhe në disa parti në Kosovë.

Thaçi shprehet se nuk ka asnjë kënaqësi të merret me një relike të shëmtuar – duke iu referuar Berishës – i vetëdijshëm se ky intrigant bën përpjekje dëshpëruese të ushqejë hijen e tij, duke hedhur baltë mbi çdo gjë që konsiderohet si vlerë e traditës dhe kulturës sonë kombëtare.

“Nuk kam asnjë dyshim se një ndër krimet më të mëdha në rrugëtimin e S.R.B, përveç përpjekjes për puç institucional, shkatërrimin e shtetit dhe demokracisë në Shqipëri, është edhe fakti se ai i shkatërroi edhe kodet e sjelljes dhe komunikimit të Odës Shqiptare.

Ai punoi tërë jetën duke përçarë kombin dhe vendin. Tiparet e malësorit i humbi duke i shërbyer bllokut në vitet e diktaturës”, vijon më tej reagimi i kreut të shtetit të Kosovës.

Duke iu referuar vetëm me iniciale, Thaçi shton se “S.R.B është ai që solli këtë fatkeqësi të madhe në sofrën tonë dhe infektoi shumë politikanë me fjalorin e tij vulgar, duke u bërë modeli më i keq.

E kam thënë dhe do ta them gjithnjë, se kam dhimbje kur e shoh si ka përfunduar në një gërmadhë morale dhe politike”, shkruan më tej ai.

“S.R.B sot nuk paraqet asgjë tjetër, vetëm një fosil.

“Dua ta kuptojnë të gjithë shqiptarët se unë kur flasë për S.R.B., nuk e bëj aspak për të pastruar ndonjë hesap personal. Këtë e bëjë vetëm si shërbim të interesit publik, që njerëzit të mos shurdhohen nga kambanat e këtij ndjellësi të fatkeqësive dhe që të gjithë së bashku të reflektojmë për këtë fatkeqësi kombëtare, që shfaqet në formën e shpifjeve, sharjeve dhe sulmeve të ulëta mes shqiptarëve”-përfundon Thaçi. /ABC News Albania 24/7

ASSANGE-PLANI-_ABC-M1-T1.mpg_snapshot_00.17-1280x712.jpg
ent ela12:43 | 24/05/2019

Themeluesi i Uikiliks Julian Asanzh do të përballet me 17 akuza të reja nga ana e Shteteve të Bashkuara të Amerikës. Nëse shpallet fajtor ai rrezikon nga 10 vjetë burg për çdo akuzë.

Akuza të reja në Shtetet e Bashkuara të Amerikës kundër Julian Asanzh, themeluesit të Uikiliks. Ndaj tij janë prezantuar 17 akuza të reja sipas të cilave ai ka planifikuar marrjen dhe publikimin e informacioneve të klasifikuara. Departamenti Amerikan i Drejtësisë bëri të ditur se veprimet e Asanzh kanë vënë në rrezik të madh sigurinë kombëtare të Shteteve të Bashkuara të Amerikës si dhe kanë favorizuar kundërshtarët e vendit.

Më tej në deklaratën për mediat të Departamentit Amerikan të drejtësisë shkruhet se Asanzh, Uikiliks dhe Mening kishin objektivin e përbashkët për të shkelur ligjin mbi informacionet e rezervuara.

Vendimi i Asanzh për të publikuar emrat e qytetarëve afganë dhe irakienë, gazetarë dhe liderë fetarë që furnizonin me informacione forcat amerikane, i ka ekspozuar këta persona ndaj rreziqeve të mëdha. Nëse Asanzh shpallet fajtor ai rrezikon nga dhjetë vjet burg për çdo akuzë. /ABC News Albania 24/7

greku-1280x728.jpg
Sej rie16:20 | 13/05/2019

Eftimius Eftimiu mohoi para togave të zeza të Gjykatës së Krimeve të Rënda së ka qenë i përfshirë në ngjarjen ku u vra Devi Kasmit. Specialisti grek Eftimiu tha se në Shqipëri kishte ardhur për gjueti, pasi ai dhe miku i tij janë të pasionuar pas gjuetisë. Më tej, speciali grek, i dyshuar si personi që vrau Kasmin, pati ankesa për mënyrën se si transportohet nga paraburgimi në gjykatë, ndërsa tha se ndihej i pasigurt për jetën.

Gjatë seancës, dhanë dëshminë edhe dy persona, të cilët kanë qenë dëshmitarë okularë të vrasjes. Sipas prokurorit të çështjes, Besnik Muçi, Aurel Hoxhallari, Eftimius Eftimiu dhe Elton Halipaj kanë vepruar në kuadër të grupit të strukturuar kriminal, për të përgatitur dhe kryer vrasjen e Devi Kasmit.

Prokuroria u shpreh se plani është përgatitur disa muaj para se të realizohet krimi, ndërsa Aurel Hoxhallari, i cili dyshohet se është porositësi, njiheshin me Efthymious Efthymiu prej vitesh. Devi Kasmi u ekzekutua mbrëmjen e 29 janarit 2018./ABC News Albania 24/7

lideret-1280x715.jpg
Sej rie15:40 | 10/05/2019

Sipas analistëve dhe gazetarëve në Kosovë, akuzat dhe kundër akuzat e liderëve shqiptarë mes njëri- tjetrit për çështjen e korrigjimit të kufijve Kosovë – Serbi, janë të dëmshme për të dyja palët. 

Akuzat dhe kundërakuzat ndërmjet liderëve institucionalë në Kosovë e Shqipëri për çështjen e korrigjimit të kufijve Kosovë – Serbi për analistët në Kosovë janë të dëmshme për të dyja vendet.

Publicisti dhe gazetari Adriatik Kelmendi thotë se dy shtetet duhet të fokusohen t’i kryejnë detyrat e tyre të brendshme meqë nuk janë shtete të rrumbullakuara.

Ndërsa për kryeministrin shqiptar Rama, Kelmendi thotë se ka të drejt të flasë për Kosovën por jo të kundërshtojë një kryeministër të zgjedhur nga qytetarët e Kosovës.

Analisti Milazim Krasniqi konsideron se kryeministri Rama po ndërhyn pa nevojë në çështje të Kosovës.

Ndërsa ka kritikuar presidentin Hashim Thaçi për qëndrimet siç thotë ai kundërthënëse politike.

Përçarjet e politikanëve të Kosovës, Rama-Haradinaj në njërën anë dhe Thaçi-Berisha në anën tjetër për çështjen e korrigjimit të kufijve Kosovë- Serbi kanë kulmuar në formë deklarative ditëve të fundit pas samitit të Berlinit, ndonëse kanë nisur kohë më parë./ABC News Albania 24/7

PROVOKACIJA-30-PRILL-MONOLOGU-AGRON-TUFA-PJESA-1.mpg_snapshot_06.52-1280x720.jpg
ent ela20:42 | 30/04/2019

“Mua më kanë shpallur me vdekje, gjyqi popullor është bërë mungon vetëm ekzekutimi. I doli tim biri një prind. Ka qenë një numër i gazetës “Dita” me uniformën fashiste time dhe i doli dikush djalit tim dhe i thoshte: E pe tët atë fashist”.

I ftuar në studion e Provokacijas në ABC News drejtori i Institutit të Krimeve të Komunizimit Agron Tufa ka shpjeguar atë që fshihet pas debatit publik dhe sulmet e akuzat ndaj tij.

“A kërkohet respektimi i standardeve evropiane në çdo gjë që bëjmë do zbatojmë atë ligj. Është bërë propagandë shkatërrimtare lidhur me të drejtat që na jep ligji me Institutin e studimeve për Krimet e komunizmit. Thuhet dhe kjo është e gënjeshtërt, që Instituti e ka që nga 1945. Krimet e komunizmit quhet periudha nga 1944-1990, si dhe periudha para 28 nëntorit deri në themelimin e Partisë Komuniste. Ne jemi marrë 90% me krimet  e kominizmit gjatë diktaturës dhe kemi bërë studime për publikun në maksimum dhe nuk jemi përqëndruar në emra dhe 1% jemi marrë me luftën”.

Tufa sqaron se debati bëhet për 265 emrat e librit studimor të Çelo Hoxhës, për të cilin ai sulmohet për shkak se drejton Institutin.

“Kemi një libër 350 faqe, studimor dhe origjinal i Çelo Hoxhës. 265 emra na faturohen. Ne që i quajmë kriminelë, nuk është është kështu. Janë përgjegjës për krimet e kryera në Shqipëri e Kosovë.

Libri i Çelo Hoxhës dhe sulmohet Agron Tufa se ai është përgjegjës, se ai është drejtor dhe pjesa dërrmuese është që kanë qenë të pranishëm në skenën e krimit dhe partizanë të rangjeve të larta nuk e kanë denoncuar asnjëherë.

Psh kur dënohet Kadri Hazbiu dalin 30 dëshmitarë për krimet e luftës të Kadri Hazbiut, pra ata i dinin dhe i thanë 30 vite më pas dhe shumica dërmuese i kemi pajisur me dokument origjinal”.

Për Tufën të gjitha këto sulme në media dhe Parlament janë një abuzim dhe yshtje e një segmenti fanatik popullor.

“Agron Tufa i ka quajtur kriminelë-ky është abuzimi i parë se një libër shkencor mund të hidhet poshtë nga një studim tjetër shkencor, por ti nuk e hedh dot në opinion. Gjërat janë të qarta dhe mund të ketë interpretime. Vetëm një specialist mund ta hedhë librin poshtë, por gjyqe masive popullore.

Ti po ysht një popull ose një segment të fanatizmit popullor dhe pasojat a i merr parasysh se ti po gënjen mashtron, po shfaq një situatë që nuk ka lidhje. Unë mbaj përgjegjësi për çdo akt që bëj, por jo të shfaqësh atë që nuk është e vërtetë. 26 ditë pa ndërprerje gazeta hapej me sulm ndaj një personi”. /abcnews.al

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono