akuzat

Sala.png
Igli Nikolli15:14 | 29/01/2020

Vijon beteja mes Cardiff dhe Nantes në lidhje me vdekjen e Emiliano Sala. Sulmuesi argjentinas u transferua janarin e kaluar nga klubi francez në Premier League për 15 milion sterlina, por nuk ia doli të debutonte me ekipin e ri. 28-vjeçari humbi jetën me datë 21 janar të vitit të kaluar nga rrëzimi i aeroplanit që po e dërgonte në Cardiff.

Që prej atij momenti dy klubet janë përplasur shumë herë dhe nuk kanë gjetur gjuhën e përbashkët. Nantes pretendon paratë sipas akordit, ndërsa Cardiff nuk pranon të paguajë me shkakun se lojtari nuk zbriti kurrë në fushën e blertë për ta.

Këta të fundit i kanë rritur akuzat e tyre. L’Equipe raporton se klubi nga Uellsi ka paditur francezët dhe i cilëson fajtorë për vdekjen e ish-sulmuesit argjentinas. The Guardian sjell rrëfimin e një zyrtari të Cardiff, i cili shpjegon veprimin e bërë.

Gjatë gjithë vitit kemi sqaruar gjithmonë nevojën për një hetim mbi shkaqet që çuan në humbjen e Sala. Jo vetëm për të kuptuar plotësisht se çfarë ndikoi në rrëzimin e aeroplanit Piper PA-46 Malibu, por për t’iu përgjigjur pyetjeve të tjera, në veçanti në lidhje me përdorimin e fluturimeve të paligjshme në industrinë e futbollit“.

Nëse vërtetohet se Nantes dhe presidenti i saj ishin të informuar mbi fluturimin e Sala (opsion që është mohuar nga francezët), akuza mund të ishte ajo e vrasjes me dashje. /abcnews.al

liman-morina.jpg
nev ila11:34 | 29/01/2020

Kryebashkiaku i Hasit Liman Morina reagoi pas deklaratës së Sekretarit të Përgjithshëm Gazmend Bardhi, sipas të cilit, Morina është përfshirë në blerjen e votave gjatë zgjedhjeve parlamentare të 2017.

Në një prononcim për mediat, Morina ka mohuar akuzën e ngritur nga selia blu duke e cilësuar të pavërtetë dhe shpifjen e radhës. Në 2017 Gjykata e Kukësit pushoi çështjen ndaj Morinës për mungesë të provave pas akuzës dhe padisë që bëri PD e Hasit./abcnews.al

trump-bolton-1280x643.jpg
nev ila15:11 | 27/01/2020

Në një moment që në Shtetet e Bashkuara të Amerikës vijon procesi për shkarkimin e presidentit amerikan Trump, ish këshilltari i tij për sigurinë kombëtare John Bolton, e akuzon atë publikisht.

Në një libër që pritet të publikohet së shpejti Bolton këmbëngul se Trump i ka lidhur ndihmat ndaj Ukrainës me hetimet ndaj Biden dhe demokratëve të tjerë amerikanë.

Presidenti amerikan Donald Trump i ka thënë këshilltarit të tij për sigurinë kombëtare se dëshironte të ndalonte ndihmat ushtarake për Ukrainën deri kur Kiev ta ndihmonte për të hetuar Biden dhe demokratëve amerikanë.

Lajmi raportohet nga New York Times i cili citon një pjesë të librit ende të pabulikuar të ish-këshilltarit për sigurinë kombëtare në Shtëpinë e Bardhë, John Bolton.

Një tezë që duket se konfirmon akuzëne demokratëve në procesin për shkarkimin e presidentit amerikan.

Bolton, i cili u largua nga Shtëpia e Bardhë një ditë para se Trump të lejonte ndihmat për Ukrainën në 11 shtator, ka thënë se është i gatshëm të dëshmojë, pavarësisht urdhërit të presidentit që ndalon këshilltarët e tij që të bashkëpunojnë në këtë proces.

Në këtë pikë demokratët në kongres kërkojnë që Bolton të dëshmojë në procesin për shkarkimin e kreut të Shtëpisë së Bardhë.

Me anë të një reagimi në profilin e tij në Twitter, Trump ka reaguar duke këmbëngulur se nuk i ka thënë asnjëherë John Bolton se ndihmat për Ukrainën lidheshin me hetimet për demokratët, përfshirë Biden.

Ai shton se në të vërtetë nuk është ankuar asnjëherë për këtë në momentin që u pushua publikisht nga puna.

“Nëse John Bolton e ka thënë këtë, e ka bërë vetëm për të shitur librin,” theksoi presidenti amerikan Trump./abcnews.al

qerim-ismailaj-balla-1280x640.jpg
nev ila13:07 | 13/01/2020

Gjatë një komunikimi me median ditën e sotme kreu i grupit të Partisë Socialiste Taulant Balla, u shpreh në lidhje me dekretin e kthyer nga presidenti Meta në kuvend për paketën antishpifje, për kreun e  Inspektoriatit të Lartë të Drejtësisë por edhe në lidhje me akuzat që ka bërë së fundmi Partia Demokratike, ndaj kryebashkiakut të Mallkastrës Qerim Ismailaj.

Balla tha se Partia Socialiste nuk ka asnjë përgjegjësi për çështjet individuale të gjithsecilit.

“Partia socialiste ka një vendim politik që nuk ka asnjë përgjegjësi politike për përgjegjësitë individuale të gjithësecilit në PS, në këtë rast ka përgjegjësi personale. Në çdo rast hetimin dhe në lidhje me akuzat është detyrë e prokurorsë së përgjithshme”, tha Balla.

Sipas denoncimit të bërë nga Partia Demokratike, Ismailaj është  dënuar  nga gjykata greke, dënim të cilin nuk e ka shënuar në formularin e dekriminalizimit.

Ndërkohë Prokuroria e Përgjithshme ka regjistruar procedimin për Kryetarin e Bashkisë së Mallakastrës Qerim Ismailaj  dhe ka nisur verifikimin për figurën e tij. /abcnews.al

spartak-ngjela-mirela-1.jpg
nev ila21:12 | 27/12/2019

I ftuar mbrëmjen e sotme në ABC News me gazetaren Mirela Milori ishte avokati i njohur Spartak Ngjela.

Si ekspert i jurisprudencës Ngjela vuri theksin në disa çështje me rëndësi.

Sipas avokatit ajo që ka ndodhur në tërmetin e 26 nëntorit  i cili pasoi dëme të shumta të banesave dhe 51 viktima, është vrasje me dashje.

Cilësimi juridik i veprës penale nga ana e Prokurorisë, sipas Ngjelës është i saktë, dhe se hetimi duhet të tregoje se si ka ndodhur, dhe pse kanë ardhur pasoja të tilla nga ky tërmet.

Më tej avokati tha se ndërkohë Prokuroria, duhet të kishte ngritur akuzën edhe ndaj Kryeministrit dhe Qeverisë. Kjo akuzë, duhej ngritur për shkak se mungon fondi i emergjencës, për të cilën Kryeministri nuk ka deklaruar asnjëherë nëse ka një të tillë, dhe sa është ky fond.

Ky fond emergjence nuk preket dhe është një kriter strikt ligjor theksoi avokati.

Pjesë nga biseda në studio:

Spartak Ngjela: Problemi ishte që akuza penale ka qenë e sakte por hetimi duhet të vazhdojë dhe të tregojë si ka ndodhur. Nëse unë të akuzoj për vrasje do të thotë që faji është bërë me dashje. Qeveria Rama nuk kishte emergjence, nuk kishte fonde emergjence, është kërkesë kushtetuese. Është kërkesë e rreptë ligjore, por nuk ka akuzë, nuk ka prokurori. Në çdo vend të botës tani do të ishte nën akuzë.  Kryeministri dhe qeveria duhet të ishte nën akuzë tani për mungesën e fondeve të emergjencës dhe kjo është një kriter strikt ligjor. Pse nuk tregon sa e ka fondin e emergjencës? Një herë që isha duke e dëgjuar kryeministrin, ai iu drejtua përfaqësuesve të shoqërisë civile duke i thënë sillini këtu tek unë fondet. Dmth donte të merrte paratë e tyre dhe të tregonte se po i bënte ai vetë të gjitha sepse me sa duket s’ka fonde për emergjencat.

Mirela Milori: Ju mendoni se prokuroria duhet të kishte ngritur hetimet për kryeministrin dhe qeverinë sepse ka mungesë emergjencash?

Spartak Ngjela: Nuk e di, ai deri tani ka treguar se s’ka fond për emergjencën dhe sa e ka. Mbase e ka dhe e mban sekret por është i detyruar ta tregojë. Fakti që nuk e tregon unë mendoj se nuk ka, dhe nëse nuk ka kjo është vepër penale.

Mirela Milori: Si po menaxhon Rama si Kryeministër?

Spartak Ngjela: Rama nuk ka aftësi për ta menaxhuar, nuk është profesionit, çfarë do menaxhojë…faji është i shqiptarëve që nxjerrin kryeministra jo profesionit. Nuk e menaxhon dot, ka pamundësi absolute. Pse? Sepse ai nuk di ku mbaron ligji dhe ku fillon forca, nuk është në gjendje të konceptojë saktë se çfarë duhet tu thotë njerëzve, dhe çfarë duhet të kërkojë nga shoqëria, dhe pastaj është shumë i dobët në bisedime me të huajt, për ndihmat e huaja sepse prezumohet si qeveri e korruptuar. Do thoni ju ku e keni provën? E kam provën sepse BE solli 15 milion euro si ndihmë dhe tha se do i menaxhojë vetë, nuk ia la qeverisë në dorë sepse Shqipërinë e konsiderojnë një vend të korruptuar. Ecën si prifti me kusi, ai s’ka zyrë, gjithë kjo gjendje e rëndë ai s’ka zyrë. Ai shkon nga një ngjarje në një ngjarje, nga një varrim në një tjetër, merr edhe fëmijët me vete, janë nonsense që nuk lidhen me menaxhimin. Këto veprime fshehin diçka, ose shqetësimin e tij, ose fshehin shqetësimin se s’ka para të përballojë dëmet./abcnews.al

trump.jpg
nev ila19:04 | 10/12/2019

Demokratët në Shtetet e Bashkuara paraqitën zyrtarisht të martën akuzat ndaj presidentit republican Trump. Nëse Komiteti Gjyqësor voton për miratimin e akuzave këtë javë, ato do t’i dorëzohen më pas Dhomës së Përfaqësuesve për votim të plotë. Trump përsëriti të martën se “nuk ka bërë asgjë të keqe”.

Komiteti Gjyqësor i Dhomës së Përfaqësuesve në Shtetet e Bashkuara prezantoi të martën akuzat formale kundër presidentit amerikan, Donald Trump, i cili po përballet me procedurat e shkarkimit nga detyra.

Kryetari i Komitetit Gjyqësor, Jerry Nadler, tha se akuza e parë kundër presidentit ka të bëjë me abuzimin e pushtetit, ndërsa e dyta me pengimin e punës së Kongresit.

“Presidenti e sheh veten më lart se ligji”, tha Nadler.

Nëse Komiteti Gjyqësor voton për miratimin e akuzave këtë javë, ato do t’i dorëzohen më pas Dhomës së Përfaqësuesve për votim të plotë. Trump përsëriti të martën se “nuk ka bërë asgjë të keqe“.

Procedura për shkarkimin e presidentit ka nisur qysh në shtator nga demokratët, kur një informator është ankuar në Kongres, duke thënë se Trump i ka telefonuar presidentit të Ukrainës, Volodymyr Zelensky, dhe i ka kërkuar që ta hetojë rivalin e tij demokrat, Joe Biden, për korrupsion në Ukrainë.

Biden mund të jetë sfidues i mundshëm i Trumpit në zgjedhjet e vitit 2020. Trump thuhet se e ka kushtëzuar ndihmën ushtarake për Ukrainën, në këmbim të hetimeve kundër Bidenit.

Trump vazhdimisht e mohon çdo keqbërje, por kërkimi i ndihmës nga jashtë për të fituar zgjedhjet në SHBA, është akt i paligjshëm. Procesi ndaj Presidentit Trump, i quajtur “Impeachment” do të thotë që të ngresh akuza në Kongres, që do të përbëjnë bazën për gjykim.

Kushtetuta e Shteteve të Bashkuara thotë se një president largohet nga detyra për “tradhti, ryshfet, shkelje të rëndë ose kundërvajtje të tjera”. Procedura për shkarkim zhvillohet në dy faza.

Nis me seanca dëgjimore në Dhomën e Përfaqësuesve dhe, nëse miratohet me shumicë të thjeshtë, procesi kalon në Senat, ku edhe mbahet gjykimi.

Në Senat  duhen dy të tretat e votave për largimin e presidentit nga detyra dhe një gjë e tillë nuk është arritur kurrë në historinë e Shteteve të Bashkuara. Senati aktualisht kontrollohet nga Partia Republikane – nga e cila vjen edhe presidenti Trump./abcnews.al

gazment-bardhi-1.jpg
ent ela14:17 | 25/11/2019

Partia Demokratike ka akuzuar kryeministrin Edi Rama se kërkon që dështimin e tij ta shesë për sukses. në një deklaratë për mediat sekretari i Përgjithshëm i PD, Gazmend Bardhi tha se Rama nuk ka asnjë masë të re kundër krimit të organizuar dhe mafias. Sipas tij SPAK është mekanizmi i duhur kushtetues, për t’i dhënë fund krimit të të fortëve, por që ka përballë të njëjtin kundërshtar që  e pengoi për 3 vjet.

Bardhi theksoi gjithashtu se Rama e di mirë se SPAK-u dhe BKH-ja e pavarur është rrezik për të dhe bandën e tij.

Deklarata e plotë e Bardhit

Kjo është një përpjekje e dëshpëruar për të ringjallur një plan të vjetër, të paligjshëm dhe të dështuar, nga një njëri që i kanë shteruar idetë dhe kërkon që dështimin e tij ta shesë për sukses.

Shqiptarët e dinë mirë që shfaqjet propagandistike dhe krekosjet e kota nuk do ta rikthejnë sigurinë e vërtetë në rrugët tona, fjalët boshe të një Kryeministri të lidhur me krimin nuk do ta ringjallin ekonominë dhe as nuk do të sjellin lekë për xhepat e boshatisura të shqiptarëve nga korrupsioni dhe keqqeverisja e tij.

Rikthimi i modelit të shtetit policor, i rrëzuar më parë si antikushtetues, është tentativë e qartë për të penguar dhe ndërhyrë në punën e SPAK dhe BKH, në ditën e ngritjes së tyre, për të luftuar krimin e organizuar dhe korrupsionin mes zyrtarëve të lartë dhe politikanëve.

Ligji është një mashtrim që synon të nënshtrojë drejtësinë dhe të pengojë veprimin e saj kundër krimit të organizuar dhe korrupsionit, duke krijuar zyrtarisht shtetin policor.

Edi Rama e di mirë se SPAK-u dhe BKH-ja e pavarur është rrezik për të dhe bandën e tij!

Të gjitha rastet kur Rama mbrojti krimin që promovoi në politikë. “Shqipërisë i duhet një qeveri e palidhur me krimin”

Edi Rama nuk mund ta luftojë krimin, pavarësisht spektaklit me të cilin jep premtimet. Ai ka dhënë prova se ka marrë në mbrojtje të gjithë bashkëpunëtorët e tij të kapur në flagrancë me krimin, që nga Elvis Rroshi, Saimir Tahiri, Fatmir Xhafa, Vangjush Dako, Mark Frroku, Agim Kajamaku. Ai kishte të gjithë shtetin nën kontroll, në dispozicion për t’i hetuar, por bëri të kundërtën, i mori në mbrojtje, fshehu urdhërarrestin ndërkombëtar për kriminelët që futi në parlament, duke u dhënë atyre imunitet, pengoi  për 3 vjet hetimin për vjedhjen e zgjedhjeve me dosjet 184 dhe 339.

Kuadri ligjor në Shqipëri për të luftuar krimin e organizuar është i plotë dhe madje shumë i fortë.

Qytetarët presin ngritjen e SPAK dhe BKH për ta zbatuar atë. Qytetarët nuk presin që SPAK-un dhe BKH-në, e ngritur me ndihmën e Shteteve të Bashkuara të Amerikës, ta zëvendësojë Edi Rama, Sandër Lleshaj apo Ardi Veliu.

Nën drejtimin e Edi Ramës, Saimir Tahirit, Fatmir Xhafës dhe Sandër Lleshit, Policia e Shtetit është provuar që mbron dhe nuk lufton krimin e organizuar, është provuar që mbron dhe nuk lufton trafikun e drogës, sepse në krye të KÇK është vetë Kryeministri. Ai është kapur në bashkëpunim me krimin e organizuar për të vjedhur vota, ai është kapur me klientët e tij duke vjedhur tendera dhe e koncesione.

E keqja është në krye të Qeverisë mafioze të Shqipërisë. Shqipëria nuk ka kohë për të humbur me nisma propagandistike, që Rama shpall me bujë sa herë Shqipërisë i mbyllet dera e Europës!

Shqipërisë i duhet një qeveri e dalë nga zgjedhjet e lira e të ndershme, që mbështet dhe nuk pengon drejtësinë dhe që ka vullnet të vërtetë për të luftuar krimin e organizuar dhe korrupsionin! /abcnews.al

agim-kajmaku.jpg
ger ta16:17 | 11/11/2019

Ish-kreu i bashkisë së Vorës, Agim Kajmkau, i cili u shkarkua nga KQZ është shpallur sot në kërkim policor. Sakaq, janë tre akuza që mund ta çojnë pas hekuarve ish-kryebashkiakun.

Kajmaku akuzohet për falsifikim të formularëve dhe ushtrim i funksioneve pas dhënies fund të detyrës.

Ndërkohë, akuza e fundit ka të bëjë me një vendim të Kajmakut, të marrë pas shkarkimit nga Komisioni Qendror i Zgjedhjeve.

Pas vendimit të KQZ, Kajmaku ka shkarkuar nga detyra dy nënkryetarët e Bashkisë,  Hekuran Brahimaj dhe Laureta Omeri duke vendosur si të vetmin nënkryetar shefin e Kabinetit Gent Picari, megjithëse edhe vetë ishte zyrtarisht i shkarkuar si kreu i bashkisë Vorë.

Kujotjmë se Agim Kajmaku është denoncuar fillimisht nga Partia Demokratike si person i dënuar në Greqi dhe nuk e kishte deklaruar në formularin e dekriminalizimit. /abcnews.al

selia-PD-1280x713.jpg
ent ela17:36 | 08/11/2019

Pasi Prokuroria i ka komunikuar akuzën kreut të PD Lulzim Basha, për falsifikim dokumentesh, ka ardhur edhe reagimi i selisë blu.

Në një reagim publik PD shprehet se sot u vërtetua se nuk ka patur kurrë asnjë hetim në SHBA as ndaj Partisë Demokratike, as ndaj kompanisë së lobimit, as ndaj ndonjë zyrtari të Partisë Demokratike. Ajo ishte një sajesë e Edi Ramës, për të fshehur një tjetër hetim që po zhvillohej në SHBA.

Reagimi i plotë:

Sot prokuroria vendosi pushimin e akuzës qesharake që e stisën dhe e përdorën për të goditur kundërshtarin politik sipas një strategjie të miratuar nga zyra e Edi Ramës. Pasi u keqpërdorën duke akuzuar zyrtarët e Partisë Demokratike për pastrim parash dhe përdorim të parave ruse, prokuroria sot u detyrua të pranojë se këto akuzave të stisura nuk qëndrojnë.

E vërteta është se ishte Partia Demokratike që i kërkoi Prokurorisë hetimin e plotë dhe të gjithanshëm të financave dhe shpenzimeve të saj, e bindur se ka vepruar në përputhje të plotë me ligjin. Partia Demokratike ka deklaruar që ditën e parë se kjo akuzë u sajua nga Edi Rama për të zhurmuar skandalet korruptive të Qeverisë së tij dhe lidhjet me krimin e organizuar.

Partia Demokratike vlerëson faktin që pas 2 viteve të mbajtjes së kësaj çështje të hapur për qëllime propagande qeveritare, çështja është dërguar në gjyq. Tashmë shqiptarët do të kenë mundësi të njihen me dokumentet e plota, në seanca gjyqësore të hapura dhe transparente, ku do të provohet se Partia Demokratike ka bërë transparencë të plotë të financave të saj dhe ka deklaruar në përputhje me ligjin çdo shpenzim të kryer.

Ndërkohë që partnerët strategjikë bëjnë thirrje për reforma që forcojnë pavarësinë e institucioneve, drejtësia e kontrolluar nga Edi Rama, nuk heton krimet dhe korrupsionin qeveritar, mbyll sytë përpara lidhjeve të krimit me politikën, dhe sajon akuza kundër kundërshtarit politik të Edi Ramës.

Sot u vërtetua se nuk ka patur kurrë asnjë hetim në SHBA as ndaj Partisë Demokratike, as ndaj kompanisë së lobimit, as ndaj ndonjë zyrtari të Partisë Demokratike. Ajo ishte një sajesë e Edi Ramës, për të fshehur një tjetër hetim që po zhvillohej në SHBA.

Në të vërtetë, në SHBA ka patur vetëm një hetim që lidhet me Shqipërinë dhe që ka përfunduar me dënimin e të paktën 2 personave, mbi financimin e paligjshëm të Edi Ramës.

Edhe pse faktet janë bërë publike, edhe pse është depozituar kallëzim penal nga opozita, edhe pse dosja e drejtësisë amerikane është e plotë, edhe pse avokatët e personave të dënuar deklaruan që kanë vepruar për llogari të Edi Ramës, prokuroria shqiptare nuk ka kryer asnjë veprim. Prokuroria e kontrolluar prej Edi Ramës, as ka nisur hetime dhe as ka marrë të pandehur Edi Ramën për financim të paligjshëm, edhe pse ky fakt është provuar tashmë nga drejtësia. /abcnews.al

 

arben-ristani-interviste-1.jpg
ger ta16:02 | 08/11/2019

Në një lidhje telefonike për Abcnews, Arben Ristani ka reaguar për mbylljen e çështjes së lobimit rus, ku ky i fundi dge kreu i PD, Lulzim Basha janë  thirrur si të pandehur.

Prokuroria ka përfunduar hetimet lidhur me një akuzë për falsifikim parash. Në përfundim të hetimeve prokuroria ka vërtetuar se akuza për falsifikim parash është e pavërtetuar dhe e kanë pushuar. Dhe kanë lënë vetëm akuzën për falsifikim dokumentash.

Akuza për falsifikim të dokumentit ka të bëjë me një deklarim që PD bën pranë KQZ për fondin që ajo përdor. Në rastin konkret formulari pranë KQZ është i rregullt, nuk është i hartuar dhe as firmosur nga unë. Është një akzuë  që nuk qendron por është edhe e motivuar politikisht.

Unë nuk kam hartuar dhe as firmosur dokumenta të tillë. Ju e quani lobim rus por unë nuk di të ketë lidhje të tilla. Është një thashethemënajë e madhe”, tha Ristani. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono