30 qershori

raporti.jpg
ad min21:50 | 04/09/2019

Armiqësia politike, mungesa e reformës elektorale dhe pasiguria ligjore ishin disa nga aspektet që dëmtuan zgjedhjet vendore të 30 Qershorit. Kështu thotë raporti i misionit të OSBE/ODIHR, i cili mes të tjerash vë në dukje se procesi elektoral u karakterizua gjithashtu nga parregullsi në kontrollin e votuesve dhe me pengim të procesit të vëzhgimit.

Zgjedhjet vendore të 30 Qershorit u mbajtën në një situatë të rëndë politike dhe institucionale, që rridhte nga armiqësia e tejzgjatur mes Partisë Socialiste në pushtet dhe asaj Demokratike në opozitë.

Kështu vlerëson raporti i OSBE/ODIHR, sipas të cilit pasiguria ligjore dhe përballja mes institucioneve minoi besimin publik tek procesi dhe legjitimitetin e tij. Raporti vë në dukje se si disa ditë përpara zgjedhjeve, protestuesit e opozitës në disa zona të vendit sulmuan administratën elektorale, duke përdorur akte dhune dhe në disa raste zjarrvënie.

Gjithashtu, më e rëndësishme, mungesa e një marrëveshjeje politike pengoi progresin e reformës elektorale, duke lënë shumicën e rekomandimeve të ODIHR-it të paplotësuara, përfshirë këtu ato që kanë të bëjnë me depolitizimin e administratës elektorale, transparencën e financave të fushatës dhe efikasitetin e zgjidhjes së kontesteve.

Gjithashtu, vijon raporti, balanca e rekomanduar politike në administratën elektorale nuk u arrit pjesërisht për shkak të vendimit të partive të opozitës për të mos emëruar komisionerë dhe qëndrimit të KQZ-së se vetëm partitë që merrnin pjesë në garë mund të kishin përfaqësues. Raporti kritikon KQZ-në se interpretoi ligjin në mënyrë të paqëndrueshme dhe në vija të përgjithshme.

Nga ana tjetër, votuesit nuk patën shumë alternativa për shkak të bojkotit politik nga partitë e opozitës. Transparenca e eventeve të fushatës elektorale është një tjetër aspekt që preket në raportin e ODIHR-it, ku thuhet se ajo ishte e ulët, me përjashtim të mitingjeve të kryeministrit, ku ai ishte folësi kryesor.

Edhe praktika e ndjekur nga Partia Socialiste, që u dërgonte mediave kronika të gatshme minoi informimin real të qytetarëve. Gjithashtu, votuesit jo gjithmonë u kontrolluan për gjurmën e bojës, një praktikë kjo e konstatuar në 21 për qind të procesit të vëzhgimit dhe jo gjithmonë u ngjyrosën me bojë përpara se të hidhnin votën në kuti.

Votimi familjar dhe ai në grup ishte një tjetër problem, i konstatuar në kuotat e 10 dhe 2 për qind të procesit të vëzhgimit. Gjithashtu, nënvizon raporti, firma thuajse identike dhe përpjekje për të influencuar votuesit u konstatuan në 3 për qind të rasteve.

Ndërsa në 16 për qind ekspertët e huaj vunë re të njëjtin person që u rekomandonte shumë qytetarëve se si të votonin. Në përfundim, raporti rekomandon kryerjen e reformës zgjedhore në Shqipëri sipas linjave të OSBE-së dhe kritereve të institucioneve të tjera ndërkombëtare për të plotësuar standardet për zgjedhje demokratike.

Gjithashtu, ai u bën thirrje agjencive ligzbatuese që të hetojnë të gjitha dyshimet për shkelje elektorale në mënyrë tërësore, të shpejtë dhe transparente.

/ABC News Albania 24/7

oerd-bylykbashi-1.jpg
ad min15:43 | 18/08/2019

Partia Demokratike e konsideron të jashtëligjshme mbledhjen e Këshillit Bashkiak të Shkodrës, në kushtet kur nga zgjedhjet e paligjshme të 30 Qershorit nuk ka asnjë kandidat fitues, pas largimit të Valdrin Pjetrit. Ish-deputeti demokrat, Oerd Bylykbashi ka sjellë në vëmendje rastin e Kavajës dhe largimin e Elvis Roshit, për të treguar se vetëm përmes një procesi të ri zgjedhor mund të ketë konstituim të organeve të reja vendore në Shkodër. Në një intervistë për ABC Neës, Bylykbashi e sheh 30 Qershorin një proces nul dhe të pacertifikuar nga Gjykata Kushtetuese.

Socialistët janë të vendosur që edhe pa një kryetar për drejtimin e bashkisë, të largojnë Voltana Ademin nga zyra dhe të drejtojnë institucionin me nënkryetar të zgjedhur prej tyre. Por për ish-deputetin demokrat, Oerd Bylykbashi rasti i Shkodrës është i ngjashëm me atë të Kavajës, dy vjet më parë kur ish-kryebashkiaku Elvis Roshi ra në rrjetën e dekriminalizimit dhe Presidenti dekretoi zgjedhje të reja vendore. Në një intervistë për ABC News, Bylykbashi sqaron se themeli kushtetues i 30 Qershorit ka rënë me dekret Presidencial.

“Askush të mos mendojë që zgjedhjet lokale u mbyllën me 30 Qershor. Janë të vetmet zgjedhje në historinë 25-vjeçare, pas rënies së komunizmit që kanë një pikëpyetje të hapur, thelbësore, kushtetuese përpara një gjykate, pra anulimi i datës 30 Qershor si datë zgjedhjesh dhe dekretimi i datës 13 Tetor si datë tjetër zgjedhjesh i kanë hequr themelin kushtetues dhe ligjor zgjedhjeve të 30 Qershorit. Për rrjedhojë, ato zgjedhje janë në procesin kushtetues nul”, tha Bylykbashi.

Gishtin e akuzës për situatën e krijuar, Bylykbashi e drejton te anëtarët socialist të Komisionit Qendror të Zgjedhjeve, për të cilët paralajmëron se do të përgjigjen penalisht për dëmin miliona euro që i kanë shkaktuar shtetit shqiptar.

“Të mbajnë përgjegjësi penale katër anëtarët socialistë të KQZ-së, do ta mbajnë këtë përgjegjësi penale, nuk i shpëtojnë dot. Kanë shpërdoruar miliona euro pasuri publike shqiptare për të organizuar zgjedhjet e PS-së, kështu që janë të vetmet zgjedhje të cilat nuk kanë fjalën e Gjykatës Kushtetuese. Këtë e thonë OSBE/ODHIR-i, këtë e thotë Departamenti i Shtetit, këtë e thonë ata që kanë minimumin e kuptimit të demokracisë, që është Gjykata Kushtetuese që shprehet”, tha Bylykbashi.

Ndonëse Partia Demokratike nuk është regjistruar në zgjedhjet e 13 Tetorit, Bylykbashi e sheh plotësisht të mundur zhvillimin e zgjedhjeve të parakohshme në këtë datë, e cila në rrafshin Kushtetutës është akoma e vlefshme.

“Ne jemi të gatshëm kurdo që sipas parametrave kushtetuese të ketë zgjedhje. 13 Tetori është një datë, e cila është brenda këtyre lloj parametrash. Problemi kryesor është sjellja e KQZ-së”, tha Bylykbashi.

Dorëheqja e Valdrin Pjetrit nga marrja e detyrës së kryebashkiakut të Shkodrës, pas publikimit nga PD të dënimit të tij në Itali për trafik të lëndëve narkotike, u pasua me një sërë takimesh në kampin opozitar. Lulzim Basha u takua me aleaten e LSI-së, Monika Kryemadhi dhe atë republikan, Fatmir Mediu për të përcaktuar aksionin e radhës përballë qeverisë. /ABC News Albania 24/7

da032a5e-703d-4696-814a-4e4c78fdc745.jpg
ad min12:45 | 06/08/2019

Kreu i opozitës Lulzim Basha deklaroi në Patos se 1/3 e socialistëve refuzuan më 30 Qershor qeverisjen hajdute dhe kriminale të Edi Ramës. Zoti Basha iu referua shembullit të Bashkisë së Patosit, ku pjesëmarrja në votime ishte e ulët.

“Shqiptarët u vetëdijësuan se 30 qershori nuk bëhej për ta, por për një klikë hajdutësh, që ka thyer çdo rekord hajdutërie në Shqipëri dhe në Ballkan! Çdo vendim, çdo akt qeverie, çdo ligj, bëhet me synimin për të vjedhur shqiptarët. Këtë verë kanë planifikuar vjedhjen e radhës me uniformat e policisë ku kanë dyfishuar çmimin. Ndërkohë, po bëjnë gati koncesionin për të marrë 100 euro nga çdo biznes, edhe pse e kanë këputur biznesin me taksa, me gjoba, me çmimin e naftës dhe me çmimin e energjisë.
Ndaj, kupa e mbushur dhe e derdhur prej hajdutërisë dhe varfërisë, solli reagimin popullor më 30 qershor.  Kurrë më parë nuk kemi pasur një bashkim të tillë ku 85 % e shqiptarëve iu përgjigen thirrjes tonë dhe refuzuan farsën, refuzuan Ramën.  Por brenda këtij refuzimi popullor, ka edhe një lajm tjetër shumë të madh.  30 qershori nuk është vetëm refuzimi i Edi Ramës, nuk është thjesht një kryengritje ndaj mjerimit ekonomik që ai ka mbjellë, papunësisë, varfërisë. Është edhe një thirrje popullore për ndryshim. Dhe kjo thirrje i drejtohet të vetmit faktor politik që ka kapacitetet, burimet njerëzore, vizionin dhe planin për ta bërë këtë ndryshim të mundur, që është Partia Demokratike e Shqipërisë dhe Opozita e Bashkuar! #ShqiperiasiEuropa”. 

kukes.jpg
ad min15:33 | 02/08/2019

Ka vijuar rotacioni në bashkitë opozitare. Në Kukës fituesi socialist ka marrë paqësisht detyrën, ndërsa LSI nuk ka mundur të bllokojë në Përrenjas marrjen e detyrës nga fituesi i PS. Ndërkohë Dako e Sejdini ju kanë dorëzuar detyrën pasardhësve të tyre brenda familjes socialiste.

Kukësi nuk është as Devolli e as Kavaja. Demokratët e kësaj bashkie nuk rezistuan këtë të premte, teksa Safet Gjici hyri në zyrën ku deri më tani qeveriste Bashkim Shehu.

Pas betimit në Prefekturë, socialisti hyri në zyrë. Për suport politik, PS, kishte dërguar në Kukës, Sekretarin për Rininë, Gent Cakaj. PD reagoi, duke thënë se përplasja ishte shmangur me vendim politik.

LSI ka dorëzuar dy bashki të sajat, pa probleme. Në Prrenjas, detyrën e ka marrë Nuri Belba në vend të Miranda Rirës. Ish-kryebashkiakja e LSI-së ka deklaruar se nuk do ta lirojë zyrën.

Në  Skrapar nuk ka pasur asnjë rezistencë. Është betuar në sallën e këshillit bashkiak Adriatik Mema duke i marrë zyrën Nesim Spahiut të LSI. Mes të vetëve, socialistët kanë bërë transferimin e pushtetit.

Në Elbasan, Qazim Sejdini i ka dorëzuar detyrën Gledian Llatjes, ndërsa në Durrës, Valbona Sako ka marrë detyrën nga Vangjush Dako./ABC News Albania 24/7

KRONIKE-OSBE-PER-ZGJEDHJET.mpg_snapshot_00.08-1280x720.jpg
ent ela14:10 | 25/07/2019

Sekretari i Përgjithshëm i OSBE-së, Tomas Greminger kërkon nga Shqipëria dialog politik me të gjitha palët. Gjatë vizitës së tij në Tiranë, ai tha se për vlefshmërinë e zgjedhjeve të 30 qershorit, duhet të pritet Gjykata Kushtetuese. Për Ministrin Cakaj, marrja e presidencës së OSBE-së vitin e ardhshëm, është suksesi më i madh i Shqipërisë pas anëtarësimit në NATO.

Shqipëria do të marrë vitin e ardhshëm presidencën e OSBE-së, por ky rol i ri ndërkombëtar, rrezikon ta gjejë vendin me një krizë të brendshme politike. Seekretari i Përgjithshëm i NATO-s, Thomas Greminger kërkoi në Tiranë, dialog politik gjithëpërfshirës.

“Jam i bindur se zgjidhja do të gjendet brenda për brenda, por ne inkurajojmë dialogun. Është e nevojshme që të gjithë aktorët të angazhohen për funksionimin e demokracisë në vend. Pjesëmarrja në institucionet demokratike është e vetmja rrugë për të pasur fuqi politike. OSBE është e gatshme për të ofruar mbështetje, por asnjë zgjidhje nuk mund të jetë e qëndrueshme nëse nuk përfshihen të gjithë aktorët.”

Ministri i jashtëm komentoi punët e brendshme, duke treguar kufirin e tolerancës së mazhorancës.

I pyetur mbi vlefshmërinë e zgjedhjeve të 30 qershorit, Greminger, tha se për këtë vendos vetëm Gjykata Kushtetuese.

Sekretari i Përgjithshëm i OSBE-së tha se pret nga qeveria shqiptare të bëjë ndryshime në ligjin e Medias, pas vërejtjeve të ardhura nga Vjena për paketën antishpifje të  kryeministrit Rama. /ABC News Albania 24/7

PArtia-Demokratike.jpg
nev ila15:40 | 20/07/2019

Partia Demokratike ka kallëzuar në prokurori anëtarët e KQZ-së, komisionerët e PS dhe zyrtarë të lartë për krimet e kryera para, gjatë dhe pas 30 Qershorit.

Sipas PD, në padinë e tyre, kërkohet nga kryeprokurorja Arta Marku që të mos pengojë hetimet për krimet elektorale të 30 Qershorit.

Njoftimi i Partisë Demokratike:

Partia Demokratike i kërkoi Prokurores së Përgjithshme të Përkohshme, Arta Marku, të mos pengojë hetimet për krimet zgjedhore duke i shërbyer axhendës së saj personale për t’u emëruar Kryeprokurore dhe regjimit kriminal të Edi Ramës.

Nëpërmjet një letre të datës 12 Korrik, për të cilën është vënë në dijeni edhe shefja e Misionit të ODIHR, Audrey Glover, Sekretari i Përgjithshëm i PD, Gazment Bardhi, vë në dukje se organi i akuzës në Republikën e Shqipërisë, jo vetëm nuk po heton seriozisht dosjet e vjetra 184/2016 dhe 339/2017, por nuk ka nisur asnjë hetim për asnjë prej shkeljeve të rënda ligjore që u konstatuan gjatë procesit antikushtetues të 30 Qershorit.

Letra e numrit 2 të PD-së shpreh hapur mosbesimin e opozitës për PPP Arta Marku, për shkak të zgjedhjes së saj antikushtetuese nga qeveria e Edi Ramës.

Që prej emërimit tuaj antikushtetues si Prokurore e Përgjithshme e Përkohshme, kontrolli i qeverisë mbi prokurorinë është çimentuar, duke sjellë, njëkohësisht, çimentimin e kulturës së pandëshkueshmërisë ndaj zyrtarëve të lartë shtetërorë. Gjatë drejtimit tuaj, asnjë zyrtar i lartë i qeverisë, asnjë politikan, asnjë funksionar i lartë publik nuk ka dalë para drejtësisë për krimin e korrupsionit apo të krimeve zgjedhore, megjithëse denoncimet publike kanë qenë me qindra.” – thuhet në letrën e Sekretarit të Përgjithshëm të PD.

Duke akuzuar PPP Arta Marku se është bërë mburojë politike për krimet e qeverisë edhe me votimet e paligjshme dhe antikushtetuese të 30 Qershorit, PD rendit të gjitha shkeljet e ligjit, të vëna në dukje prej saj, nga media, misioni ODIHR-it para, gjatë dhe pas 30 Qershorit, si presioni ndaj punonjësve të administratës shtetërore, blerja e votave, mbushja e kutive të votimit, shkelja e ligjit dhe e Kushtetutës nga 4 anëtarë të Komisionit Qendror të Zgjedhjeve etj.

Të vetmit që nuk dëgjojnë dhe nuk shikojnë asgjë nga krimet e mësipërme janë prokurorët e Republikës, që duhet të ishin në krye të detyrës për të mbrojtur Kushtetutën dhe ligjet e vendit”, thuhet në letrën e Partisë Demokratike.

Për të treguar se deri ku shkon nënshtrimi i prokurorisë ndaj qeverisë, Sekretari i Përgjithshëm i PD-së, Gazment Bardhi, nxjerr në pah mosveprimet e prokurorisë për dosjet e krimeve zgjedhore dhe pasojat për vendin.

Mosveprimi i prokurorisë për krimet zgjedhore të partisë në pushtet është i përsëritur. Ai ka prodhuar pasoja të rënda për demokracinë, duke kaluar nga një masakër elektorale tek një tjetër. Në dijeninë tonë, deri tani, prokuroria nuk ka guxuar as të marrë në pyetje personat kryesorë të përfshirë në dosjet penale të krimeve elektorale të viteve 2016 apo 2017, si Edi Rama, Damian Gjiknuri, Ulsi Manja, Pjerin Ndreu etj”, thuhët në letër.

Megjithëse ka sjellë disa argumenta se PPP Arta Marku ka injoruar detyrimet e veta kushtetuese, PD nuk ka hequr dorë nga mundësia për ta vënë zonjën Marku para përgjegjësisë për të vepruar, duke i paraqitur, siç thuhet në letër, “disa indicie publike për krimet e reja zgjedhore.”.

Këto janë 7 pika kyçe që rrëzojnë si të paligjshëm 30 Qershorin.

  1. Moszbatimi i dekreteve të Presidentit me pasojë cenimin e të drejtës kushtetuese të qytetarëve për të zgjedhur.
  2. Regjistrimi i Bindjes Demokratike në kundërshtim me ligjin.

III. Cënimi i të drejtës së opozitës për të marrë pjesë në administrimin e zgjedhjeve

IIII. Mashtrimi dhe manipulimi me të dhënat e pjesëmarrjes në votimet e 30 Qershorit.

  1. Fletët e votimi “kontrabandë” për votimet në Bashkinë e Vaut të Dejës.
  2. Emërimi i komisionerëve në kundërshtim me ligjin nga ana e KQZ.

VII. Krimet zgjedhore në të gjithë territorin: blerja e votave, fshehtësia e votës, presioni në administratë etj.

Të gjitha këto indicie janë të shpjeguara me detaje për shkeljet ligjore të konsumuara gjatë, para dhe pas 30 Qershorit. Ato përfshijnë 9 vepra penale dhe të gjitha bashkë dënohen nga 31-45 vjet burg.

  1. Shpërdorimi i detyrës
  2. Fallsifikimi i materialit zgjedhor dhe rezultateve të zgjedhjeve
  3. Shkelja e fshehtësisë së votimit
  4. Votimi më shumë se 1 herë ose pa u identifikuar
  5. Korrupsioni aktiv në zgjedhje
  6. Përdorimi i funksionit publik për veprimtari politike ose zgjedhore
  7. Kanosja apo dhunimi ndaj pjesëmarrësve në zgjedhje
  8. Marrja ose përdorimi i paligjshëm i dokumenteve të identifikimit

Në letrën për PPP Arta Marku, Sekretari i Përgjithshëm i Partisë Demokratike, Gazment Bardhi, e identifikon atë si një mekanizëm frike që përdoret nga pushteti kundër prokurorëve për të mos hetuar krimet zgjedhore dhe krimet e tjera të qeverisë Rama.

Ju, jeni provuar në mënyrë të vijueshme, si zyrtari publik që, për llogari të pushtetit të shefit tuaj politik, Edi Rama, ushtroni presion të paligjshëm nëpërmjet transferimeve të paligjshme, vlerësimeve negative profesionale për efekt të vettingut, inspektimeve disiplinore etj. në mënyrë që prokurorët t’i binden urdhrave dhe porosive të paligjshme”, vëren në letër zoti Bardhi për t’i shpjeguar PPP Arta Marku përse kërkesa për lejimin e hetimeve po i adresohej asaj.

Në letrën dërguar për dijeni edhe shefes së Misionit të ODIHR-it, Sekretari i Përgjithshëm i Partisë Demokratike, Gazment Bardhi, nxit PPP Arta Marku t’i shërbejë interesit publik dhe axhendës europiane të vendit përpara axhendës së saj personale, duke I dhënë fund pandëshkueshmërisë së atyre që kanë shkatërruar zgjedhjet.

Është koha që ambicia juaj për t’u emëruar Prokurore e Përgjithshme me ndihmën e Edi Ramës të mos pengojë hetimin e krimeve zgjedhore të partisë në pushtet, të korrupsionit të qeverisë së Edi Ramës dhe të krimit të organizuar me lidhje qeveritare”, mbyllet letra e Sekretarit të Përgjithshëm të PD, Gazmet Bardhi./abcnews.al

kolegji-zgjedhor-1280x722.jpg
nev ila15:20 | 20/07/2019

5 ankimime të Bindjes Demokratike do të shqyrtohen të hënën nga Kolegji Zgjedhor. Ndërsa  deri të  martën, trupa gjyqësore do të shpërndajë mandatet e këshilltarëve për 20 bashkitë e para, duke ju hapur rrugë betimit të kryebashkiakëve të parë.

Të hënën, Kolegji Zgjedhor do të zhvillojë 13 seanca gjyqësore për 30 qershorin.

Të parat, do të shqyrtohen 5 ankime të Bindjes Demokratike, e cila kundërshton rezultatin në bashkitë: Selenicë, Shijak, Kurbin, Tiranë dhe Berat. Në këto bashki, partia e Patozit pretendon se kutitë janë mbushur artificialisht dhe votat e saj janë vjedhur gjatë numërimit.

Më pas, do të shqyrtohet dhe ankesa kryebashkiakut në largim të Finiqit, Leonidha Hristo, i cili nuk e pranon humbjen. Më pas, do të nisë shqyrtimi i 7 padive të para të Partisë Socialiste, e cila kërkon që Kolegji zgjedhor, të shpërndajë mandatet për këshillat bashkiakë.

KQZ dështoi të bëjë këtë shpërndarje, pasi ky vendim kërkonte 5 vota në tryezën e KQZ-së, dhe vota kundër e Klement Zgurit pamundësonte miratimin e tabelave.

Në këto kushte, PS, siç ndodhi dhe në 2013 më PD-në, kërkon që këtë provë ta kryejë Kolegji Zgjedhor.

13 bashki të tjera janë caktuar të gjykohen ditën e martë, e për të vazhduar me të tjerat po gjatë kësaj jave.

STAND UP Ky është stacioni i fundit për përmbylljen e këtyre zgjedhjeve. Pas këtij momenti, KQZ do të miratojë tabelën përmbledhëse kombëtare të rezultateve, ndërsa këshillat bashkiakë do të zhvillojnë mbledhjet e tyre të para. Pikërisht në këto mbledhje do të bëjnë betimet dhe kryebashkiakët e rinj, moment që shënon dhe fillimin e mandatit të tyre.

Shqyrtohen ditën e hënë:

 

  1. Bindja Demokratike        SELENICË
  2. Bindja Demokratike        SHIJAK
  3. Bindja Demokratike        KURBIN
  4. Bindja Demokratike        TIRANË
  5. Bindja Demokratike        BERAT
  6. Leonidha Hristo               FINIQ
  7. PS                                        URA VAJGURORE
  8. PS                                        DEVOLL
  9. PS                                        KUÇOVË
  10. PS                                        KONISPOL
  11. PS                                        MEMALIAJ
  12. PS                                        PËRMET
  13. PS                                        POLIÇAN

 

Shqyrtohen ditën e martë:

 

  1. PS                                       FUSHË ARRËZ
  2. PS                                       MIRDITË
  3. PS                                       VAU I DEJËS
  4. PS                                       MAT
  5. PS                                       DELVINË
  6. PS                                       ROSKOVEC
  7. PS                                       KAVAJË
  8. PS                                       PEQIN
  9. PS                                       DROPULL
  10. PS                                       POGRADEC
  11. PS                                       PUSTEC
  12. PS                                       PUKË
  13. PS                                       FINIQ./ABC News Albania 24/7

 

 

KRYEBASHKIAKET-E-TJERE_ABC-M4-T2.mpg_snapshot_00.10-1280x720.jpg
ent ela23:16 | 17/07/2019

Pavarësisht këtyre dy vendimeve të gjykatave në Durrës dhe Tiranë, 29 gjyqtarë të tjerë në mbarë vendin kanë konfirmuar kryebashkiakët socialistë të dalë nga zgjedhjet e 30 qershorit.

29 gjyqtarë të tjerë të dhomave civile në rrethe të ndryshme të vendit, kanë vepruar në mënyrë të unifikuar, duke njohur 29 kryetarë bashkish të dalë nga zgjedhjet e 30 qershorit.

Ndryshe nga kolegët e tyre në Durrës apo Tiranë, gjyqtarët e tjerë nuk kanë shprehur moskompetencë për çështjet, si dhe i kanë konsideruar zgjedhjet të ligjshme, edhe në ato bashki ku socialistët kanë pasur përballë kandidatë nga Bindja Demokratike.

Aktualisht veç Sakos dhe Kajmakut që janë në betejë të koklavitur ligjore, 30 fitues të tjerë socialistë janë në proces përgatitor tek gjykatat.

Një pjesë kanë aplikuar për t’iu njohur fitorja, siç është dhe kryebashkiaku i Tiranes Erjon Veliaj, ndërsa një pjesë, pret që të përfundojnë çështjet ankimore pranë Kolegjit Zgjedhor.

Paralelisht, që fillojnë detyrën, kryetarët e konfirmuar nga gjykatat duhet të bëjnë betimin përpara këshillave bashkikaë. Meqë KQZ nuk i bën dot 5 vota për shpërndarjen e mandateve të këshilltarëvë, prej votës kunder të Klement Zgurit, PS i ka çuar çështjet në Kolegj.

Shqyrtimi i tyre nis të hënën.

Janë konfirmuar deri sot nga gjykatat e rretheve, kryetarët e rinj të bashkive:

Kryebashkiakët e konfirmuar nga gjykatat e rretheve:

  1. Tonin Marina, Malësi e Madhe
  2. Gjon Gjonaj, Pukë
  3. Rexhë Byberi, Tropojë
  4. Liman Morina, Has,
  5. Safet Gjici, Kukës
  6. Agron Malaj, Mat
  7. Ilmi Hoxha, Klos,
  8. Elton Arbana, Shijak
  9. Redi Krali, Kavajë
  10. Haxhi Memolla, Rrogozhinë
  11. Lorenc Tosku, Peqin,
  12. Andis Salla, Cërrik
  13. Gentjan Llatja, Elbasan,
  14. Kastriot Gurra, Librazhd
  15. Fatos Tushe, Lushnjë
  16. Fredi Kokoneshi, Divjakë
  17. Armando Subashi, Fier
  18. Rajmonda Balili. Patos,
  19. Majlinda Bufi, Roskovec
  20. Qerim Ismaili, Mallakastër
  21. Juljana Memaj, Ura Vajgurore
  22. Gezim Topciu, Maliq
  23. Pali Kolefski, Pustec
  24. Eduart Duro, Devoll
  25. Erion Isai, Kolonje
  26. Alma Hoxha, Përmet
  27. Gjolek Guci, Memaliaj
  28. Termet Peci, Tepelenë
  29. Flamur Golemi, Gjirokastër

Është refuzuar nga gjyqtarja Mimoza Margjeka mandati i Valbona Sakos, për Bashkinë e Durrësit me argumentin e regjistrimit të Partisë Bindja Demokratike tej afatit ligjor dhe është refuzuar të marrë vendim nga gjykata civile e Tiranës për kryetarin e Bashkise Vorë, Agim Kajmaku me arsyetimin se këtë vendim duhet ta japë gjykata administrative dhe jo ajo civile.

Bashkitë e tjera janë në pritje të ankimimeve dhe caktimin e gjyqtarëve për marrjen e vendimeve të konfirmimit në detyrë të kryetarëve të rinj. /ABC News Albania 24/7

 

basha-5.jpg
ad min22:00 | 16/07/2019

Kreu i PD-së, Lulzim Basha ka reaguar edhe njëherë në lidhje me 30 Qershorin, për të cilin tha se mesazhi ishte i qartë: Rama ik.

Pjesë nga fjala e Kryetarit Basha me struktura të PD në Urën Vajgurore dhe Kuçovë

“Ajo që ka ndodhur në 30 Qershor, nuk ka ndodhur kurrë në 3 dekada. Braktisja dhe refuzimi i Edi Ramës ka qenë në proporcione masive. Askush nuk është refuzuar si Edi Rama dhe regjimi i tij.
Në ketë refuzim gjejnë shprehje disa prej problemeve kryesore, për të cilat jemi angazhuar në këtë aksion të paprecedentë politik.

1. Vetëdijësim i shqiptarëve se 30 Qershori ishte ditë për oligarkët, banditët, për shërbetoret e Edi Ramës, por jo një ditë për qytetarët e zakonshëm. Ramën e braktisi edhe baza socialiste, sepse nuk i shërbente as PS ky proces.
2. Braktisja dhe refuzimi i Edi Ramës erdhi për shkak të gjendjes së mjeruar ekonomike, thellimit të varfërimit të shqiptarëve
3. Roli përcaktues i opozitës, aksioni politik. Pa vendimet e mëdha që morëm, duke nisur me djegien e mandatave, as vetëdijësimi i shqiptarëve nuk do të rritej, as kurajo nuk do të ishte në këto nivele. Sepse më 30 qershor është bërë protesta më e madhe e të gjithë protestave. Nuk u bë në një shesh, por u bë në të gjithë Shqipërinë njëkohësisht.
E vetmja votë e pastër e 30 qershorit është vota e atyre që nuk dolën. Mesazhi është ai që është bërë refren deri edhe për fëmijët: Rama ik.
Raporti i ODIHR është vula më e zezë që kanë marrë ndonjëherë zgjedhjet në Shqipëri dhe Ballkan.
30 qershori nuk mund të prodhojë asnjë pasojë juridike përveçse ndaj atyre që kanë shpërdorur burimet shtetërore në një proces farsë, duke nisur nga paratë që kanë hedhur në një proces të pligjshëm.
Po të kishim një prokuror të ndershëm dhe me integritet, sot, të gjithë këta persona, duke nisur me Edi Ramën, me KQZ, me ministritë e përfshira, do të ishin nën hetim për shpërdorim detyre dhe shpërdorim financiar”./abcnews.al

klosi-velipoje-1280x716.jpg
nev ila15:47 | 16/07/2019

Përplasjet politike, fushata dhe zgjedhjet e 30 qershorit kanë ndikuar negativisht në përgatitjen dhe menaxhimin e sezonit turistik, tha ministri Blendi Klosi nga Velipoja. Ai deklaroi në mbledhjen e Task Forcës se ende nuk janë lidhur kontratat me përdoruesit e plazhit nga Bashkia Shkodër.

Në mbledhjen e Task Forcës për menaxhimin e turizmit në Velipojë ministri Blendi Klosi ka deklaruar se zgjedhjet e 30 qershorit kanë patur një impakt negativ në përgatitjet për sezonin turistik.

“Jemi më keq se një vit më parë“,- tha Klosi duke renditur disa nga problematikat e konstatuara në terren.

“ Janë 29 të evidentuara prej tyre 17 janë të regjistruara në tatime, por pa lidhur kontratë me Bashkinë e Shkodrës, ndërsa në gjithë plazhin janë vetëm 10 kulla vrojtime”, tha Klosi.

Në të njëjtën linjë kanë qenë dhe ministrat Balluku dhe Cakaj.

Në mbledhje morën pjese përfaqësues të Prefekturës Shkodër, Bashkisë Shkodër dhe institucioneve qendrore në nivel vendor./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono