30 qershor

edi-rama-4.jpg
G. P.18:00 | 25/06/2019

Sipas kryeministrit Rama, vendimet tashmë i merr populli duke qenë se marrëveshja e 2017-s nuk vlejti për opozitën. Gjatë një takimi elektoral në Tropojë, kreu i qeverisë theksoi se nuk ka pse i lutet më Bashës për një marrëveshje.

“Ça do bëjmë ne, sa herë që afrohen zgjedhjet do të marrim me të mirë këta? Boll iu luta unë Zhulietës dy vjet më parë. Nuk kam asnjë arsye t’i lutem më dhe mbi të gjitha përderisa ajo marrëveshje nuk vlejti për t’i sjellë në vete këta tani ka ardhur koha që ta marrë populli në dorë këtë punë dhe në datë 30 Qershor populli thotë kush do të paraqitet përpara nesh për të marrë gjykimin tonë mirë se të vijë. Kush nuk do rruga e mbarë dhe rrugëve le të ngelin sepse nuk ka asnjë problem.  Ju jap fjalën që nuk do ndodhë asgjë në zgjedhje. Mund të ketë fenomene sporadike në zgjedhje këtu e aty, se tani budallenj që shkojnë bëjnë burg për Lulin dhe fallxhore, ça të them unë”, u shpreh Rama.

Ndërkohë më tej, Rama paralajmëroi se të gjithë ata që do të shkelin ligjin do të përballen me drejtësinë.

“Çdo ditë shkojnë nëpër burgje dhe këta shkojnë në shtëpi. Ishte njëri nga këta që i kishte çu me djeg shkollën në Shkodër, dhe kur shkoi atje tha “unë vajta ti qetësoj”. Ky i mori i çoi atje, i la në burg dhe u qetësua në shtëpi vetë. Këta janë këta. Megjithatë kush do të shkojë pas tyre ta dijë që do ketë vetëm përballje me ligjin”, tha kreu i qeverisë.  /abcnews.al

lleshaj-fevzo-933x445.jpg
nev ila22:43 | 24/06/2019

Ministri i Brendshëm, Sandër Lleshaj thotë se policia ka informacione që mund të ketë tentativa për të shkaktuar probleme më 30 Qershor, megjithatë ai mohon që vendi rrezikon të shkojë në një përplasje civile. Ai thotë se problemet që mund ketë janë ato të rendit publik. I ftuar mbrëmjen e kësaj të hëne në emisionin “Opinion”, Lleshaj tha se mazhoranca është e detyruar nga Kushtetuta për të shkuar në zgjedhje.

Zoti Lleshaj ju pra jeni të vendosur për të shkuar në zgjedhje më 30 Qershor?  

“Ne nuk jemi të vendosur, ne jemi të detyruar për të shkuar në zgjedhje, ne jemi të detyruar prej Kushtetutës. Kush mund të ishte alternative…”

Po kush ju detyron ju zoti Lleshaj të shkoni në një përplasje, që rrezikon të jetë edhe një përplasje civile?

“Jo nuk rrezikon të ketë përplasje civile, sepse nuk ka një konflikt civil në Shqipëri”.

A keni ju informacione të klasifikuara si ministri, si polici, nga shërbimet e specializuara që mund të ketë probleme më 30 Qershor?

“Probleme mund të ketë më datë 30 Qershor. Probleme të nivelit të rendit publik, probleme të kriminalitetit, por jo probleme të konfliktit civil.

Keni informacione apo hamendje?

“Kemi dhe informacione që mund të ketë tentativa për të shkaktuar probleme në nivelin kriminal të çështjes, por jo në nivelin civil.

Çdo me thënë në nivelin kriminal të çështjes?

“Po grupe të caktuara kriminale, çdo ditë kemi probleme kriminale në Shqipëri. Grupe kriminale ose individë që zhvillojnë veprimtari kriminale ka shumë. Ata që dalin përballë ligjit janë kriminelë”./tvklan.al

mirela-kumbaro-patenta.jpg
G. P.18:50 | 24/06/2019

Partia Socialiste do të vazhdojë fushatën e saj elektorale deri ditën e premte ashtu siç e parashikon legjislacioni. Ish-ministrja e Kulturës, Mirela Kumbaro, shpjegoi gjatë rubrikës “Mbrëmje ABC” se deri atë ditë PS do të jetë në takim me njerëzit, ndërsa të shtunën do të ketë heshtje zgjedhore. Për sa i përket ditës së votimeve, deputetja tha se pret që votuesit të shkojnë “në kutitë e votimit me dashuri dhe qetësi”.

Shprehje kjo që është përdorur më parë nga Presidenti Meta dhe që krijoi të qeshura mes gazetares Mirela Milori dhe Kumbaros pasi kjo e fundit deklaroi se nuk është në garë për të drejtën e autorit.

Mirela Milori: Fushata vazhdon do të jetë deri ditën e premte deri kur do jetë dhe mitingu përmbyllës?

Mirela Kumbaro: Afatet zgjedhore dhe afatet e fushatave i përcakton shumë qartë legjislacioni zgjedhor. Deri ditën e premte të gjithë kandidatët jo vetëm të PS-së, por edhe kandidatët e subjekteve të tjera që janë regjistruar. Ne, PS është 24 orë në takim me njerëzit, derë më derë, në lagje, në fshatra, në ara ku mbillet e korret, deri ditën e premte. Dita e shtunë dihet që është heshtje zgjedhore dhe dita e diel të gjithë në kutinë e votimit me dashuri dhe qetësi.

Mirela Milori: E huazuat këtë me dashuri dhe qetësi ka qenë zoti Meta që e ka thënë i pari.

Mirela Kumbaro: Nuk jam në garë për çështjen e të drejtave të autorit.

Mirela Milori: Ishte fusha e juaj, duhet të kishit problematike me të drejtën e autorit, vazhdon të ketë probleme.

Mirela Kumbaro: Nuk është patentë e regjistruar kjo!/abcnews.al

edi-rama.jpg
G. P.17:43 | 22/06/2019

Sipas kryeministrit Edi Rama zgjedhjet do të zhvillohen më 30 Qershor. Gjatë takimit elektoral në Bashkinë e Finiqit, ai deklaroi se dita e zgjedhjeve do të jetë një ditë normale. Edhe nëse do të ketë shfaqje sporadike, për kryeministrin ato do të jenë të pafuqishme për të bllokuar zgjedhjet.

“Përpjekja për t’i rënë ndesh zgjedhjeve, për të krijuar konflikt, për të rikthyer Shqipërinë mbrapsht nuk ka asnjë shans sepse nuk ka popull. Patjetër që ka një masë të konsiderueshme të popullit që janë demokratë, që nuk e duan këtë qeveri që duan që unë të iki një orë e më parë, por ata nuk janë mbështetës të rrumpallës, kaosit dhe të dhunës, nuk ka as sesi të jenë.

Kush i fryn zjarrit të dhunës është i destinuar të tretet në atë zjarr. Nuk ka shans që në Shqipërinë e vitit 2019 të fitojë dhuna, të fitojë kaosi, të fitojnë qorrat që nuk kanë asnjë ideal, asnjë ide, nuk kanë asgjë për të ofruar përveç vetes dhe hallit të tyre të madh të kthyer në një platformë dhune. Në 30 Qershor Shqipëria do të bëjë zgjedhje dhe në një pjesë të territorit kemi nga një kandidat jo se nuk kemi dashur ne të mos kemi kandidatë tjetër po kandidatët e tjerë nuk janë paraqitur. Është shumë e rëndësishme që populli i bashkuar t’i thotë jo politikës së dhunës, së rrëmujës, politikë s ë verbër dhe të dëshpëruara të urrejtjes, sharjeve, shpifjeve dhe baltës.

Jam i bindur se 30 Qershori do të jetë një ditë normale. Edhe sikur të ketë shfaqje sporadike, edhe sikur të ketë orvatje të dëshpëruara ato do të jenë të pafuqishme për ta bllokuar 30 Qershorin dhe për ta kthyer nga një ditë ku duhet të flasë populli në një ditë derdimenësh, të verbërish që kanë humbur busullën nën drejtimin e katër personave të cilët hallin e tyre me drejtësinë duan ta transferojnë tek populli si një hall i madh të Europës me Shqipërinë. Nuk duan në asnjë mënyrë që të çelen negociatat me BE-në. Nuk duan që Shqipëria të ulet në tavolinë dhe Shqipëria të japë llogari për drejtësinë. Kjo është çelja e negociatave”, tha Rama./abcnews.al

Rama-rel.jpg
nev ila13:22 | 21/06/2019

Në një intervistë për Radion Evropa e Lirë, kryeministri i Shqipërisë, Edi Rama tha se Shqipëria do të shkojë në zgjedhje me 30 qershor, edhe pse opozita dhe presidenti Ilir Meta thonë se mbajtja e tyre është anuluar.

Kryeministri Rama, gjatë intervistës, flet edhe për përgjimet ku partia e tij del se është e përfshirë në manipulim të procesit zgjedhor, flet për mungesën e Gjykatës Kushtetuese në vend dhe procesin e hapjes së negociatave për anëtarësimin e Shqipërisë në Bashkimin Evropian.

Rama nuk e fsheh drojën se kriza politike mund ta pengojë këtë proces, por duke iu referuar protestave dhe kritikave të opozitës, thotë se “demokracia nuk do të negociohet”./REL

POLITIKA-NE-ABCNEWS-ILIR-META-E-EDI-RAMA-LUFTE-ME-INSTITUCIONE-15.-06.2019.mpg_snapshot_02.00-1280x720.jpg
ent ela16:39 | 19/06/2019

Presidenti i Republikës Ilir Meta, përmes një letre ka informuar drejtuesit e OSBE-ODHIR se në Shqipëri më 30 qershor nuk do të ketë zgjedhje. Sipas Kreut të Shtetit çdo proces që zhvillohet pa dekret të tij, është nul.

Anulimin e zgjedhjeve Presidenti i Republikës Ilir Meta ja ka bërë të ditur dhe drejtuesve më të lartë të OSBE-ODHIR-it. Përmes kësaj letre që mban datën 19 qershor Kryetari i Shtetit i shkruan Ministrit për çështjet e Jashtme dhe ato  Evropiane të Sllovakisë, njëkohësisht kryetar i radhës i OSBE, Miroslav Lajčák dhe Drejtueses së ODIHR Gísladóttir se ka zhdekretuar vendoret e 30 qershorit.

“Sipas legjislacionit në fuqi, dekreti me nr 1199  i datës 10.06.2019 është në fuqi dhe është i publikuar në fletoren zyrtare të Republikës së Shqipërisë më datën 11 qershor.”

Zgjedhjet që mbahen pa dekretin e Presidentit thekson Meta janë të pavlefshme ashtu si dhe përpjekjet e Kryeministrit për të bllokuar zbatimin e vendimit të Kreut të Shtetit.

“Dekreti është ligjor dhe duhet të zbatohet nga të gjithë institucionet perfshirë dhe administratën e procesit zgjedhor në Shqipëri, përfshi dhe Komisionin Qendror të Zgjedhjeve. Për këtë arsye procesi zgjedhor që mund të mbahet në dhunim të dekretit të Presidentit do të jetë nul dhe i pavlefshëm dhe përpjekjet e kryeministrit të Shqipërisë për të injoruar dhe bllokuar implementimin e dekretit të Presidentit të Republikës janë totalisht të paligjshme dhe përkeqësojnë krizën në Shqipëri”.

Me këtë letër Presidenti i Republikës ka vënë në dijeni dhe Presidentin dhe Sekretarin e Asamblesë Parlametare të OSBE-së.

 

/ABC News Albania 24/7

 

drilona.jpg
nev ila14:25 | 18/06/2019

Komisioni Qendror i Zgjedhjeve ju kërkon bashkive të drejtuara nga opozitarët të mos bllokojnë procesin zgjedhor, pasi janë duke kryer vepra penale. Zëdhënësja e KQZ kërkoi nga bashkitë të sigurojnë ambientet zgjedhore, ndërsa Klement Zguri tha se këto deklarime nuk e përfaqësojnë atë.

Komisioni Qendror i Zgjedhjeve kërkon nga bashkitë që drejtohen nga opozita, të mos cënohen ambientet që janë vendosur në dispozicion të votimeve. Zëdhënësja e KQZ-se tha se ky institucion refuzon kërkesat e këtyre bashkive për të liruar ambientet.

KQZ ju kujton kryebashkiakëve apo funksionarëve të tjerë ligjore se veprimet e tyre pengojnë zgjedhjet dhe përbëjnë vepër penale.

Ky konflikt politik që ka vendosur tashmë përballë jo vetëm opozitën me mazhorancën, por edhe presidentin me kryeministrin, por reflektohet edhe në KQZ. Kryetari Klement Zguri, i vetmi i propozuar nga opozita, nuk merr pjesë në mbledhje. Ai tha sërish se deklarimet e zëdhënëses së KQZ nuk përfaqësojnë qëndrimet e tij, por vetëm të 4 anëtarëve të tjerë të komisionit.

Ndryshe nga këta anëtarë të propozuar nga PS, Zguri argumenton se pas dekretit të dytë të Metës dhe botimit të tij në Fletoren Zyrtare 30 Qershori është anuluar dhe puna në KQZ duhet ndërprerë./ABC News Albania 24/7

edi-rama-maliq-1280x533.jpg
nev ila12:52 | 16/06/2019

Kanë mbetur 15 ditë deri në zgjedhjet vendore dhe me gjithë anulimin e tyre nga presidenti, kryeministri Rama nuk ka asnjë hezitim.

Më 30 Qershor nuk do të vendoset thjesht se kush do të drejtojë bashkitë por se cila do të jetë Shqipëria e 30 viteve të ardhshme. Para banorëve të Maliqit, Rama u dha një përgjigje edhe të gjithë atyre që u druhen trazirave më 30 qershor.

“Ata bëjnë çdo përpjekje që të fusin frikën, të fusin sekëlldinë te njerëzit e zakonshëm të këtij vendi, që të krijojnë idenë se këtu do të bëhet nami. Ku janë këtu kushtet për të bërë 97-n? Zero. Nuk ka asnjë arsye që të ketë asnjë gjakderdhje, por nuk ka asnjë arsye të ketë asnjë konflikt. Ka vetëm llumderdhje nga filxhani i fallxhores”.

Presidentin Ilir Meta, Rama e quan një nga organizatorët e planit për prishjen e zgjedhjeve, ndërsa kryetarin demokrat e quan kukull dhe dembel.

“Lulzimi hapni vendin se do hidhem, u hodh Ilir Meta. Fakti që u hodh Ilir Meta zbuloi gjithë këtë plan destruktiv, ideatorët dhe frymëzuesit e të cilit janë Sali Berisha dhe Ilir Meta, ndërkohë që Lulzimi është një kukull. Unë e njoh, është dembel, është llafazan, është dhe gjumash”.

Kryeministri përsëriti se shkaku pse Lulzim Basha nuk do zgjedhje, është frika nga Vettingu, por premton se reformën në drejtësi do ta çojë deri në fund.

“Kanë ikur nga parlamenti, kanë ikur nga zgjedhjet për të penguar Shqipërinë sepse Vettingun nuk e penguan dot. Vettingu ka filluar duke pastruar dita-ditës pallatin e drejtësisë nga gjykatës dhe prokurorë që falë lidhjeve të tyre me politikanët kanë mbajtur peng drejtësinë 30 vjet. Vettingu do të shkojë deri në fund. Kush do pengojë qoftë edhe një votues të vetëm, kush do hedhë qoftë edhe një kapsollë të vetme, kush do bëjë budallain qoftë edhe për një sekond të vetëm do të dënohet nga ligji këtu dhe do shkojë brenda sipas ligjit këtu dhe kur të dalë nga brenda atje nuk do dali dot jashtë nga këtu”.

Rama u kërkoi të gjithë banorëve të Maliqit që të votojnë për çuarjen përpara të projekteve nga kandidati socialist, ose më e pakta të distancohen nga ata që nuk e duan integrimin dhe Shqipërinë.

kreu-osbeodhir.jpg
nev ila20:05 | 14/06/2019

OSBE/ODIHR ka nxjerrë një raport paraprak për zgjedhjet e 30 qershorit. Në përshkrimin që i bëjnë situatës, nënvizohet se mjedisi politik mbetet i polarizuar dhe se diskursi politik është dominuar përgjithësisht nga pyetja nëse mund të mbahen zgjedhje pa pjesëmarrjen e partive opozitare kryesore.

Zgjedhjet për kryetarë bashkie dhe anëtarë të këshillave bashkiakë në të gjitha 61 bashkitë po mbahen në kushtet e një ndarjeje të thellë politike mes Partisë Socialiste (PS) në pushtet dhe opozitës ku kjo e fundit është tërhequr nga Parlamenti në muajin shkurt.

Është ky përshkrimi që i bën OSBE/ ODIHR në raportin paraprak për zgjedhjet lokale të 30 qershorit. Në këtë raport nënvizohet se në 31 bashki, kandidatët e PS-së për kryetarë bashkie garojnë pa kundërshtarë. Kodi Zgjedhor nuk përmban asnjë rregullim specifik për zgjedhje pa kundërshtarë.

Opozita u tërhoq në dhjetor 2018 nga procesi i reformës zgjedhore që rifilloi pas zgjedhjeve parlamentare të 2017-ës thuhet në raportin e OSBE/ODIHR.

Më 10 qershor, Presidenti dekretoi shfuqizimin e dekretit për caktimin e datës së zgjedhjeve. Më 11 qershor, PS-ja inicioi një debat në Parlament në lidhje me vlefshmërinë e dekretit që shfuqizonte dekretin për caktimin e datës së zgjedhjeve dhe shkarkimin e mundshëm të Presidentit.

Mjedisi politik mbetet i polarizuar. Diskursi politik është dominuar përgjithësisht nga pyetja nëse mund të mbahen zgjedhje pa pjesëmarrjen e partive opozitare kryesore. Gjuha e përdorur nga kundërshtarët politikë në mitingje, në mediat sociale dhe në median e shkruar dhe elektronike është shpesh e ndezur dhe e mbushur me akuza dhe kundërakuza./ABC News Albania 24/7

edi-rama-divjake.jpg
nev ila19:21 | 12/06/2019

Kryeministri Rama gjatë takimit në Divjakë ditën e sotme, foli edhe për situatën e krijuar pas dekretit të presidentit Meta për anullimin e datës së zgjedhjeve. Sipas kryeministrit shqetësimi i Metës ka lidhje me reformën në drejtësi pasi pas celjes së negociatave reforma do të përshkallëzohet. Po ashtu Rama tha se një 97’të dytë vendi nuk do të ketë. sipas Ramës akti i fundit i Ilir Metës tregoi vërtetë planin e tyre.

Kam vendosur të bëj paqe dhe të mos flas për atë që e quaj kazan, ashtu ishte dhe do mbetet, cdo natë përpiqen të tmerrojnë njerëzit se do të ndodhë një ’97 e dytë, por pse do të ndodhë? Ata që e shkaktuan 1997 sot janë kaq të dëshpëruar dhe i gënjen mendja se mund të tundin fantazmën dhe të tmerrojnë dynjanë. Cilit popull i janë djegur të gjitha kursimet e jetës pasi është mashtruar me piramida? Kush është në rrugë në protesta popullore për të kërkuar djersën dhe gjakun? Ata që e shkaktuan 97 sot janë të dëshpëruar se mund të tundin para popullit fantazmën e 97. Saliu e ka treguar që është i gatshëm ta çojë deri në zjarrvënie politikën. Sa i takon shqetësimit të madhe të Metës do të përsërisja një këshillë që i dha Spiropali, (Mamica) ku i tha ke hall të shpëtosh Shqipërinë? Bind Monikën që të mos hakërrehet dhe bind Saliun për Lulin. Janë katër veta, dy kryesorët, Ilir dhe Saliu, Monika fallxhorja me artistin dhe e gjitha kjo një llum në filxhanin e fallxhores. Një përpjekje për të penguar Reformën në Drejtësi. Kam informacion thotë Iliri nga agjencitë ligjzbatuese, dmth nga filxhani i Monikës, ku duket një 30-të kokë poshtë. Këto janë agjencitë ligjzbatuese të Presidentit” tha ai.

Paniku i përshkallëzimit të reformës në drejtësi për çeljen e negociatave. Akti i fundit i Ilir Metës e ka zbardhur planin dhe na ka lënë të kuptojmë se ku “fle lepuri”. Ne kemi bërë shumë por jo aq shumë sa kemi dashur, e vërteta është se jo gjithçka që kemi bërë e kemi bërë mirë, ecuria e qeverisjes jo në ritmin e duhur, kemi patur momente të vështira. Ne nuk jemi të rënë nga qielli por padiskutim më të mirë se ne nuk ka patur dhe nuk ka për të patur. Në 30 qershor nuk do shkojmë thjesht për zgjedhjen e kryteraëve të bashkisë por për shkak të atij plani në dëm të shqipërisë, populli duhet të vendosi ndaljen e 30 vjetëve të shkuara me 30 vjetët e ardhshme, asnjë politikan nuk mund të marrë përsipër të zhbëjë të drejtën e popullit për të zgjedhur. Në 30 qershor populli do u japë atyre që janë mësuar keq atë që meritojnë. Përfundimisht ne duhet të vendosim që pas 30 qershorit ata që fitojnë zgjedhjet duhet të rrinë në detyrë. Kërcënimet se do bëhet nami duhet të mbarojnë njëherë e mirë. Është e drejta e tyre të vrasin veten por Shqipërinë me vete nuk mund ta marrin kurrë.

Ilir Meta ka kryer një akt të panjohur në historinë e qeverisjes së botës, firmos dhe ç’firmos. Kjo do të mbetet vetëm një vepër e shëmtuar dhe e papërgjegjshme dhe një vepër që s’mund të tolerohet. Ai e ka humbur të drejtën të qëndrojë në zyrën e presidentit të republikës. Për sa kohë që parlamenti ka të drejtën dhe ka detyrën të reagojë në emër të sovranit nëse presidenti çmendet. Nuk jam unë problemi i tyre, jam thjesht pengesa që ata nuk arrijnë të varrosin reformën në drejtësi”, deklaroi Rama./abcnews.al

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono