Dita vendimtare për Katalonjën


18:22 | 20/12/2017

Nesër do të mbahen zgjedhjet e parakohëshme në Katalonjë që u thirrën pasi Spanja mori kontrollin e plotë të rajonit autonom. Sondazhet parashikojnë se këto zgjedhje mund të fitohen nga partia e ish-zëvendëspresidentit të Katalonjës, Oriol Junkeras.

5.5 milionë qytetarë janë thirrur ditën e enjte në votime për të zgjedhur 135 deputetët e rinj të parlamentit rajonal të Barcelonës. Të dhënat janë bërë publike nga i dërguari i qeverisë spanjolle në Katalonjë, Enrik Mijo. Në këto zgjedhje marrin pjesë 38 lista.
Ndërkohë, i gjithë fronti separatist nuk arriti të përmbyllë bisedimet ndërpartiake me një marrëveshje për një listë të përbashkët. 2680 vendvotimet do të jenë të hapura nga ora 9 e mëngjesit deri në 20:00 të darkës.

Këto zgjedhje të parakohshme u thirrën nga kryeministri spanjoll Mariano Rahoi, pas shpalljes së republikës së pavarur të Katalonjës në 27 tetor. Shefi i qeverisë së Madridit gjithashtu shkarkoi Presidentin e rajonit autonom, Karles Puxhdemon dhe qeverinë e tij. Ndërsa parlamenti u shpërbë.
Tetëmbëdhjetë kandidatë separatistë, që marrin pjesë në zgjedhjet e 21 dhjetorit, akuzohen për ”rebelim” dhe “kryengritje” për realizimin e projektit politik të pavarësisë. Ndër to bën pjesë edhe Puxhdemon, i cili u detyrua të arratisej për në Belgjikë pas shpalljes së pavarësisë nga Spanja bashkë me 4 ministra të tij. Fillimisht kundër tij u lëshua një mandat europian arresti, i cili u tërhoq më pas nga drejtësia e Madridit.

Sipas sondazheve, ish-zëvendëspresidenti i Katalonjës, Oriol Junkeras, njëkohësisht dhe kryetar i partisë së Majtë Republikane të Katalonjës, mund të jetë fituesi i këtyre zgjedhjeve të parakohshme. Ai bashkë me 3 politikanë të tjerë separatistë ndodhen në burg në Madrid për shkak të organizimit të referendumit për pavarësi dhe për shpalljen e Katalonjës republikë./abcnews.al



Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.


Kontakt

Telefono