Brazili eleminon Argjentinën

12:06 | 03/07/2019

Brazili mundi Argjentinën dhe u kualifikua në finalen e Kupës së Amerikës, por pati shumë polemika pas ndeshjes. Lionel Mesi akuzoi gjyqtarin se vendosi fatin e ndeshjes.

Futbolli dihet, fitohet nga ata që shënojnë golat, jo nga ata që godasin shtyllat. Ishte Brazili që realizoi dy rrjeta, ndaj dy shtyllave të goditura nga Argjentina, duke kaluar rivalin e përjetshëm e duke mbajtur gjallë shpresën për trofe në Kupën e Amerikës.

Përfundoi 2-0 gjysmëfinalja në stadiumin e Belo Horizontes, me tifozët vendas që u lumturuan për finalen e arritur, dhe me Lionel Mesin që regjistroi një tjetër dështim me kombëtaren.

Ashtu siç parashikohej, brazilianët ishin pak më lart, duke pasur autorë golash Gabriel Jesus-in dhe Roberto Firminon, pra sulmuesit që luajnë në Angli me Manchester City dhe Liverpool.

Aguero e Mesi iu afruan golit për Argjentinën, por u ndalën pikërisht nga trarët e portës së Alisonit.

“Ishte një fitore shumë e vështirë, – deklaroi trajneri i brazilianëve, Tite, – shënuam gol, dhe vuajtëm presionin e Argjentinës, duke qenë efikasë dhe vendimtarë. Mesi është një alien dhe jam i lumtur që arritëm të mbulonim një lojtar të tillë, që meriton gjithë adhurimin që kanë tifozët për të. U desh të ndryshonim strukturën e ekipit për t’ia dalë”.

Vetë Mesi ishte i tërbuar me gjyqtarin, duke pretenduar penallti, pas episodeve që ndodhën në zonën e rreptësisë së Brazilit, me Agueron dhe Otamendin.

“Ishte arbitri që na nxorri nga loja me vendimet e tij të çmendura, – u shpreh lojtari më i mirë i botës, – meritonim ta fitonim ndeshjen, por nuk na lejuan. Përse gjyqtari nuk u këshillua me VAR-in për rastet e penalltive? Brazili nuk ishte më I mirë se ne”.

Ndeshja ishte tepër e ashpër, në prani të 56 000 spektatorëve, siç pritej nga duele të tillë të Kupës së Amerikës, ndërsa u morën plot 7 kartonë të verdhë, por jo të kuq.

Pesë lojtarë të paralajmëruar ishin argjentinas: Taliafiko, Akunja, Fojth, Lautaro Martinez, Aguero, ndërsa dy brazilianë. Argjentina luftoi shumë, sidomos në pjesën e dytë, por nuk pati edhe fat.

Ja edhe jehona e gazetave.

Në Brazil, “O Dia”: Brazili hedh tej vëllezërit! Gabriel Zhezus mrekullon dhe udhëheq fitoren e seleksionit brazilian ndaj Argjentinës, 2-0 në Mineirao!

“Estado de Minas”: Lamtumirë vëllezër! Me paraqitjen vendimtare të Gabriel Zhezusit, Brazili mund Argjentinën dhe është në finale! Ja si e përjetoi Mesi humbjen ndaj “Selesaos”!

“Tribuna”: Lamtumirë Mesi! Në mbrëmjen ku mbretëroi Dani Alvesh, Leo nuk mundi të ndihmonte kombëtaren e tij!

Në Argjentinë, “Klarin”: Brazili ndali Argjentinën, me lojë të thjeshtë dhe praktike! Kombëtarja luajti ndeshjen më të mirë, por nuk ia doli. Mesi shkëlqeu dhe Seleksioni pati shanset e tij, por nuk mjaftoi!

“La Gaseta”: Edhe një herë me duart bosh! Duke luajtur në mënyrë dinjitoze dhe pa e merituar humbjen, Seleksioni u eleminua në gjysmëfinale të Kupës! Rezultati 2-0 ishte i ekzagjeruar, por Brazili u tregua praktik! Mesi vazhdon të mos fitojë me kombëtaren!

Mesit, tashmë, do t’i duhet të presë moshën 34-vjeçare për të synuar titullin me kombëtaren, në Botëror./ABC News Albania 24/7


Lini koment

E-maili nuk do te publikohet. Duhen plotesuar *


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F




Kontakt

Telefono