Blog

Bring to the table win-win survival strategies to ensure proactive domination. At the end of the day, going forward, a new normal that has evolved from generation.
MBULIM-BARDHI-PER-KAJMAKUN.mpg_snapshot_00.08-1280x720.jpg
ent ela10:10 | 22/08/2019

Pas kandidatit të Shkodrës, Valdrin Pjetrit, Partia Demokratike ka gjetur prova për një tjetër kandidat me të kaluar kriminale. Sekretari i Përgjithshëm i PD, Gazment Bardhi i kërkoi Prokurorisë së Përgjithshme dhe sektorit të Dekriminalizimit të verifikojnë pastërtinë e figurës për kryebashkiakun socialist të Vorës, Agim Kajmaku. Sipas numrit dy të demokratëve, Kajmaku është subjekt i ligjit të dekriminalizimit dhe duhet ti ndërpritet mandati.

“Ai dyshhet se ka qenë i arrestuar/ndaluar në Greqi dhe, më pas, ndaj tij është marrë masa e dënimit dhe dëbimit nga autoritetet përgjegjëse greke” – thuhet në kërkesën e Sekretarit të Përgjithshëm të PD. Sipas Bardhit, kryebashkiaku socialist i Vorës Agim Kajmaku që në Greqi ka mbajtur identitetin Jorgo Toro nga periudha 2004 – 2016 nuk ka udhëtuar në asnjë rast të vetëm në drejtim të Greqisë, ndërkohë që në formularin e dekriminalizimit ka deklaruar se ka jetuar për 5 vite në këtë shtet./ABC News Albania 24/7

boris.jpg
ent ela10:00 | 22/08/2019

Në Berlin kryeministri britanik, Boris Johnson refuzohet. Kancelarja Merkel nuk do të ringeociojë Brexit-in. Ai këtë me sa duket e di, e përdor një fjali të famshme të Merkelit për të kaluar situatën.

Ky qenka burri për të cilin është folur kaq shumë këto ditë në Berlin. Boris Johnson. Gjërat e para zhvillohen si në çdo vizitë kryeministri të huaj. Nderimin ushtarak Johnson dhe kancelarja gjermane Angela Merkel, e ndjekin ulur. Kjo është duke ndodhur prej disa javësh në Berlin, që kur Merkeli pati kaluar dridhje të mëdha gjatë pritjeve zyrtare më këmbë. Johnson, bën çfarë i thotë kancelarja.

Protesta kundër kryeministrit britanik

Para gardhit të ndërtesës së kancelarisë ndodhen shumë vizitorë, të cilët thërrasin me zë të fortë “No Brexit” dhe “gënjeshtar”, që dëgjohen edhe në oborr. Pritja miqësore ka tjetër pamje. Pastaj Merkel dhe Johnson japin deklarata të përbashkëta. Një zakon që ka kohë që ndiqet në Berlin. Shtypi informohet para zhvillimit të bisedimeve. Se si janë zhvilluar në fakt bisedimet nuk thuhet. Salla në katin e parë të zyrës së kancelares është e mbushur me gazetarë. Merkeli dhe Johnson mundohen të tregohen miqësorë.

Johnson thotë: “Ne do ia dalim mbanë” – në gjermanisht

Merkel shpjegon: “Ne si palë gjermane kemi thënë shpesh se na vjen keq për daljen nga BE, por ky është një fakt”. Gjermania preferon që dalja e Britanisë së madhe nga BE, “të bëhet me marrëveshje”, megjithatë është e përgatitur edhe për një Brexit pa marrëveshje. Johnson merr fjalën këtu duke numëruar se tek të drejtat e njeriut, ndryshimi i klimës, anëtarësia në NATO, vlerat janë të përbashkëta.

Megjithatë, thotë Johnson, ekziston “një çështje vogël” e me Brexitin. Ai do që dalja e vendit të tij nga BE të bëhet me marrëveshje, thotë Johnson duke shtuar në gjermanisht: “Wir schaffen das!” (“Ne do ia dalim mbanë!”). Këtë shprehje Merkeli e pati përdorur katër vjet më parë, pas ardhjes së rrymave të mëdha të refugjatëve. Sot, kjo fjali ka mbetur fjalia më e njohur e Merkelit gjatë kohës që ka qenë në pushtet. Të dy, Merkel dhe Johnson flasin për alternativa të mundshme për të dalë nga qorrsokaku. Po cilat janë këto alternativa nuk bëhet e qartë.

Të mërkurën në Berlin, të enjten në Paris

Vëzhgues në Londër patën shprehur shqetësimin, se qëllimi i udhëtimit të Johnsonit në Berlin dhe Paris është që t’ia lejë fajin europianëve për ndonjë Brexit, që mund të jetë pa marrëveshje. Nga burime të tjera thuhet se Johnson, beson se do jetë në gjendje më shumë të bindë kancelaren Merkel, por jo presidentin francez Emmanuel Macron. Por edhe Merkeli pati bërë të ditur ditën e martë gjatë një vizite në Islandë se: “Ne sigurisht që do të vrasim mendjen për zgjidhje praktike. Por për këtë nuk do të hapim nga e para marrëveshjen e daljes.”

Johnsoni e ka hallin tek rregullat për kufirin irlandez

Johnson e ka hallin në këtë raund bisedimesh për të ashtuquajturën “Backstop”. Ky rregull, që është pjesë e marrëveshjes me BE, parashikon që pas daljes nga BE, Britania e Madhe të qëndrojë në një union doganor me Bashkimin Europian, deri sa të gjejë një zgjidhje për problemin kufitar me Irlandën, një vend anëtar i BE dhe Irlandës së Veriut, që është pjesë e Britanisë së Madhe. Johnson e quajti këtë rregull “jodemokratik”.

Por për shtetet e BE është shumë e rëndësishme mbrojtja e Irlandës. Frika është se nëse dalja e Britanisë bëhet pa marrëveshje, atëherë midis Irlandës dhe Irlandës së Veriut do të ngrihen sërish barrikadat. Sidoqoftë Merkel thotë se aty ku është vullneti “mund të gjendet edhe një zgjidhje për Backstop-in, mbase në 30 ditët e ardhshme”, pra para datës së daljes nga BE më 31 tetor.

Zëvendëskancelari Olaf Scholz: Kurrkush nuk duhet të presë ndryshime

Ministri gjerman i Financave dhe zëvendëskancelari Olaf Scholz nga socialdemokratët u dëgjua të fliste më ashpër të mërkurën: “Ne kemi përgatitur një marrëveshje dhe kurrkush nuk duhet të presë që tek rregullat e vendosura në të të bëhen ndryshime”.

Presidenti Frank-Walter Steinmeier foli pa doreza për Brexitin. Zakonisht ai nuk përzihet në politikën e ditës. Steinmeier tha të mërkurën: “Të gjitha variantet që mund të propozohen tani kanë qenë objekt i bisedimeve të mëparshme”. Ai tha, se ka përshtypjen se tek Johnsoni çështja kryesore është “kush e ka fajin”.

Qytetarët e Berlinit nuk duan Brexit

Në sheshin “Pariser Platz” para Portave të Brandenburgut, që ndodhet afër zyrës së kancelares, bëhet e qartë çfarë mendohet për Boris Johnsonin dhe Brexitin: “Unë shpresoj që faktikisht të mbetemi siç jemi tani. Unë mendoj se kjo është më mirë për Europën, thotë një burrë. Një grua e moshuar kujton, se Europa ka kaluar ditë më të mira dhe thotë: “Nuk mund të shpërbëhet sërish ajo çka na ka bërë bashkë në ditë të vështira”.

Një grua e zemëruar kërkon që europianët të mos dorëzohen: “Do ishte e kotë nëse do dorëzoheshim para Johsnonit. Unë nuk do shkoja më në votime.” Por në moment duket se 27 vendet e BE janë të përçara. Kështu që më 31 tetor pritet më shumë që Brexiti të bëhet pa marrëveshje./DW

45BB9A29-E576-4A7A-B0CC-446FCB3F5A40_w1023_r1_s.jpg
ent ela09:35 | 22/08/2019

Presidenti i Serbisë, Aleksandër Vuçiç, tha në një intervistë për programin në gjuhën serbe të Zërit të Amerikës se është i ndërgjegjshëm që nuk do të ndryshojë qëndrimin amerikan në mbështetje të pavarësisë së Kosovës, por Beogradi kërkon një kompromis i cili nënkupton se shqiptarët nuk mund t’i fitojnë të gjitha e Serbia asgjë.

Ai u takua të martën me Sekretarin amerikan të Shtetit Mike Pompeo dhe të mërkurën me zotin Matthew Palmer, Zëvendës Ndihmës Sekretar i Shtetit për Çështjet e Evropës dhe Euroazisë, të cilëve u ka shprehur gatishmërinë e tij për rifillimin e bisedimeve me Prishtinën pas heqjes së tarifave ndaj mallrave serbe.

Ai tha se shpreson që Shtetet e Bashkuara të shtojnë trysninë mbi Kosovën për këtë çështje, ndonëse nuk pret rifillim bisedimesh para Dhjetorit, meqë Kosova pritet të mbaj zgjedhjet e parakohshme.

“Amerika në vitin 2008 e ka njohur pavarësinë e Kosovës. Të gjitha vendet e fuqishme perëndimore e kanë njohur pavarësinë e Kosovës më 2008 dhe 2009. A mendoni që vërtetë, ndonëse Serbia sot është në gjendje më të mirë ekonomike, në pikëpamje ushtarake e politike është më e fuqishme dhe ka më shumë respekt në botë sesa që kishte, vërtetë mendoni se jemi në gjendje të ndryshojmë vendimin e Shteteve të Bashkuara”?

Por, kjo tha ai, nuk nënkupton njohjen e pavarësisë së Kosovës nga Serbia. “Mund të bisedojmë për çdo gjë nëse bëhet fjalë për kompromis. Por, për atë që shqiptarët të fitojnë gjithçka e Serbia asgjë – nuk mund ta keni nënshkrimin tim kurrë”, tha presidenti serb, duke theksuar se amerikanët sërish i kanë thënë hapur se duan “njohje të ndërsjellë”.

Ai tha se për këtë arsye ka propozuar zgjidhje kompromisi dhe për këtë ka diskutuar sërish me zyrtarët amerikanë duke përfshirë shumë “modalitete”.

“Por, duhet të kuptojmë që ëndrrat tona boshe nuk kanë lidhje me realitetin”, tha ai, duke nënvizuar se “çdo luftë, çdo konflikt, çdo përulje do të ishte katastrofë për Serbinë”.

Bisedimet ndërmjet Kosovës dhe Serbisë për normalizimin e marrëdhënieve ndërmjet tyre, janë bllokuar që nga nëntori i vitit të kaluar kur qeveria e Kosovës vendosi tarifa prej 100 për qind ndaj mallrave serbe në shenjë kundërshtimi ndaj, siç është thënë, qasjes agresive të Beogradit ndaj shtetësisë së Kosovës. Beogradi kushtëzon rifillimin e bisedimeve me heqjen e tarifave.

Shtetet e Bashkuara dhe Bashkimi Evropian i kanë bërë thirrje qeverisë së Kosovës që të pezullojë tarifat për t’u hapur rrugën bisedimeve. Por qeveria e Kosovës i ka rezistuar trysnisë ndërkombëtare.

Aktualisht Kosova ka një qeveri në dorëheqje, pasi që më 19 korrik kryeministri Ramush Haradinaj paraqiti dorëheqjen e pakthyeshme meqë u thirr për t’u marrë në pyetje nga Prokuroria e Posaçme për krime lufte me seli në Hagë.

Të enjten pritet shpërndarja e parlamentit të Kosovës dhe pas atij vendimi edhe shpallja e datës së zgjedhjeve të parakohshme. /VOA

KATICA-JANEVE-NE-BURG-MBULIM.mpg_snapshot_00.22-1280x720.jpg
ent ela09:11 | 22/08/2019

Gjykata Penale e Shkupit ka caktuar masën arrest me burg për 30 ditë për Katica Janevën. Prokurorja speciale u arrestua me dyshimet për abuzim me detyrën në atë që njihet si cështja “Zhvatja”.

Gjykatësi i procedurës paraprake i ka caktuar paraburgim prej 30 ditëve Prokurores Speciale Katica Janeva, pas më shumë se katër orë të seancës dëgjimore në Gjykatën Penale të Shkupit. E shoqëruar nga policia ajo është dërguar në paraburgim në Burgun e Shkupit. Prokurorja e Prokurorisë kundër krimit të organizuar dhe korrupsionit Vilma Ruskovska ka deklaruar se nuk do të kërkonte paraburgimin nëse nuk kishte dëshmi të mjaftueshme dhe se për momentin kjo masë është e domosdoshme.

“Hetimet mund të vazhdojnë gjashtë muaj, mund të kërkojmë edhe vazhdimin e paraburgimit, por nëse duam që edhe më tej të qëndrojë paraburgimi, në afat prej tre muajve patjetër të ngritet aktakuza”.

Me kërkesë të avokatit të saj, Janeva nesër do të marrë pjesë në varrimin e nënës së saj që kishte ndërruar jetë sot në mëngjes. Ajo, në këtë ceremony mortore, sic njoftohet do të jetë e shoqëruar nga policia. Paraparkisht Prokuroria Publike kërkoi paraburgim për prokuroren speciale publike Katica Janeva për shkak të dyshimit të bazuar për keqpërdorim të pozitës zyrtare dhe autorizimeve, në lidhje me lëndën “Zhvatja”. Policia pasditen e sotme me urdhër të Prokurorisë Publike e ka arrestuar Katica Janevën në shtëpinë e saj. Policia pasdite ka konfiskuar mobilje dhe gjësende tjera nga shtëpia e Katica Janevës në një lagje të Shkupit prej se ajo u dërgua atje pas bastisjes në zyrën e saj në ambientet e Prokurorisë Speciale, ku thuhet se i është marrë edhe kompjuetri i saj personal.Edhe pse disa media kishin publikuar se përpos aksionit për arrestimin e Janevës është zhvilluar edhe aksion për arrestimin e personave tjerë të dyshuar për rastin “Zhvatja”, prokurorja Ruskoska, i demantoi këto shkrime duke thënë se për momentin, hetimi është zgjeruar vetëm me emrin e Janevës. /ABC News Albania 24/7        

 

AKSIDENT-NE-LEZHE-MBULIM.mpg_snapshot_00.01-1280x720.jpg
ent ela08:45 | 22/08/2019

Përplasja e tre makinave sot në mëngjes në rrugën Lezhë- Shkodër, pranë fshatit Balldre ka shkaktuar plagosjen e katër personave. Kurse në një aksident të dytë në rrugën Milot- Lezhë u plagosën tre vetë.

Shtatë persona u plagosën në dy aksidente  mëngjesin e kësaj të enjteje në Lezhë.

Aksidenti i parë u regjistrua në afërsi të fshatit Markatomaj përgjatë superstradës Lezhë – Milot. Nga  përplasja e dy automjeve mbetën të lënduar dy drejtuesit e mjeteve dhe një pasagjer i tyre, të cilët pasi morën ndihmën e parë ndodhen jashtë rrezikut për jetën.

Pak minuta më vonë, një aksident i trefishtë ndodhi në fshatin Balldren në superstradën Lezhë- Shkodër ku u plagosen 4 persona, por jashtë rrezikut për jetën.

Humbja e kontrollit të mjetit nga njëri prej drejtuesve, i cili edhe u arrestua nga policia për shkak se rezultoi me konsum alkooli mbi normat e lejuara, u përplas me dy automjete të tjera, por fatmirësisht pati vetëm të lënduar.

Policia po kryen të gjitha hetimet e saj për të dy aksidentet e regjistruara, ndërsa po punon edhe për zbardhjen e plote të tyre.

/ABC News Albania 24/7

MOTI-TABELAT-22-GUSHT.mpg_snapshot_00.09-1280x720.jpg
ent ela08:15 | 22/08/2019

Sipas MeteoAlb: Mbetemi në ndikimin e motit të kthjellët në bregdet dhe zonat e ulëta ndërsa kthjellime dhe vranësira të shpeshta do të ketë në zonat malore. Parashikohet që edhe pasditja të vijojë me kthjellime dhe vranësira ku më të dukshme do të jenë në zonat malore Lindore.

Temperaturat e ajrit ulen në mëngjes por një rritje të lehtë sjell mesdita duke luhatur vlerat ditore nga 13°C deri në 37 °C.

Era do fryjë mesatare në toke dhe në det me shpejtësi 38 km/h nga drejtimi Veriperëndimor duke krijuar ne brigjet detare dallgëzim 3 ballë. /abcnews.al

trumpo.jpg
G. P.23:20 | 21/08/2019

Presidenti amerikan Donald Trump ka deklaruar se Shtetet e Bashkuara nuk duan të kalojnë 19 vjet të tjera luftë si ajo në Afganistan, ndaj u ka bërë thirrje vendeve të tjera që të luftojnë Shtetin Islamik. Veç vendeve ku ISIS është i pranishëm, Trump ka thënë se në betejë duhet të përfshihen edhe Rusia dhe India.

Presidenti amerikan Donald Trump deklaroi të mërkurën se vende të tjera veç Shteteve të Bashkuara duhet ta luftojnë Shtetin Islamik, duke cituar Rusinë, Pakistanin dhe Irakun si shembuj.

“Në njëfarë pike, Rusia, Afganistani, Irani, Iraku dhe Turqia duhet të luftojnë luftën e tyre”, tha Trump nga Shtëpia e Bardhë, duke shtuar se edhe India duhet të përfshihet.

Sipas tij, të gjitha vendet ku ISIS është i pranishëm duhet të përfshihen në betejë.

“Shtetet e Bashkuara nuk duan të kalojnë 19 vjet të tjera duke luftuar në Afganistan”, deklaroi Trump.

Një ditë më parë, sekretari i Shtetit, Mike Pompeo deklaroi se militantët e Shtetit Islamik po rifitonin terren në disa zona, por shtoi se kapacitetet e grupit për të kryer sulme janë reduktuar në mënyrë të ndjeshme.

Po të martën, Departamenti i Shtetit ofroi një shpërblim prej 5 milionë dollarësh për çdo informacion që do të çonte në lokalizimin e liderëve të ISIS. Më herët gjatë vitit, forcat e mbështetura nga Shtetet e Bashkuara deklaruan rimarrjen e territorit të fundit të Shtetit Islamik në Siri.

Sidoqoftë, që atëherë janë ngritur shqetësime se grupi terrorist po forcohet sërish, përveç Sirisë edhe në Irak. Ndërkohë, në Afganistan, një marrëveshje e paqes mes talebanëve dhe Shteteve të Bashkuara për uljen e armëve mund t’i shtyjë guerrilasit afganë të bashkohen me ISIS, kanë paralajmëruar autoritetet në Kabul./ABC News Albania 24/7

trump-xi.jpg
G. P.22:59 | 21/08/2019

Kina ka kërcënuar me vendosjen e sanksioneve për të gjitha kompanitë amerikane të përfshira në shitjen e avionëve luftarakë ishullit të Taivanit, një kontratë prej 8 miliardë dollarësh.

Ministria e Jashtme kineze ka deklaruar se Shtetet e Bashkuara duhet ta anulojnë menjëherë transaksionin dhe në të ardhmen të shmangin bashkëpunimet ushtarake me Taipein. Pekini e konsideron Taivanin një provincë rebele e destinuar të bashkohet me Kinën mëmë edhe përmes forcës, nëse do të jetë e nevojshme.

“Do të marrim të gjitha masat e nevojshme për të mbrojtur interesat tona”, thuhet në një deklaratë të Ministrisë së Jashtme kineze./ABC News Albania 24/7

skynews-merkel-johnson_4751279.jpg
G. P.22:35 | 21/08/2019

Kancelarja gjermane Angela Merkel ka pritur të mërkurën në një takim kryeministrin britanik Boris Johnson, të cilit i ka ofruar 30 ditë kohë për të gjetur një alternativë ndaj opsionit të kufirit irlandez. Nga ana e tij, Johnson ka pranuar afatin dhe faktin se topi tashmë është në fushën e Londrës.

Kancelarja gjermane Angela Merkel ka deklaruar të mërkurën lidhur me Brexit se një alternativë ndaj kufirit irlandez mund të gjendet brenda 30 ditëve. Duke folur në një konferencë për shtyp përkrah kryeministrit britanik Boris Johnson në Berlin, kancelarja nënvizoi se i takon Mbretërisë së Bashkuar që ta ofrojë këtë alternativë, e cila sipas saj duhet të jetë funksionale.

Nga ana e tij, kryeministri britanik deklaroi se është i kënaqur me afatin, sipas tij të vështirë, që ka propozuar kancelarja. Ai e pranoi faktin se “barra” tashmë i takon Britanisë, por tha se beson se ka hapësirë të mjaftueshme që mes palëve të arrihet një marrëveshje e re.

Merkel dhe Johnson po takohen në Berlin një ditë pasi shefi i Doëning Street i shkroi një letër liderëve europianë, ku u kërkonte shmangien e kufirit irlandez pas daljes së Britanisë nga BE-ja.

Ekzistenca e një kufiri të tillë do ta bënte Irlandën e Veriut të lidhur me disa rregulla të Unionit që kanë të bëjnë me tregun e përbashkët. Gjithashtu, ajo do ta mbante Mbretërinë e Bashkuar në doganën e përbashkët me Europën dhe të lidhur me ligjet e saj për konkurrencën.

BE ka përsëritur disa herë se marrëveshja e tërheqjes e negociuar nga ish-kryeministrja May, që përfshin kufirin me Irlandën e Veriut, nuk mund të rinegociohet. Por në konferencën për shtyp, Merkel nënvizoi se alternativa ndaj kufirit kërkon qartësi absolute, pasi nga ajo varet marrëdhënia e ardhshme mes Londrës dhe Brukselit.

Nga ana e tij, Xhonson u përgjigj: “Ju keni të drejtë kur thoni se barra është mbi ne për të prodhuar këtë zgjidhje dhe është pikërisht ajo çka ne duam të bëjmë”, tha Xhonson. Ai u shpreh mëse i kënaqur me afatin 30-ditor të ofruar nga Merkel për të arritur zgjidhjen e kërkuar./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono