Betohet Erdogan, Turqia “ndërron lekurë”

22:54 | 09/07/2018

Recep Tayip Erdogan u betua këtë të hënë duke i dhënë jetë sistemit të ri qeverisës në Turqi, ku pushteti ekzekutiv është i centralizuar në duart e presidentit. Në fjalimin e tij, Erdogan theksoi se sistemi i ri do të vërë vendin në shinat e republikës së themeluar nga Ataturku dhe do ta bëjë atë më të fortë se më parë.

Recep Tayip Erdogan është betuar të hënën për mandatin presidencial që e bën atë të parin kryetar shteti me pushtet ekzekutiv në historinë e Turqisë.

Menjëherë pas leximit të formulës së betimit, në vend ka hyrë në fuqi sistemi i ri që e bën Erdogan të gjithëpushtetshëm, një status ky i arritur falë referendumit të vitit të kaluar që i dha presidentit kompetenca të reja.

Pas ceremonisë së zhvilluar në Parlament, Erdogan është drejtuar për në Anitkabir, siç njihet mauzoleumi i Mustafa Kemal Ataturkut, ku përmes një fjalimi ka premtuar se do të ndjekë gjurmët e tij.

“Në këtë moment të rëndësishëm kthese të Republikës dhe demokracisë sonë, si presidenti i 12-të i Turqisë dhe i pari me një sistem qeverisës presidencial, premtoj se do të forcoj unitetin dhe vllazërinë e kombit tonë, dhe se do të zhvilloj e ngre më lart shtetin turk”, tha Erdogan.

Ai u shpreh i vendosur për të arritur objektivat e republikës së themeluar nga Ataturku dhe njerëzit e tij, që siç tha, tashmë i janë besuar atij dhe brezit të ri. Më pas kreu i shtetit u drejtua për në kompleksin presidencial të Ankarasë, për një tjetër ceremoni. Në fjalimin e radhës, që e nisi me lutje, Erdogan foli për përfitimet që sipas tij sistemi i ri qeverisës do t’i sjellë Turqisë.

“Ne po adoptojmë një model që shkon përtej përpjekjeve tona 150-vjeçare për demokraci dhe eksperiencës sonë 95-vjeçare si Republikë”, tha Erdogan.

Ai u shpreh se sistemi i ri po lë pas atë të vjetër, që në të kaluarën i ka kushtuar shtrenjtë vendit për shkak të kaosit politik, social dhe ekonomik. Duke premtuar se në këtë epokë të re do të përforcojë shtetin social, presidenti u zotua se do të lërë pas ditët kur njerëzit ishin të përjashtuar dhe të tjetërsuar për çfarëdolloj arsyeje./abcnews.al





Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F




Kontakt

Telefono