Barcelona e varur nga Messi

12:37 | 03/04/201912:370

Barcelona është tepër e varur nga Lionel Messi. Barazimi dramatik në fushën e Villarealit tregoi se kapiteni është vendimtar për katalanasit, duke vendosur edhe një rekord europian.

“Nuk është asnjëherë moment i mirë për të lënë pushim Messin”.

Këto fjalë të trajnerit Ernesto Valverde tingëlluan profetike në përfundim të ndeshjes së çmendur të La Ligës, që Barcelona barazoi 4-4 në fushën e Villarrealit. Padyshim, përballja më e bukur dhe më dramatike e sezonit në Spanjë.

Katalanasit po fitonin 2-0 në pjesën e parë, pa kapitenin në fushë, pasi Valverde kishte vendosur të bënte rotacion. Filip Kutinjo dhe Malkom ishin autorë të golave, në atë që mendohej si fitorja e lehtë e radhës, në rrugën drejt titullit. Shpejt ndodhi çudia, kur Vijarreali shkurtoi diferencën që në 23’, ndërsa pjesa e dytë ishte e shkëlqyer për vendasit.

Ekambi në 50’, Iborra në 52’ dhe Karlos Baka në 80’ bënë që rezultati të shkonte në 4-2.  Kur ishte luajtur një orë lojë, Valverde hodhi në fushë Mesin në vend të Kutinjos, por për ndryshimin u desh kohë.

Goli i katërt i Villarrealit u shënua me Leon në fushë, veçse argjentinasi nuk e kishte thënë ende fjalën e fundit. Kjo ndodhi në minutën e fundit. Messi realizoi nga goditja e dënimit, ashtu siç bëri në fundjavë, duke i dhënë shpresë ekipit.

Përveç kësaj, ai vendosi një rekord në 5 ligat kryesore të Europës, si i vetmi lojtar që ka shënuar të paktën nga 6 goditje dënimi që nga sezoni 2006-2007. Pikërisht në fund fare, ishte radha e Luis Suarezit të barazonte në 4-4.

Barcelona ka tani 8 pikë epërsi ndaj Atletikos, por mënyra sesi shmangu humbjen, me shumë gjasë i ka dhënë moral shumë më të lartë për vazhdimin e sezonit, qoftë në La Liga, në Kupën e Mbretit, por sidomos në Champions. Sa për Mesin, ai ka tani 32 gola në kampionat, dhe 42 në sezon.

“Padyshim që kemi një varësi nga Mesi, – pohoi Valverde pas ndeshjes, – ajo ekziston. Gjithsesi, në pjesën e parë nuk ishim të varur nga Mesi, dhe luajtëm shumë mirë. Kështu duhet të luajmë gjithnjë. Kjo ndeshje na ndihmojë për të kuptuar sesa e vështirë është La Liga. I lumtur për karakterin e skuadrës”.

“Marka”: Futbolli është i pabesueshëm! Nga 0-2 në 4-2 deri në minutën e 89-të, pastaj Barça barazon me Mesin e Suarezin!

“El Mundo Deportivo” ka në kopertinë momentin e barazimit të Suarezit, me komentin: Goli i kampionatit! Një pikë jetësore para vizitës së Atletikos!

“Sport”: E pabesueshme! Barazimi me dy gola në 3 minutat e fundit! Messi e Suarez shpëtuan një ekip me shumë defekte në mbrojtje!/abcnews.al

Lini koment

E-maili nuk do te publikohet. Duhen plotesuar *


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F




Kontakt

Telefono