Vladimir Prenga
Formacionet e ndeshjes

lerda-1280x853.jpg
Vladimir Prenga16:07 | 07/12/2019

Franco Lerda, trajneri i Partizanit, pas ndeshjes me Bylisin, në lidhjen direkte me emisionin “Gol pas Goli” në Supersport tha: “Bëmë një pjesë të parë të mirë. Pësuam nga një devijim i Belicës. Patëm raste me Çinarin dhe Brojën, si dhe me Asanin që për mua nuk ishte pozicion jashtë loje. Gabuam në disa topa në pjesën e dytë dhe kjo i dha kurajo Bylisit. U munduam të rikuperojmë pas golit të pësuar, por nuk ia dolëm. Në fund humbëm”.

“Nuk ka asnjë dramë. Edhe kur ishim me një lojtar më pak u munduam të shënojmë dhe iu afruam me Bardhin në fund. Ishte vetëm një humbje aksidentale. Nuk ishim kampion përpara, ashtu sikuse edhe tani nuk jemi. Terreni ishte rënduar. Do analizojmë gjithçka dhe do të shohim përpara”.

“Pësuam gol në gjuajtjen e parë të Bylisit. Krijuam raste në një terren jo të mirë. Pengu më i madh është që nuk shkuam në epërsi në fundin e pjesës së parë. Gabuam në 15 minutat e para të pjesës së dytë, kur Bylisi mori kurajo dhe e fitoi ndeshjen”.

“Është e qartë që terreni dhe ambienti jashtë ndikon, por nuk ka alibi. Ishim përgatitur për këtë ndeshje psikologjikisht dhe fizikisht. Si shkuan gjërat, kush gabon më pak fiton. Ne bëmë më shumë dhe humbëm”.

“Topat e dytë? Pati pak hapësira, që mund t’i mbyllnim më mirë dhe të evitonim disa situata të rrezikshme. Golat e pësuar? Do vazhdojmë të bëjmë të njëjtën gjë që kemi bërë në javët në vazhdim. Para kësaj ndeshjeje ishim mbrojtja më e mirë, ose e dyta. Sa i takon sulmit, do bëjmë atë që bëjmë në stërvitje. Vetëm kështu përmirësohemi”. /abcnews.al

giorgos-marantas.png
Vladimir Prenga16:00 | 07/12/2019

Giorgos Marantas, trajneri i Luftëtarit, u shfaq i zhgënjyer me rezultatin e marrë ndaj Vllaznisë. Në lidhjen direkte me emisionin “Gol pas Goli” në Supersport tha: “Rezultati nuk na kënaq aspak. Siç e thatë edhe ju, pjesën e parë luajtëm mirë. Në të dytën kishim presion për rezultatin. Ekipi kundërshtar mori metra. Humbëm rast tek për tek me Filin dhe pësojmë për mungesë vëmendje në fund. E thatë edhe ju që ky është një rezultat të keq”.

“Na mungon një sulmues, nuk do diskutim. Që kur kam ardhur kam provuar katër lojtarë në sulm. Kur je poshtë në renditje, kur të del një rast duhet të shënosh që të ndryshojë psikologjia e ekipit. E kam thënë se duhen përforcime, por duhet të bëjmë maksimumin me këta lojtarë. Përballe kishim një ekip të mirë. Ata që na shënuan ne, janë me shumë eksperiencë. Duhet që lojtarët tanë të marrin shembull prej tyre. Ekipi nuk mund të rrijë prapa”.

“Diferenca është e madhe pas kësaj humbjeje. Ekipi nuk mund të bëjë ndryshe. Duhen bërë afrime në janar. Nuk mjaftojnë fjalët e mira, nuk merren pikë me to. Marr i pari përgjegjësitë. Kam thënë që Luftëtari do mbijetojë dhe duhet ta besojnë të gjithë diçka të tillë. Nuk dua të flas tani, nuk është koha. Besoj se jeni të zgjuar dhe e kuptoni. Shqiptarët janë të zgjuar dhe i kuptojnë gjërat”.

“E dini pse Fili dhe Rrenja kanë mbetur jashtë? Nuk i kam lënë unë. Ju thashë që jeni të zgjuar dhe kjo pyetje nuk është e zgjuar. Kam raport të mirë me të dy këta lojtarë, por edhe me të tjerët. Pyesni lojtarët për këtë dhe pse kanë ngelur jashtë”. /abcnews.al

Tirana-Kukesi.jpg
Vladimir Prenga15:56 | 07/12/2019

Asnjë surprizë te Tirana dhe Kukësi. Shpëtim Duro dhe Julian Ahmtaj u kanë besuar atyre lojtarëve që janë parë edhe në seancat stërvitore të provohen si titullarë. Te Kukësi ka vetëm një ndryshim nga takimi i fundit, me Gavazajn që zë vendin e Ethemit.

Te Tirana ka disa ndryshime. Torassa, Karabeci dhe Kale nuk luajnë nga fillimi, ndërkohë që rikthehen titullarë Batha e Çelhaka, sikurse edhe Doka që është pozicionuar në krahun e majtë të mbrojtjes. Në mungesë të Osmanit, Ahmataj ka zgjedhur Muçën titullar. /abcnews.al

Dovedan.jpg
Vladimir Prenga15:46 | 07/12/2019

Veljko Dovedan, trajneri i Bylisit, analizoi fitoren e marrë ndaj Partizanit. Në lidhjen direkte me emisionin “Gol pas Goli” në Supersport, ai fillimisht tha: “Ky është ekipi që unë njoh, Bylisi i vërtetë. E treguam në fushën e lojës, treguam stilin tonë. Kështu luajmë dhe do të luajmë deri në fund”.

“Jo vetëm ndaj Partizanit, por ndaj çdo kundërshtari dua të jemi agresiv. Ka ndodhur edhe në takimet e tjera. Edhe pse në dy ndeshjet e shkuara kemi humbur, ne jemi paraqitur mirë”, shtoi trajneri i Bylisit, Dovedan.

“Nuk mund të them se kush është më i miri, Hidi, apo Guindo. I gjithë ekipi ishte mirë. Djemtë kanë bërë atë që kemi përgatitur gjatë javës dhe jam kënaqur”, komentoi trajneri. “Kam edhe plan B, por varet nga rezultati i ndeshjes. I besoj ekipit tim për faktin që bën presing lart dhe luan fort në duelet një për një”.

“Mungesa e festës te goli? Ashtu më erdhi natyrshëm. Gjithmonë i druhem Partizanit deri në fund, isha në tension. Shiriti? E kemi menduar ta ndryshojmë kapitenin dhe na doli për mirë (qesh)”. /abcnews.al

jonuz.jpg
Vladimir Prenga15:40 | 07/12/2019

Mirsad Jonuz, trajneri i Vllaznisë, në lidhjen direkte me emisionin “Gol pas Goli” në Supersport tha: “Strategjia ishte të mos pësonim, pasi luanim në një fushë të vështirë. Në pjesën e dytë shtova sulmuesit dhe ia dolëm të shënojmë. Komplimente skuadrës për paraqitjen e bërë”.

“Kjo është një skuadër e ndërtuar para pak kohësh. Kemi lënë pikë, pasi morëm lojtarë nga të rinjtë. Kemi pasur edhe dëmtime. Nuk kishim Hygor, i cili është i rëndësishëm dhe kthehet në janar. Luftëtari ka lojtarë të rinj dhe nga ato pak gabime shënuam dy golat”.

“Bardulla ka qenë shtatë ditë i sëmurë, ndaj e futa në 30 minutat e fundit. Ishte i freskët dhe ka cilësi. Duhet vazhdimësi prej tij. Sulmi? E respektoj Likën dhe Shtubinën dhe të gjithë lojtarët e tjerë me eksperiencë. Do ta shoh gjendjen e skuadrës dhe do të flas me drejtuesit për të ardhmen, për të ndryshuar diçka.

Nuk flas dot tani, pasi është e rrezikshme. Kemi edhe katër ndeshje. Është e rëndësishme që në këtë moment të mbyllim sa më mirë. Më pas do të kërkojmë 2-3 lojtarë të tjerë. Shumë e rëndësishme është që ta lëmë vendin e tetë, këto dy ekipe, Flamurtari dhe Luftëtari, kanë mbetur poshtë”.

“Flas me lojtarët e mi gjithmonë dhe u them ta shijojnë. Ne lëmë pikë në Shkodër, atje është presioni më i madh. U kam thënë, nëse luani lirshëm dhe e shijoni, nuk humbni”. /abcnews.al

bylis-dhe-partizani.jpg
Vladimir Prenga15:27 | 07/12/2019

Bylisi tregon sërish muskujt dhe këtë herë ndaj Partizanit kryesues, që e ka mposhtur me rezultatin e ngushtë 2-1. Një fitore me shumë vlera, që i ngjit momentalisht ballshiotët në vendin e dytë në klasifikim dhe diferenca me të kuqtë kryesues është vetëm 7 pikë. Skuadra e Lerdës ka marrë një goditje para derbit dhe i duhet të reagojë në një sfidë delikate, ku nuk do të ketë Brojën dhe Telushin të pezulluar.

Në takimin e sotëm të kuqtë e nisën në disavantazh, pasi Belica devijoi një top të gjuajtur nga Ndreca dhe portieri Alban Hoxha e kishte të pamundur ta shmangte golin. Festë në Ballsh, por që nuk zgjat shumë. Broja nuk e shfrytëzoi një mundësi të artë shënimi, ndryshe nga se bëri Bardhi në të 26′. Sulmuesi shtatshkurtër, me kokë e ndëshkoi Hidin. 1-1 përfundoi pjesa e parë.

Bylisi edhe pjesën e dytë e nisi mirë, teksa kur kishin kaluar dhjetë minuta arriti të shënonte. Guindo, pas një krosi të Ntephe, e dërgoi topin në rrjetë. Miqtë kishin pretendime për një pozicion jashtë loje, por goli u konsiderua i rregullt dhe Bylisit iu desh të mbronte rezultatin deri në fund. Nuk mungoi as tensioni, teksa Bruno Telushi u ndëshkua me karton të kuq dhe Lerda duhet t’i bëjë llogaritë pa të në derbi. Hidi ishte vendimtar në fund, duke shmangur golin e barazimit, pas një gjuajtje me kokë të Bardhit. /abcnews.al

kastrioti-egantia.jpg
Vladimir Prenga15:05 | 07/12/2019

Kastrioti marshon dhe tashme e sheh veten gjashtë pikë nga vendi i dytë, që mbahet nga Besëlidhja. Krutanët iu falën një goli të Markut në transfertë me Egnatian dhe morën pikët e plota, kurse lezhjanët mposhtën Korabin në Peshkopi.

Shkodranët Hajdari dhe Hepaj ishin autorët e golave për skuadrën e drejtuar nga Elvis Plori, kurse për dibranët realizoi me penallti Xhebraimi. Ngjitet në vendin e tretë Erzeni, që bëri detyrën ndaj Veleçikut në shtëpi. Djidjiwa dhe Troplini i vendosën fatet e takimit që në pjesën e parë.

Fitore shumë e rëndësishme për Burrelin, që në shtëpi iu fal dy qendërmbrojtësve, Dedgjonaj dhe Beci. Eyoh realizoi golin e vetëm për Shkumbinin. Sot më në fund ka fituar edhe Dinamo, që mposhtu Tërbunin me rezultatin e pastër 2-0. Çeliku dhe Qoshku nderuan blutë e kryeqytetit. /abcnews.al

pogradeci-devolli.jpg
Vladimir Prenga14:54 | 07/12/2019

Garë treshe në grupin B. Apolonia ka bërë detyrën ndaj Elbasanit të vendit të fundit, madje ka shpërthyer në 45 minuta dhe ka realizuar shtatë gola. Gjata realizoi dy herë dhe i la radhën Omerit, i cili realizoi më pas tre gola të tjerë. Hyseshahaj dhe Mehmeti realizuan edhe dy herë, ndaj një Elbasani inekzistent në fushën e blertë. Në pjesën e dytë pati “mëshirë”, pasi nuk u shënua asnjë gol tjetër dhe ndeshja u mbyll me rezultatin 7-0 në favor të Apolonisë.

Spektakël edhe në Pogradec, ku u shënuan shtatë gola. Devolli i shënoi tre herë vendasve në 45 minutat e para, me Çelën (dygolësh) dhe Rapon, kurse Hidri shënoi të vetmin gol për liqenorët. Në të dytën ishte Jahaj që me penallti rihapi takimin, kurse Topllari barazoi shifrat. Pura në shtesë i dha fitoren Pogradecit, që ruan kreun e klasifikimit.

Nuk pati fitues në Shënkoll. Aty ku vendasit i shënuan dy herë Lushnjës plot mungesa. Gruda ndëshkoi dy herë skuadrën mike, që reagoi me të zakonshmin Mikel Canka. Sulmuesi ngushtoi shifrat në 2-1, kurse Armando Mezini shmangu humbjen me golin e shënuar gjashtë minuta para përfundimit të kohës së rregullt. /abcnews.al

bylisi-partizani.jpg
Vladimir Prenga14:25 | 07/12/2019

Bylisi-Partizani dhe Luftëtari-Vllaznia nuk kanë prodhuar fitues në 45 minutat e para. Në Ballsh janë shënuar dy gola, me vendasit që realizuan të parët që në minutën e gjashtë, kur gjuajtja e Edison Ndrecës u devijua dhe përfundoi në rrjetë.

Të kuqtë reaguan menjëherë dhe mund të kishin shënuar me Brojën, por mesfushori i vetëm me portierin Hidi, nuk ia doli të realizonte. Portieri i ballshiotëve e ndali topin e gjuajtur lehtë nga lojtari i Partizanit. Gjithsesi në të 26′ nuk kishte çfarë bënte, pasi Bardhi me një goditje me kokë e çoi topin në rrjetë.

Lojtarët e Bylisit dhe Partizanit pozuan së bashku para ndeshjes

Në Gjirokastër ishte një ndeshje me pak raste, por me Luftëtarin që kishte mundësinë më të mirë për të shënuar. Lika, i vetëm me portierin Sherri nuk e dërgoi topin në kuadrat, duke humbur një mundësi të artë shënimi. Me rezultatin 0-0 përfundoi pjesa e parë e takimit. /abcnews.al

shkembi.png
Vladimir Prenga13:48 | 07/12/2019

Bledi Shkëmbi, trajneri i Teutës, ka dalë sot para mediave dhe ka folur për ndeshjen e radhës me Skënderbeun. Fillimisht ai ka treguar gjendjen e skuadrës, që ka kaluar një moment të vështirë prej tërmetit të 26 nëntorit.

“Ka qenë moment i vështirë për të gjithë lojtarët dhe qytetin e Durrësit. Dita-ditës kemi punuar, kemi qenë bashkë dhe shpresoj që kemi bëmë më të mirën në aspektin psikologjik. Periudha e pushimit nuk ndikon mirë për të gjitha gjërat. Ishte e ndikuar nga ajo tragjedi që ndodhi. Ka ndikuar të rikuperohet ndonjë lojtar dhe shpresoj të jenë të gjithë në maksimumin nesër”, është shprehur Shkëmbi.

Korçari ka një mesazh për tifozët: “Në te gjithë bashkë, ky qytet duhet të bashkohet për ta kaluar këtë situatë. Klubi dhe futbollistë janë solidarizuar për ta bërë sa më pak të dhimbshme këtë situatë. Shpresojmë që tifozët, të paktën nesër, të afrohen dhe të jenë të shumtë për t’u solidarizuar me këtë situatë të vështirë që ka kaluar ky qytet”.

Tërmeti kishte lënë pasoja edhe te futbollistët, gjë që e pranon edhe Shkëmbi: “Ditën e parë e kuptova shumë mirë se çfarë kishte ndodhur te mendja e lojtarëve. I pashë të shokuar. Pashë një ekip ndryshe, jo të përqendruar te stërvitja, por tek ajo që ndodhi. Ditët e fundit kam parë dëshirë tjetër, përqendrim, një ekip që është mësuar të stërvitet. Uroj të jetë hera e fundit që ndodh një situatë e tillë. Ka qenë e vështirë në ditët e para”.

Në lidhje me sfidën me Skënderbeun, trajneri i Teutës deklaron: “Pres një ndeshje të vështirë, ku duhet të kemi motivim të madh për të fituar. Luajmë ndaj një kundërshtari që po paraqitet shumë mirë, unë e kam thënë shumë herë. Duhet të gjejmë motiv edhe më të madh për të dhënë maksimumin dhe për të marrë tre pikët. Skënderbeu vjen pas një periudhe të mirë, me rezultate pozitive, por ne mendojmë të marrim maksimumin.

Lojërat i kemi pasur të mira, pavarësisht rezultateve. Kemi pasur shanset tona për të fituar, por nuk kemi arritur të shënojmë. Patjetër duhet të bëjmë ndryshe nesër, duhet të bëjmë mbi maksimumin. Nuk duhet të ketë asnjë justifikim për çfarë ka ndodhur. Duhet të mendojmë për ndeshjen dhe të marrim tre pikët”. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono