Veronik Istrefaj
Formacionet e ndeshjes

James.jpg
Veronik Istrefaj19:50 | 07/12/2019

Takimi mes Shmona dhe Nes Tziona, i vlefshëm për javën e 13-të të kampionatit izraelit të futbollit, pa dy ish-futbollistët e Skënderbeut dhe Gabalas, James Adeniyi dhe Sabien Lilaj të vihen përballë njëri-tjetrit.

Të dy skuadrat, si Shmona, ashtu dhe Nes Tziona, nuk e kanë nisur mirë sezonin dhe ndodhen në zonën e ftohtë të tabelës. Si pasojë, kjo sfidë kishte shumë vlerë dhe u luftua nga të dyja skuadrat. Duelet ishin të forta në mesfushë dhe arbitri pati shumë punë të ulë tensionin. Futbolli kaloi në plan të dytë dhe rezultati ishte 0-0 deri në minutat e fundit.

Pikërisht në minutën e 88-të, sulmuesi nigerian, James, gjen golin për Shmona, duke i dhënë fitoren dhe tre pikë të rëndësishme. Me këtë triumf, Shmona ngjitet në kuotën e 10 pikëve, ndërsa Nes Tziona e Sabien Lilaj mbetet në vend të fundit, me vetëm 8 pikë./abcnews.al

Izrael, java 13

Shmona – Nes Tziona  1-0
James 88′

Shkurtaj.jpg
Veronik Istrefaj19:16 | 07/12/2019

Sulmuesi i Kukësit, Vasil Shkurtaj, shënoi golin e barazimit në atë fitore 1-3 të skuadrës së tij përballë Tiranës. Bomberi shënoi me Panenka nga pika e bardhë e penalltisë. Pas ndeshjes, Shkurtaj foli për mediet e pranishme në stadium, duke prekur disa tema.

“Ndihem shumë mirë që u ktheva te golat. Jam i kënaqur që fitoi ekipi edhe po shikojmë ndeshjen tani me Teutën. Panenka? Ishte zgjedhje e momentit, mendova të gjuaj në atë mënyrë dhe më doli e bëra gol, kjo ka rëndësi. Rrezikova pak, se preku në shtyllë. Topi e kishte kaluar vijën, më thanë dhe çunat mbrapa që topi e kishte kaluar vijën dhe ishte gol.

Golat ndaj Tiranës? E vërteta është që gjithmonë kur kam luajtur kundër Tiranës, kam shënuar.  Edhe mua personalisht, edhe ekipit, kjo fitore na jep shumë motivim dhe na ndihmon nga ana psikologjike për ndeshjet tjera. Titulli? Nga fillimi i sezonit, ky është objektivi ynë. Kemi një ekip shumë të mirë dhe me lojtarë që kanë cilësi. Objektivat personalë? Të bëj sa më shumë gola dhe të ndihmoj ekipin të arrijë objektivat.

Presioni nga Nwabueze? Jo, nuk e mendoj kështu. Para se të dëmtohesha, ishim njësoj me gola. Ai luajti tre ndeshje më shumë se mua dhe më kaloi kur isha i dëmtuar, por nuk është diçka që unë e mendoj. Jo, nuk më motivon rivaliteti me Nabueze, por te fitojë ekipi”./abcnews.al

Ahmataj.jpg
Veronik Istrefaj19:01 | 07/12/2019

Trajneri i Tiranës, Julian Ahamtaj, foli për emisionin Gol pas Goli në Supersport pas humbjes 1-3 përballë Kukësit. Kreu i pankinës bardheblu tha se është penalizuar nga dëmtimet dhe se të humbësh dy lojtarë të rëndësishëm, është shumë e vështirë për çdo skuadër. Gjithashtu, Ahmataj komentoi dhe rastin e penalltisë, duke thënë se Torassa është një lojtar me eksperiencë dhe që nuk duhet të ishte nxituar.

DËMTIMET – “Dëmtimet na penalizuan, sepse nuk bënim dot ndërhyrje të tjera në formacion, duke parë se duhej të prisnim para se të bënim një zëvendësim të tretë. Të humbësh dy lojtarë të rëndësishëm, është shumë”

PRESIONI – “Është e qartë se po e vuajmë presionin e rezultatit. Gjithçka shkon mirë në minutat e para, më pas çdo gjë shpërbëhet. Kjo edhe për shkak të mungesave. Lojtarë të veçantë kanë qenë të dëmtuar dhe nuk janë stërvitur plotësisht dhe kjo ndikon në ndeshje”.

TORASSA – “Është e vërtetë se një lojtar me aq eksperiencë nuk mund të jetë aq i nxituar brenda 16 metrave. Nuk jap dot një shpjegim për gabimet që kemi bërë. Janë çështje perceptimi të lojtarëve”./abcnews.al

Duro-Kukesi.jpg
Veronik Istrefaj18:44 | 07/12/2019

Trajneri i Kukësit, Shpëtim Duro, foli për emisionin Gol pas Goli në Supersport, menjëherë pas fitores 1-3 përballë Tiranës. Numri një i pankinës verilindorë tha se skuadra e tij ka pasur disa vështirësi, por pushimi prej dy javësh ka qenë shumë favorizues.

NDESHJA – “Pësuam golin nga një gabim. Gjithmonë nuk kemi qenë mirë në pjesët e para, sepse ndikon edhe presioni për objektivat. Është hera e parë që skuadra ka qenë e plotë. Këto dy javë na ndihmuan shumë për të rikuperuar lojtarët”.

TITULLI – “Është shumë herët dhe kampionati është shumë interesant. Për mendimin tim, siç u thashë dhe çunave, kjo ka qenë ndeshja më e mirë për ne. Kemi dominuar edhe kur ishim në disavantazh dhe më pas”.

VËSHTIRËSITË – “Do të kemi gjithmonë vështirësi, por problemi kryesor është që nuk luajmë përkrah tifozëve tanë. Ky është një element shumë i rëndësishëm. Nuk duhet të kalojmë në eufori dhe besoj se do të kemi vështirësi me skuadrat dytësore.

TIFOZ ME TIRANËN – “Nuk ka shans që të bëj tifo për Tiranën, sepse jam rritur me Partizanin”./abcnews.al

Gjici.jpg
Veronik Istrefaj18:36 | 07/12/2019

Presidenti i Kukësit, Safet Gjici, foli menjëherë pas ndeshjes së fituar 1-3 kundër Tiranës. Numri një i klubit verilindor tha se është i kënaqur me paraqitjen e të tijve, por kërkon ecuri dhe më shumë nga yjet e sulmit.

“Po patjetër, në objektiv jemi. Nuk do të dalim te objektivi. Unë pres që Kukësi të marrë fitore rresht, tre, katër radhazi. Duhet të kapim ritmin e të mos ndalohemi. Besoj se Kukësi është i kompletuar, të gjithë lojtarët janë në formën e duhur.

Kuptohet që po luajtën kështu si sot, do të kemi rezultate pozitive dhe në ndeshjet e ardhshme. Shpresoj që arbitrat të mos gabojnë. Gavazaj sot luajti shumë mirë, edhe pse kishte një rast më përpara për të shënuar. Por kuptohet, jo të gjitha rastet shënohen. Gjithsesi, pres më shumë nga Gavazaj dhe Abazaj.

Janë në rrugën e duhur, por ka ende punë për të bërë. Kampionati është i gjatë dhe ka konkurrencë të fortë. Besoj që do të arrijmë të marrim atë që duam dhe të arrijmë tek objektivat e vendosura në fillim”./abcnews.al

Kukesi.jpg
Veronik Istrefaj18:22 | 07/12/2019

Kukësi ka përmbysur disavantazhin 1-0 të pjesës së parë dhe ka fituar 1-3 përballë Tiranës. Shkurtaj me penallti, Gavazaj dhe një supergol i Abazaj vendosën rezultatin final të sfidës dhe i dhanë tre pikët Kukësit, që ngjitet në vendin e dytë në kuotën e 24 pikëve, një pikë më pak se Partizani kryesues.

Ndeshja nisi shumë mirë për Tiranën, që gjeti golin që në minutën e nëntë me anë të Hasanit. Megjithatë, pjesa e dytë ishte shumë e dobët për bardheblutë, të cilët u ndëshkuan tre herë. Shkurtaj shënoi me penallti, duke mposhtur portierin Xhika me panenka.

Festa e Gavazaj te goli i dytë i Kukësit (75′)

Më pas, Gavazaj kaloi në avantazh Kukësin për herë të parë në këtë sfidë. Abazaj shënon nga një goditje dënimi, duke mposhtur për herë të tretë portierin Xhika. Një ndeshje shumë e mirë e verilindorëve, që konfirmojnë dhe njëherë tjetër se kanë sulmin më të mirë në Superiore./abncews.al

Liverpool.jpg
Veronik Istrefaj17:48 | 07/12/2019

Skuadra e Liverpool vazhdon të triumfojë në Premier League dhe pas 16 javësh kampionat, ka marrë 15 fitore, duke u ndalur vetëm njëherë në barazim 1-1 përballë Manchester United. Të kuqtë e Jurgen Klopp triumfuan edhe sot përballë Bournemouth në transfertë, me rezultatin 0-3.

Chamberlain (35′) dhe Keita (44′) shënuan në pjesën e parë, ndërsa Mohamed Salah gjeti rrjetën në minutën e 54-ët të sfidës. Tottenham me Jose Mourinhon po fluturon. “Gjelat” reaguan  mjaft mirë pas humbjes kundër Manchester United dhe shkatërruan Burnley me rezultatin 5-0. Kapiteni Kane shënoi dy gola në këtë sfidë, ndërsa Lucas dhe Son gjetën rrugën e rrjetës gjatë pjesës së parë.

Goli i Salah (54′)

Sissoko në minutën e 74-ët vendosi rezultatin final të sfidës në 5-0. Takimi mes Watford dhe Crystal Palace, është mbyllur me rezultatin 0-0 dhe skuadrat ndanë nga një pikë./abcnews.al

Sissoko feston golin e tij (74′)

 

Tirana-Kukesi-Abazaj-Superiore.jpg
Veronik Istrefaj17:26 | 07/12/2019

Skuadra e Tiranës e ka mbyllur në avantazh pjesën e parë përballë Kukësit, falë një goli të Edon Hasanit në minutën e nëntë. Ndeshja ishte shumë e luftuar dhe e barabartë në shumicën e pjesës së parë, por ai gol i shpejtë i mesfushorit shkodran bëri diferencën.

Cobinnah shpërthen mirë nga krahu i majtë dhe arrin të driblojë mbrojtësin e Kukësit, Emiliano Musta, dhe topi shkon te Ngoo. Sulmuesi shtatlartë kroson me të majtën dhe gjen saktë Hasanin, i cili zhytet me kokë dhe mposht portierin Xhika.

Pjesa e dytë pritet të jetë edhe më e luftuar mes dy skuadrave, pasi vështirë se Kukësi do të pajtohet me këtë rezultat./abcnews.al

SUPERIORE, JAVA 14
“Selman Stermasi”, Tiranë

Tirana – Kukësi  1-0
Hasani 9′

Ausburg.jpg
Veronik Istrefaj17:12 | 07/12/2019

Ausburg zbriti sot në fushë për t’u përplasur me ekipin e Mainz, sfidë e vlefshme për javën e 14-të në Bundesliga.

Futbollistët e Ausburg bënë një ndeshje shumë të mirë përballë rivalëve të tyre për mbijetesë dhe arritën të përmbysnin atë disavantazh të minutës së 15-të, duke udhëhequr me rezultatin 2-1.

Ausburg pati mundësinë edhe të shënonte golin e tretë, por ishte e pabesueshme ajo që futbollistët kanë humbur.

Ishte mesfushori Vargas ai që shpërtheu nga krahu i majtë dhe doli i vetëm përballë portierit. Zvicerani u tregua altruist dhe pasi te dy shokët e tij që ishin me portën e boshatisur.

Kur dukej gol i sigurt, dy lojtarët e Ausburg katranosin gjithçka dhe topi përfundon jashtë. Ndoshta gafa e vitit në Bundesligën gjermane./abcnews.al

Kane-Son-Lucas-Tottenham.jpg
Veronik Istrefaj16:51 | 07/12/2019

Janë mbyllur pjesët e para të sfidave të orës 16:00 në Premier League. Liverpool kryeson bindshëm 0-2 në transfertë përballë Bournemouth dhe të besuarit e Jurgen Klopp, duken të pandalshëm këtë sezon.

Të kuqtë pritën shumë që të gjenin golin e avantazhit, që erdhi me anë të Oxlade Chamberlain në minutën e 35-të. Anglezi u zgjodh si titullar sot në vend të Mane dhe i shpërbleu besimin trajnerit Klopp. Golin e dytë për të kuqtë, e shënoi një emër surprizë.

Nabil Keita luajti pas shumë kohësh si titullar për Liverpoolin dhe arriti të shënojë në minutën e 44-ët, duke i çuar skuadrat në dhomat e zhveshjes me rezultatin 0-2.

Tottenham po reagon shumë mirë pas asaj humbje ndaj Manchester United dhe po mposht pastër 3-0 ekipin e Burnley. Për të besuarit e Mourinhos, shënuan të tre sulmuesit.

Fillimisht, ishte kapiteni Kane që në minutën e katërt gjeti rrjetën, ndërsa pesë minuta më vonë, shënoi dhe braziliani Lucas. Son në minutën e 32-të, vendosi rezultatin 3-0 të pjesës së parë. Takimi tjetër i orës 16:00 mes Watford dhe Crystal Palace, është mbyllur pa gola në pjesën e parë./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono