us er

boci-homazhe.jpg
us er21:04 | 24/02/2018

6 ditë pasi u dhunua në mënyrë barbare nga të paktën dy persona, Jozef Boci ndërroi jetë të premten në një spital në Londër. 30-vjeçari shqiptar mësohet se jetonte prej vitesh në Britani.

Lajmin e hidhur për ndarjen nga jeta të shqiptarit, krahas mediave britanike, e kanë përcjellë në rrjetet sociale, edhe miq e të njohur të tij. Ata kanë postuar edhe foto nga vendi i ngjarjes, ku kanë vendosur lule e qirinj në nder të 30-vjeçarit.

” R.I.P Jozef Boci. Do të të kujtoj gjithmonë vëlla. I paharruar Jozef Boci… Shpirti N’ Paqe Vlla “, shkruan një mik i tij në rrjetet sociale, teksa poston edhe këtë foto.

Boci pësoi dëmtime të rënda në kokë, pasi u rrah nga disa persona e u godit me sende të forta, në rrugën Greenwich High. Gjithçka, sipas mediave, erdhi pas një sherri mes dy grupeve të ndodhur fillimisht në një lokal aty pranë. Zënka vijoi jashtë në rrugë, ku i riu shqiptar u dhunua për vdekje.

Pavarësisht përpjekjeve të mjekëve, 6 ditë pas kësaj ngjarjeje të rëndë ai ndërroi jetë.

Autoritetet britanike kanë arrestuar 2 persona për vrasjen e Bocit. Ata janë dy të rinj të moshës 20 dhe 21 vjeç, identiteti i të cilëve nuk bëhet i ditur. Hetimet për ngjarjen vijojnë.//tvklan.al

rita-plus-dua.jpg
us er21:02 | 24/02/2018

Njëra shkëlqeu më performancën e saj në skenë. Kurse tjetra tjetra triumfoi me dy çmime. Por askush prej të dyjave nuk u kujtua të urojë tjetrën për suksesin.

Dua Lipa dhe Rita Ora na zbardhën faqen në Brit Awards. Shqiptaret e talentuara kryesuan mbrëmjen më të rëndësishme muzikore në Britaninë e Madhe, por hatërmbetja që përflitet prej kohësh duket se vazhdon t’i shoqërojë. Javën e shkuar përpara ceremonisë Brit Award përplasja mes Dua Lipës dhe Rita Orës kaloi në një tjetër nivel.

Këtë herë haptazi Dua nuk e kurseu ironinë për veshjen e Rita Orës në 10-vjetorin e Pavarësisë së Kosovës, ndërsa kjo e fundit menjëherë publikoi listën e këngëtarëve më të dëgjuar, duke fshirë nga lista emrin e patriotes. Këto veprime mes dy vajzave, të cilat synojnë të kapin majën e biznesit do të dukeshin normale, por mesa duket nuk është ky rasti. Është e qartë tashmë që mes dy yjeve me origjinë shqiptare nuk ekziston një raport miqësor. Vetëm vitin e kaluar janë të paktën dy raste që Dua Lipa dhe Rita Ora ndanë të njëjtën skenë dhe nuk pati një takim mes tyre as nëpër korridore, as këtë herë në Brit Award, këngëtaret nuk u takuan edhe pse patën rastin të ishin më pranë se kurrë fizikisht.

Duke iu rikthyer edhe një herë marrëdhënies së krisur mes dyshes, “Jo Vetëm Modë” zbuloi se përplasja mes tyre daton disa vite më parë. Burime të besueshme për “Jo Vetëm Modë” tregojnë se dikur Dua Lipa kishte kërkuar ndihmën e Ritës dhe ekzaktësisht të motrës së saj të madhe Elenës, e cila njihet edhe si menaxherja e Ritës. Ajo refuzoi në atë kohë të pranonte Duan në kompaninë që merret me zhvillimin dhe promovimin e karrierës së artistëve.

Dhe ky duket se është edhe motivi i vërtetë që mban në distancë shqiptaret e sukseshme. Nga ana tjetër duket se e njëjta arsye ka bashkuar Rita Orën me Bebe Rexhën, të cilat së fundmi janë parë pranë njëra-tjetrës, pasi Bebe i është bashkuar prej një viti së njëjtës kompani ku bën pjesë edhe Rita Ora./tvklan.al

jozef-b.jpg
us er20:56 | 24/02/2018

Një 30-vjeçar shqiptar ka gjetur vdekjen, pas një sulmi brutal të ndodhur në Londër, Britani e Madhe. Jozef Boci u dhunua nga të paktën dy persona më 17 Shkurt. Ai ndodhej në gjendje të rëndë në spital, ku dhe ndërroi jetë të premten, pasi nuk mundi t’i mbijetonte plagëve të marra.

Sipas policisë, vrasja ndodhi pas një debati midis dy grupeve, në një lokal pranë vendit të ngjarjes. Boci pësoi lëndime serioze në kokë, pasi u godit me sende në Greenwich High Road.

Oficerët e policisë dhe Shërbimi i Ambulancës mbërritën në ngjarje rreth orës 2:15, të shtunën.Shqiptari jetonte në Catford dhe mësohet  se të afërmit e tij  janë njoftuar. Sipas mediave britanike, pritet që autoritetet të kryejnë edhe eksperizën mjeko-ligjore.

Inspektori John Massey, duke folur për ngjarjen e rëndë tha: “Ky ishte një sulm brutal dhe frikacak. Ne apelojmë për këdo që ka qenë dëshmitar i këtij incidenti mëngjesin e së shtunës që të ndihmojë me informacion. Informacionet tuaja mund të jenë jetike në identifikimin dhe arrestimin e personave përgjegjës”.

Dy të rinj, rreth moshës 20 dhe 21 vjeç janë arrestuar, si autorë të dyshuar dhe janë lënë në paraburgim./abcnews.al

vlcsnap-error952-1280x720.jpg
us er16:11 | 14/01/2018

Mbi 800 të arrestuar dhe rreth 100 të plagosur është bilanci tragjik i protestave antiqeveritare në Tunizi. Për të shuar valën e demonstratave, qeveria aprovoi një sërë masash për të ndihmuar familjet në nevojë.

803 persona të arrestuar, 97 agjentë të policisë të plagosur, 87 makina të dëmtuara dhe disa kazerma policie të djegura. Ky është bilanci i javës së fundit të përleshjeve dhe trazirave në Tunizi mes manifestuesve të rinj kundër çmimeve të larta dhe forcave të rendit. Mes të arrestuarve janë edhe 16 ekstremistë islamikë.
Kjo është konfirmuar nga zëdhënësja e Ministrisë së Brendshme, Khalifa Chibani.

Gjithashtu është regjistruar dhe një i vdekur në fillim të javës në trazirat në Tebourba. 43-vjeçari, Khemaies Yeferni, u shpall i vdekur në spitalin Rabta në Tunis. Lidhur me rrethanat e vdekjes së tij është hapur dhe një hetim.

Sipas burimeve mjekësore, 43-vjeçari kishte mbërritur në gjendjen e asfikësisë në spital dhe me disa plagë në trup. Ministria e Brendshme e Tunizisë thekson se ai kishte mbërritur në dhomën e urgjencës në një gjendje asfiksie si pacient me astmë.

Ndërkohë, qeveria e unitetit kombëtar njoftoi një sërë masash në favor të familjeve në nevojë me një fond prej 23.5 milionë euro. Ky vendim erdhi për të shuar valën e protestave anti-qeveritare që vazhduan për më shumë se një javë./abcnews.al

Saudi-soccer-slide-8A9P-master768.jpg
us er16:07 | 14/01/2018

Një ngjarje e madhe ndodhi në Arabinë Saudite. Për herë të parë në historinë e Mbretërisë konservatore, femrat patën mundësi të ndiqnin ndeshje futbolli në stadium.

Ende jo barazi e plotë, por gjithsesi hap i rëndësishëm.
Gratë në Arabinë Saudite bënë realitet një dëshirë, duke shkelur për herë të parë në stadium për të parë një ndeshje.
Impianti i parë ku ndodhi risia ishte ai i qytetit Xheda, në përballjen mes ekipeve Al Ahli dhe Al Batini.
Mbretëria konservatore po bën kështu hapat e parë drejt përmirësimit të pozitave të grave, duke hequr dalë nga dalë rregullat për ndarjen e sekseve.

“Së pari, unë ndihem e lumtur për këtë rast të bukur, dhe përgëzoj gratë, vajzat dhe familjet që hynë në stadium. Së dyti, jemi të lumtura sepse jemi tifoze të ekipit Al Ahli dhe patëm mundësi ta mbështesnim në stadium”.

“Padyshim, jemi të lumtura. Kemi udhëtuar jashtë vendit për të ndjekur ndeshje, por tani situata është e ndryshme dhe ne jemi shumë të lumtura dhe të gëzuara”.

Ja edhe një burrë që gëzohet për femrat.

“Kjo ishte shumë e rëndësishme sepse gratë dhe vajzat janë të barabartë në shoqëri dhe kjo na lejon ne që të marrim pjesë në sport në një mënyrë normale, natyrale dhe të përditshme, si një familje. Kjo është një gjë shumë e mirë për shoqërinë, për lojtarët dhe për çdo gjë”.

Për momentin, disa ndarje mbeten.
Stadiumet saudite do të kenë tribuna të veçanta të quajtura familjare, por sidomos do të ketë vendparkime të veçanta për makinat e femrave, dhe po ashtu vendpushime të veçanta.
Natyrisht, ndryshimi nuk mund të vijë në një ditë, ndërsa parashikohet që të ketë edhe reforma të tjera, diçka e paimagjinueshme shumë vjet më parë./abcnews.al

vlcsnap-error532-1280x720.jpg
us er16:02 | 14/01/2018

Ministri i Financave, Arben Ahmetaj, apeloi nga Lezha që të gjithë punëkërkuesit aktivë të hyjnë në kualifikime falas. Arsimi professional, sipas minisitrit të Financave, është garanci për punësimin dhe rritjen e konkurrueshmërisë së ekonomisë.

Ministri i Financave, Arben Ahmetaj, i tregoi nxënësve të shkollës profesionale “Kolin Gjoka” në Lezhë se qeveria po ndërmerr një analizë të detajuar për të afruar nevojat e tregut me ofertën për punë.

“Ajo që unë dua të sjell në vemendje të shkollës, por në vëmendje të gjithë politikëbërësve, është fokusi i kurrikulumit tek ato industri që eksportojnë.
Viti 2017 ka qënë viti i parë kur në kontributin e ekonomisë, eksportet neto kishin kontribut pozitiv, për herë të parë. Po çfarë i bëri eksportet neto pozitive? Shërbimet, eksporti i shërbimeve, turizmi. Këtu duhet të jemi spektakolar, pasi shumë shpejt do të përballemi me sfidën se sa do arrijmë të mbajmë numrat e turizmit.
Në të njëjtën kohë, unë dua t’ju sjell në vëmendje që fundi i 2018, do ketë një moment shumë interesant në vend sa i takon ICT. Kompani serioze, përfshirë partnerë dhe joint vetures të Lufthansa, janë shtruar në tregun shqiptar dhe në fund të këtij viti punësojnë gati 300 punonjës dhe këtu besoj që kurrikulumi duhet të ketë një ngjyrë ICT, të rëndësishme, intensive dhe të shërbyer nga ne”

.
Kualifikimi i punonjësve, sipas ministrit të Financave, është një tjetër aspekt ku do të ndërhyet.

“Duhet të mendojmë më zgjuar për përputhjen me nevojat që ka tregu i punës me atë që afron arsimi profesional dhe me ato që janë në terrenin e punëkërkuesve aktiv. Një punëkërkues aktiv ka nevojë të kualifikohet për të qenë i punësueshëm. Unë jam duke përpunuar një Urdhër të Ministrit të Financave dhe Ekonomisë që do të detyrojë të gjithë punëkërkuesit të shkojnë falas në kualifikime”.

Ahmetaj gjithashtu premtoi kthimin e shkollës profesionale të Lezhës në një qendër multifunksionale model./abcnews.al

vlcsnap-error169-2-1280x719.jpg
us er15:40 | 14/01/2018

Një tërmet i fuqishëm me mganitudë 7.3 ballë i shkallës rihter ka goditur Perunë mëngjesin e së dielës. Lëkundjet sizmike janë lokalizuar 42 kilometra në jugperëndim të Acarit, në bregun jugor të vendit, në një thellësi prej 12 kilometrash. Lajmi është konfirmuar nga instituti gjeofizik amerikan. Mediat ndërkombëtare shkruajnë se nuk ka raportime për viktima apo dëme materiale. Fillimisht qendra paralajmëruese e cunamit në SHBA lëshoi një paralajmërim për rrezikun e një cunami. Por disa orë më vonë e tërhoqi atë dukë theksuar se rreziku ka kaluar./abcnews.al

vlcsnap-error630-1-1280x721.jpg
us er15:36 | 14/01/2018

Mediat amerikane njoftojnë se një shqiptaro-amerikan është drejtues i lartë i ISIS. Emri i tij është Zulfi Hoxha dhe është shfaqur në disa video propagande të organizatës terroriste si “Abu Hamza al-Amriki”.

Media amerikane, “The Atlantic”, i ka kushtuar një shkrim të gjatë një Shqiptaro-amerikani, i cili u bën thirrje myslimanëve në SHBA të kryejnë sulme terroriste. “Të dhënat janë atje, nëse e dini se ku duhet të shikoni. Të shpërndara nëpër qoshet e internetit, ka dëshmi se Zulfi Hoxha, djali i një pronari picerie shqiptaro-amerikane nga Nju Xhersi, kishte plane të këqija”, shkruan “The Atlantic” duke nënvizuar se ai është vënë në krye të Shtetit Islamik të Sirisë dhe Irakut (ISIS).

Hoxha njihet tani si një nga komandantët kryesorë të Shtetit Islamik dhe një nga fytyrat e përpjekjeve të grupit për rekrutim. Sipas të dhënave federale, ai u largua nga SHBA në 6 prill 2015 dhe katër ditë më vonë ndodhej në një kamp stërvitor të ISIS. Për gjashtë, muaj sipas disa zyrtarëve të rendit dhe sigurisë, ai ishte personazh në një video të tmerrshme ku ekzekuton disa pengje.
Këto rrjete janë të rëndësishme për rekrutimin e të rinjve për t’u dërguar në Irak e Siri. Disa prej tyre, si Zulfiu janë lidhur nëpërmjet internetit dhe pastaj me anë të kontakteve të reja, lidhen me ndihmës të ISIS që i sigurojnë udhëtimin drejt Sirisë. Sot, ISIS është duke humbur gjithnjë e më shumë terren dhe pyetja që vijon është ku do të shkojnë këta njerëz që po humbasin luftën?
Në maj 2017, zyra e medias së ISIS, në provincën Nineveh, në Irak lëshuan një video 45-minuta me titullin:

“Ne do t’i kthejmë me siguri në rrugët tona”. Ashtu si shumë video nga ISIS edhe në këtë shfaqen disa luftëtarë vullnetarë nga vende të ndryshme. Një nga njerëzit e maskuar është një amerikan që e quan veten “Abu Hamza al-Amriki”, por në fakt është Zulfi Hoxha. Ai kritikon Amerikën dhe u bën thirrje besimtarëve në SHBA që të bëjne sulme brenda vendit: “A nuk jeni në gjendje që t’ia ngulni thikën një jo-muslimani? Ta hidhni poshtë nga një ndërtesë? Ta shtypni me makinë? Çlirojeni veten nga zjarri i Ferrit duke vrarë një jo-musliman”.

Më pas ai tregon para kamerës disa raketahedhëse, prodhim amerikan, që thotë se ua kanë marrë grupeve të armatosura kurde dhe Shiite pasi ISIS i ka mposhtur në fushëbetejë. Pas një hetimi dyvjeçar të kuadrove amerikane që kanë udhëtuar për në Siri dhe Irak, agjentët federalë më në fund kanë zbuluar se Abu Hamza al-Amriki i videos është Zulfi Hoxha.
Në kohën e regjistrimit të videos Hoxha ishte rreth 25-vjeç. Duke qenë se ka shkuar në Siri më pak se tre vjet më parë, ngjitja e tij në krye të ISIS ka qenë shumë e shpejtë. Ai nuk dihet se ku ndodhet sot, por nisur nga videoja e majit 2017, duhet të ketë qenë në atë kohë në Irakun veriperëndimor./abcnews.al

vlcsnap-error038-1-1280x720.jpg
us er15:34 | 14/01/2018

Në mbikalimin e Fllakës në Durrës kalimi është kthyer në makth. Drejtuesit e mjeteve tregojnë se si ndjehen në këtë segment rrugor.

Ato më me fat i shpetojnë kësaj rruge vetëm me disa manovra. Të tjerë mbeten të bllokuar në gropat e mëdha per disa minuta. Dalja nga autostrada Tiranë-Durrës pranë mbikalimit të Fllakës është kthyer në makthin e të gjithëve.

Shumë drejtues automjetesh, të detyruar ta përshkuajnë këtë segment disa here në ditë, ankohen për gjendjen.
Dy degëzimet sekondare, pa asnje standart sigurie dhe të hapura provizorisht mbeten shkak edhe për aksidente.

Siç shihet nga video, shkëputja nga autostrada bëhet direkt nga korsia e shpejtësisë. Ulja e shpejtësisë dhe frenimi i befasishëm për shkak të gropave, sapo lë autostraden rrezikon përplasjen e automjeteve. Në këto dy nyje dytësore, krahas banorëve të zonës kalojnë dhe automjetet e afro 170 subjekteve private, bizneset e të cilëve shtrihen në të dy anët e rrugës. Pavarësisht rrezikshmërisë së lartë që paraqitet në këtë vend, ende nuk po investohet, ndonëse për vite me radhë është premtuar shumë./abcnews.al

vlcsnap-error884-1280x720.jpg
us er15:30 | 14/01/2018

Në Fier është mbajtur një shërbesë e posaçme për heroin tonë kombëtar Skënderbeu. Ky është qyteti i i parë që kryen një aktivitet të tillë.

Viti i heroit kombëtar ka nisur të kremtohet në Fier dhe ka filluar nga kisha e një shenjtori që mban emrin e Gjergj Kastriotit. Mitropolia e Apollonisë dhe Fierit ia dedikoi shërbesën e kësaj të diele në kishën e Shën Gjergjit, Gjergj Kastriotit dhe veprës së tij.
Mitropoliti Hiresi Nikolla, në këtë shërbesë kishtare përkujtoi jetën dhe veprën e Skënderbeut prej lindjes deri në vdekje. Në këtë shërbesë që është ndoshta nga të vetmet për “Vitin e Skënderbeut”, Hiresia e tij Mitropoliti Nikolla ka thënë se populli shqiptar ka nevojë për heronj të tillë si Skënderbeu.
Heroi kombëtar luftoi deri në fund të jetës së tij jo vetëm për mbrotjen e trojeve shqiptare, por edhe të mbarë krishtërimit, theksoi Mitropoliti Nikolla./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono