nev ila

gjykata-kushtetuese-1280x713.jpg
nev ila17:03 | 15/11/2019

Gjykata Kushtetuese pranoi Marsida Xhaferrllarin si gjyqtare Kushtetuese, duke penalizuar Arta Vorpsin, e cila, edhe pse e renditur e para në vlerësim, nuk është betuar përpara presidentit.

Gjykata tha se nuk mund të merrte në konsideratë rezolutën e Kuvendit për të mos e njohur Xhaferllarin, pasi ende nuk kishte kuorumin për të shqyrtuar në thelb konflikte institucionale.

Pa shkuar ende ora 8, kur fillon zyrtarisht puna në  administratë, si Arta Vorpsi ashtu edhe Marsida Xhaferllari, hynë mëngjesin e kësaj të premteje, në Gjykatën Kushtetuese.

Por, pas një dite të gjatë betejash politike dhe juridike, ca në parlament e  ca brenda gjykatës Kushtetuese, statusin e anëtares e ka marrë vetëm Marsida Xhaferllari.

Anëtarët e gjykatës, Vitore Tusha, Besnik Muci, Elsa Toska dhe Fiona Papajorgji që janë edhe të betuar përpara presidentit, u mblodhën për të shqyrtur përplasjen mes Vopsit e Xhaferllarit për të njëjtën karrige.

Sic ka mësuar ABC News, dy anëtaret e zgjedhura nga Kuvendi kanë mbështetur marrjen e mandatit nga Vorpsi, por Besnik Muci dhe Vitore Tusha janë shprehur se pa u betuar askush s’mund të nisë detyrën. Në këtë barazim votash, diferencën e ka bërë qëndrimi i Tushës, e cila, është edhe duke ushtruar kompetencat e drejtueses së kësaj gjykate.

Në fund, gjyqtarët kushtetues dolën me një deklaratë zyrtare, ku thonë se nuk mund t’i bindjen thirrjes për të mos e njohur si gjyqtare Xhaferllarin.

“Lidhur me Rezolutën e miratuar nga Kuvendi i Shqipërisë, Gjykata Kushtetuese sqaron se, edhe pas plotësimit të disa prej vakancave në përbërjen e saj, nuk e ka ende kuorumin e nevojshëm për të shqyrtuar dhe vendosur në seancë gjyqësore lidhur me kërkesat që paraqiten përpara saj. Për këtë arsye ajo nuk mund të ushtrojë kompetencat e saj thelbësore apo juridiksionale lidhur me zgjidhjen e konfliktit të kompetencave midis pushteteve apo organeve kushtetuese, si dhe as ato kompetenca që lidhen me shqyrtimin e kushtetutshmërisë së akteve të nxjerra nga organet e pushtetit publik”.

Gjykata vijon se është duke ndërmarrë të gjitha hapat e nevojshme administrative formale për fillimin e detyrës së tri anëtarëve të rinj, pas betimit të tyre para Presidentit të Republikës.

Në këtë mënyrë, gjykata lë jashtë trupë Arta Vorpsin, sepse ajo nuk ka bërë betimin tek Presidenti, si gjithë anëtarët e  tjerë. Për të konfirmuar njohjen e Xhaferllarit si gjyqtare, Kushtetuesja publikoi në faqe, listën e gjyqtarëve të saj, të cilët i vihen në dispozicion Presidentit për të zgjedhur KED-në e re.

Aty shihet qartë se  të gjithë konsiderohen gjyqtarë, përfshirë dhe Xhaferllarin, e ku mungon vetëm Arta Vorpsi.

Kjo e fundit do të vijojë të punojë në institucion në zyrën e mëparshme si këshilltare ligjore, të paktën derisa kjo cështje të marrë zgjiddhje përfundimtare./abcnews.al

 

gazetari-antimafia-1280x748.jpg
nev ila16:48 | 15/11/2019

Atentati i dytë brenda pak ditësh ndaj gazetarit italian dhe drejtorit të “Kampania Noticie”, Mario De Mikele, i cili ka shpëtuar për mrekulli. Teksa ndodhej në bord të automjetit të tij, në Kazertano, ai u qëllua me breshëri nga më shumë se një person.

Policia italiane ka nisur hetimet e menjëhershme, dhe pista kryesore është ajo e mafias. Në një reagim të shkurtër vetë Di Mikele u shpreh se kishte frikë, por do të luftonte gjithnjë deri sa vendi ku jetonte të bëhej normal./abcnews.al

DILEMAT-E-DATES-SE-CLIRIMIT-1280x586.jpg
nev ila16:47 | 14/11/2019

Edhe 75 vjetori i çlirimit të vendit i gjen të ndarë historianët dhe politikanët sa i takon datës 28 dhe 29 nëntor. Historianët  për ABC News japin jo dy, por tri data.

Politika dhe historia edhe pas 30 vitesh demokraci, vazhdojnë të jënë të ndarë në dysh për festën e çlirimit. Historiani  Paskal Milo si ditë të çlirimit njeh 29 nëntorin.

Ndërsa Valentin Duka , e cilëson shpikje të Enverit si datë, pasi i bënte hije data më e rëndësishme historike e shqiptarëve, që është 28 nëntori Pavarësia e Shqipërisë.

Si datë  mbi palët historiania Nevila Nika sheh 17 nëntorin çlirimin e kryeqytetit. Ndërsa ndërrimi tri herë i datës për Valentina Dukën është gabim i politikës.

Të  gjithë historianët janë kundër  përzierjes së heronjve të rënë në luftë me ata që kanë vdekur pas 44’,  prezantuar në bulevardin “Dëshmoret e Kombit”./abcnews.al

 

 

 

 

 

agim-kajmaku-kufiri.jpg
nev ila15:43 | 14/11/2019

Prokuroria dhe policia vijojnë kërkimet për Agim Kajmakun ish-kreun e Bashkisë së Vorës, i cili arriti të shpëtonte prangosjes, pasi u njoftua në kohë nga radhët e sistemit të drejtësisë.

Ndërkohë vijojnë negociatat për dorëzimin vullnetar të tij, çka do të sillte automatikisht ulje me 1/3 e dënimit.

Agim Kajmaku ish-kryetari i bashkisë së Vorës, vazhdon të sfidojë autoritetet ligjzbatuese në vend, duke qëndruar në arrati.

I zgjedhur më 30 qershor nga radhët e mazhorancës për të drejtuar bashkinë e Vorës, Kajmaku i shpëtoi prangosjes, duke u informuar në kohë nga seanca me dyert të mbyllura që kishte vendosur ndaj tij masën e sigurisë atë të “arrestit në burg”, kërkesë e bërë nga Prokuroria e Tiranës.

Të gjitha pikat e kalimit kufitar, portet dhe aeroporti janë njoftuar për ndalimin e menjëhershëm të Agim Kajmakut nëse do të konstatohet në kufi. Si masë ekstreme gjykata ka kërkuar që ti sekuestrohet pasaporta.

Prokurori Kolë Hysenaj e akuzon ish-kryebashkiakun e Vorës  për tre akuza; “Shpërdorimi detyre”, “Falsifikim të formularëve” si dhe “ushtrim i funksioneve pas dhënies fund të detyrës”.

Në të njëjtën kohë, vijon negociatat me familjarët dhe avokatin për të bërë të mundur dorëziminin vullnetar të Kajmakut.  Kjo gjë do të ishte një rrethanë lehtësuese për të, duke fituar automatikisht edhe ulje 1/3 së dënimit në procesin gjyqësor.

Nga hetimet rezultoi se Kajmaku nuk e kishte raportuar në formularët e dekriminalizimit se ishte në një proces gjyqësor në Greqi.

Por nga ana tjetër prokuroria pohon se ai është nën hetim edhe për ushtrim të funksioneve pas dhënies fund të detyrës duke qenë se ka shkarkuar dy nënkryetarë te bashkisë pikërisht ditën kur Komisioni Qëndror i Zgjedhjeve i ndërpreu mandatin si edhe ka shpërdoruar detyrën.

Kajmaku ashtu si edhe Valdrin Pjetri, i dorëhequr nga Bashkia e Shkodrës u akuzuan nga Partia Demokratike se kanë qenë të dënuar në vendet e BE-së dhe këtë gjë e kishin fshehur në formularët e Dekriminalizimit. /abcnews.al

Arta-Vorpsi-491x400.jpg
nev ila15:30 | 14/11/2019

Edhe pse neni 129 i Kushtetutës, thotë qartë se mandati i një gjyqtari kushtetues, fillon ditën që betohet përpara presidentit të  Republikës, Arta Vorpsi, e renditur e para nga KED-ja, vendosi të betohet  përpara një notereje.

Në këtë mënyrë, ajo mendoi të tejkalojë Metën, e bashkë me të edhe Kushtetutën që duhet ta mbrojë. Veprimi erdhi menjëherë pasi Presidenti deklaroi se nuk e thërret për betim, sepse për atë vakancë ka dekretuar kandidaten tjetër, Marsida Xhaferllarin.

Vetë noterja ku u krye akti, përjashton të ketë zhvilluar një ceremoni betimi.

Vorpsi ka paraqitur një deklaratë të hartuar jashtë zyrës sime të noterit, erdhi me deklaratën si çdo qytetar tjetër, dhe unë kam vërtetuar vetëm nënshkrimin e saj. Thjesht hodhi firmën në praninë time. Unë nuk mund të marr atributet e Presidentit”, tha ajo.

Veprimi i noteres u mbështet dhe nga dhoma kombëtare e noterëve.

“Noteri thjesht ka bërë detyrën. Përpara noterit është paraqitur një qytetare e cila ka bërë një deklarim, ka shprehur vullnetin dhe noteri është i detyruar në bazë të ligjit për noterinë të bëj vërtetimin e nënshkrimit të qytetarit që është paraqitur pranë tij”.

Presidenti reagoi përmes zëdhënësit duke thënë se nuk pengonte askënd të betohej as tek noteria, as tek parukierja./abcnews.al

kryeprokurori.jpg
nev ila15:00 | 14/11/2019

Këshilli i Lartë i Prokurorisë ka renditur 3 kandidatët për kryeprokuror duke e bërë gati listën për t’ia kaluar kuvendit. Si kandidati më i mirë është vlerësuar Olsian Çela, e dyta Arta Marku dhe e treta Fatjona Memçaj. Gentian Ibrahimi i beri thirrje kuvendit të marre parasysh renditjen e KLP.

Këshilli i Lartë i Prokurorisë ka vlerësuar Olsian Çelën si kandidatin më të denjë për të qenë kryeprokurori i ri i vendit.  Qeveria e prokurorëve ka vlerësuar me 459 pikë Olsian Çela, në me 406 pikë Arta Marku duke e renditur të dytën  dhe me 362 pikë Fatjona Memçajn duke e renditur të tretën.

“Abc News” mëson se mbledhja është zhvilluar me tone dhe debate të ashpra mes anëtarëve të KLP, për shkak të renditjes së Arta Markut dhe Fatjona Memçajt se cila do të zinte vendin e dytë.

Pas mbledhjes, Kryetari i Këshillit të Lartë të prokurorisë Genti Ibrahimi  shprehu besimin se Kuvendi do të marrë parasysh renditjen e miratuar nga anëtarët e KLP

Secili nga prokurorët mund të ankimojë vendimin e KLP në gjykatën Administrative të Apelin, brenda 3 ditëve nga shpallja e vendimit. Por siç parashikohet nga ligji, faza finale për përzgjedhjen e Kryeprokurorit i takon Kuvendit, i cili duhet ta zgjedh më 84 vota, me shumicë të cilësuar.

Nëse parlamenti nuk e zgjedh Kryeprokurorin e ri atëherë lista me emrat e kandidatëve kthehet në Këshillin e Lartë të Prokurorisë, ku Kryeprokuror i vendit zgjidhet i pari në listë./abcnews.al

PRESIDENCA-ILIR-META.mpg_snapshot_06.19-1280x720.jpg
nev ila14:45 | 14/11/2019

Presidenti i Republikës Ilir Meta ka publikuar njoftimin mbi organizimin e ceremonisë së betimit të gjyqtarëve të rinj të Gjykatës Kushtetuese.

Kështu Presidenti ka thirrur në ceremoninë e betimit kandidatet Elsa Toska, Marsida Xhaferllari, dhe Fiona Papajorgji ditën e sotme në orën 19:00.

Presidenti Meta e ka përjashtuar Arta Vorpsin nga ceremonia e betimit të gjyqtarëve të rinj të Gjykatës Kushtetuese. Kjo e fundit u betua sot para noteres si anëtare e Gjykatës Kushtetuese.

Njoftimi i plotë: 

REPUBLIKA E SHQIPËRISË
INSTITUCIONI I PRESIDENTIT TË REPUBLIKËS

Nr. 4312/1 Prot.                                                                                                                                                                                              Tiranë, më 14.11.2019

NJOFTIM  

MBI ORGANIZIMIN E CEREMONISË SË BETIMIT TË GJYQTARËVE TË RINJ TË GJYKATËS KUSHTETUESE. 

Presidenti i Republikës, Sh.T.Z. Ilir Meta, në mbështetje të nenit 129 të Kushtetutës dhe nenit 8 të ligjit nr. 8577/2000 “Për organizimin dhe funksionimin e Gjykatës Kushtetuese”, të ndryshuar, ka vendosur të thërrasë sot për betim, përpara Presidentit të Republikës, anëtarët e rinj të zgjedhur të Gjykatës Kushtetuese.

  • Zonja Elsa Toska e zgjedhur anëtare e Gjykatës Kushtetuese me Vendimin nr. 133/2019 datë 11.11.2019 të Kuvendit të Shqipërisë, thirret për betim përpara Presidentit të Republikës, sot në datë 14.11.2019, ora 19:00.
  • Zonja Marsida Xhaferllari, e emëruar anëtare e Gjykatës Kushtetuese nga Presidenti i Republikës me Dekretin nr. 11350, datë 13.11.2019, thirret për betim përpara Presidentit të Republikës, sot në datë 14.11.2019, ora 19:30.
  • Zonja Fiona Papajorgji e zgjedhur anëtare e Gjykatës Kushtetuese me Vendimin nr. 134/2019, datë 11.11.2019 të Kuvendit të Shqipërisë, thirret për betim përpara Presidentit të Republikës, sot më datë 14.11.2019, ora 20:00.

Ceremonia e betimit zhvillohet në Institucionin e Presidentit të Republikës dhe për këtë ftohen të jenë të pranishëm dhe anëtarët e Gjykatës Kushtetuese dhe Sekretari i Përgjithshëm i Gjykatës Kushtetuese./abcnews.al

 

bano.jpg
nev ila14:37 | 14/11/2019

Sa herë vrenjtet qielli banorët e Laçit i zë ankthi. Ata i frikësohen një tjetër përmbytje të banesave të tyre. Për këtë arsye banorët e lagjes gjashtë të këtij qyteti kanë dalë në protestë.

Shumë familje ende nuk e kanë marrë veten pas përmbytjeve të fundit.Banorët përgjegjës për situatën e krijuar bëjnë Bordin e Kullimit  i cili sipas tyre nuk ka marrë masa për pastrimin e kanaleve kulluese.

Banorët i kërkojnë pushtetit vendor të ndërhyjë  për të shmangur dëmet që mund të vijnë nga ditët me reshje. /abcnews.al

74283295_469402560449389_4595249096981217280_n-800x600.jpg
nev ila14:13 | 14/11/2019

Mediat në Kosovë raportojnë duke publikuar dhe fotografi, se policia çeke ka hyrë në hotelin ku qëndron Kombëtarja Kosovare e Futbollit. Kosova do të luajë sonte ndeshjen e saj të shtatë, në kuadër të kualifikimeve të Kampionatit Evropian, shkruan zeri.info.

Verdh e kaltrit do të luajnë në Republikën Çeke. Ndeshja do të zhvillohet në Plzen, në orën 20:45. Para pak momenteve, hoteli ku po qëndron ekipi i Kosovës është vizituar nga policia çeke. Policia ka qëndruar aty për disa minuta, ndërsa arsyet nuk dihen./abcnews.al

miranda-xhemalce-11-1280x720.jpg
nev ila13:48 | 14/11/2019

Arta Vorpsi u betua para noteres  Miranda Xhemalçe duke marrë detyrën si anëtare e Gjykatës Kushtetuese. Në një prononcim për ABC Neës, noterja është shprehur se gjithçka e ka bërë sipas ligjit.

“Në praninë time duke më vënë në dijeni për çfarë bëhet fjalë. Në bazë të ligjit kam të drejtë të legalizoj nënshkrimet e shtetasve.

Kam legalizuar nënshkrimin e saj. M’u paraqit me kartë. Verifikova kartën dhe nga sistemi dhe kam bërë vërtetimin e nënshkrimit të saj, emër mbiemër.

Deklarata është 20 mijë lek të vjetra, 4mijë lek TVSh dhe 2 mijë lek taksa e pullave. Bëj mbi 10 deklarata në ditë të njerëzve të ndryshëm. Arta Vorpsi është klientja ime, që përpara 5 ose 6 vitesh ka ardhur ka noterizuar dokumente”, deklaroi noterja Miranda Xhemalçe.

Ajo gjithashtu tha se nuk është bërë asnjë ceremoni betimi në prani të saj. Nuk ka qenë një ceremoni betimi por thjesht ka legalizuar një deklaratë ashtu siç e dikton ligji.

Ndërsa për Arta Vorpsin, duke nënkuptuar qëllimin e saj nga formulimi i shkresës, këtë akt ajo e barazon me një betim të bërë sipas kërkesës së Kushtetutës, ndërkohë që për vetë noteren, ky është vetëm një deklarim i bërë në prani të saj, i cili nuk ka vlerën e një betimi, pasi ligji, sipas noteres, nuk i jep asnjë kompetencë të tillë./abcnews.al

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono