Klejdi Kaimi

casilla.jpg
Klejdi Kaimi10:26 | 29/02/2020

Problemet me racizmin vazhdojnë në futboll. Përpos fushatave të shumta nga ana e UEFA-s dhe jo vetëm, ende shumë futbollistë vuajnë në fushën e lojës. Rasti i fundit vjen nga Championshipi në Angli, ku portieri i Leeds United, Kiko Casilla, është dënuar me tetë ndeshje për akuza për racizëm.

Këtë lajm e ka konfirmuar vetë klubi anglez në faqen e tij, duke pranuar dënimin e portierit. Ngjarja e shëmtuar ka ndodhur në shtatorin e 2019, konkretisht në ndeshjen kundër Charlton Athletic. Spanjolli ka fyer lojtarin Jonathan Leko për shkak të ngjyrës së tij dhe sigurisht nuk mund të mungonte një dënim në drejtim të tij.

“Ne si klub jemi totalisht kundër racizmit dhe çdo lloj diskriminimi tjetër në futboll. Gjithsesi portieri jonë i ka mohuar të gjitha akuzat që kanë ardhur në drejtim të tij. Federata e ka dënuar Casilla me 8 ndeshje, por duke mos u bazuar në prova të vërteta. Në javët në vazhdim do të publikohet dhe vendimi i detajuar nga organet përkatëse të FA”, shkruhet në deklaratën e Leeds United. /abcnews.al

Boban.jpg
Klejdi Kaimi09:42 | 29/02/2020

Milan ka disa vite që ka probleme si brenda fushës dhe jashtë saj. Mungesa e lojtarëve me eksperience, ndërrimi i shpeshtë i trajnereve pa përvojë apo dhe shitja e klubit nga ana e kinezëve janë disa nga problemet që kuqezinjtë kanë pasur vitet e fundit. Tashmë duket se ka një tjetër problem në klub, ku kësaj here janë drejtuesit ato që kanë mosmarrëveshje mes tyre.

Drejtori sportiv i Milanit, Zvonimir Boban, akuzon drejtuesin e lartë të kuqezinjve, Ivan Gazidis. Sipas kroatit, CEO i klubit italian ka punuar pas shpinës së drejtuesve të tjerë. Ai gjithashtu deklaron se kjo është mungesë respekti dhe nuk është në stilin e Milanit.

“Deri disa ditë më parë unë besoja se brenda Milanit nuk kishte dy shpirtra. Kjo për shkak se këtu jemi për një qëllim të rikthejmë klubin aty e ka vendin. Fakti që ne nuk po komunikojmë me të nuk i bën mirë askujt. Dhe kjo krizë mes nesh vjen në një moment kur ekipi po rritet gradualisht dhe të gjithë po e shikojnë punën e madhe që po bën Pioli”, deklaron Boban.

“Për të mirën e klubit ne duhet të kemi një takim me pronarët tanë. Ata duhet të jenë të qartë për sa i përket objektivave dhe buxhetit. Na duhet më shumë bashkëpunim me Gazidis, në mënyrë që të jemi më të bashkuar. Për mendimin tim pronarët duhet t’i besojnë personave, të cilët mund të përfaqësojnë historinë dhe vlerat e një klubi të madh siç është Milani”, mbyll drejtori sportiv. /abcnews.al

 

Barcelona-Real-Madrid-Messi-Ramos.jpg
Klejdi Kaimi08:45 | 29/02/2020

Nesër në mbrëmje Spanja dhe jo vetëm do t’i ketë sytë në Madrid, ku pritet të zhvillohet klasikja mes Real Madrid dhe Barcelonës. Të dy ekipet i ndajnë vetëm dy pikë dhe ndeshja e nesërme mund të jetë vendimtare për titullin kampion. Në prag të përballjes ka folur dhe kapiteni madrilen, Sergio Ramos, i cili vlerëson kundërshtarin si dhe shpreson që Leo Messi të mos jetë në ditën e tij më të mirë.

“Ne do të futemi në fushë vetëm për fitore. Që në fillim të takimit duhet të bëjmë presion lart për të mos i lënë që të luajnë lojën e tyre. Ata kanë disa lojtarë shumë të mirë, të cilët mund të jenë lojtarët që do të vendosin takimin. Duhet të tregohemi të kujdesshëm. Jemi shumë pranë në renditje dhe rezultati i nesërm mund dhe të vendos fatet e sezonit”, deklaron 33-vjeçari.

“Messi? Kam shumë respekt për të. Mendoj se ai është një nga futbollistët më të mirë që historia e këtij sporti ka pasur. Shpresoj që të dielën të mos jetë dita e Leos, në mënyrë që ne të bëjmë punën tonë dhe të marrim rezultatin që kërkojmë. I uroj atij më të mirat dhe e ripërsëris se ai është një nga më të mirët”, mbyll spanjolli duke u treguar diplomat me rivalin e tij. /abcnews.al

Internazionale.jpg
Klejdi Kaimi14:15 | 28/02/2020

Ditën e diel pritet të zhvillohet derbi i Italisë mes Juventusit dhe Interit. Supersfida këtë herë do të zhvillohet me dyer të mbyllura për shkak të frikës nga Coronavirusi. Megjithatë ka një lajm të mirë për të gjithë tifozët e Interit.

Portieri zikaltër, Samir Handanovic, do të jetë i gatshëm për ta filluar ndeshjen si titullar ditën e diel. 35-vjeçari nuk ka luajtur në asnjë në gjashtë ndeshjet e fundit që Interi ka zhvilluar për shkak të një dëmtimi në dorë. Slloveni tashmë është rikthyer në stërvitje dhe e ka përfunduar të plotë seancën.

Portieri do të rikthehet në kohën e duhur për milanezët, pasi në ndeshjen e fundjavës vendoset shumë për garën e titullit kampion. Një plus më shumë për Conten, i cili do të tentojë fitoren në derbi. Ndërkohë Gagliardini dhe Sensi nuk do të jenë të gatshëm për teknikun italian për ndeshjen që do të zhvillohet në “Allianz Stadium”, për fat të keq me dyer të mbyllura. /abcnews.al

 

Samir Handanovic
Ibrahimovic.png
Klejdi Kaimi13:54 | 28/02/2020

Duket se ardhja e Zlatan Ibrahimovic i ka bërë mirë Milanit. Që nga fillimi i këtij viti të besuarit e Piolit kanë humbur vetëm një ndeshje dhe kanë më shumë besim kur suedezi është në fushë. Edhe pse tekniku italian ka bërë disa ndryshime në skemat e lojës, Ibra është një nga çelësat e suksesit të kuqezinjve.

Aktualisht kontrata e tij me Milanin është deri në fundin e këtij sezoni. Drejtuesit kuqezi po mendojnë që tani rinovimin me të dhe për të paktën një sezon. Dyshja Boban-Maldini besojnë tek 38-vjeçari, jo vetëm për aftësitë e tij në fushë por dhe për impaktin e tij në dhomat e zhveshjeve.

Sipas “Calciomercato.com”, gjiganti suedez në kontratën e re do të ketë dhe një rritje rroge. Me tifozët që të gjithë e duan, firma me Ibrahimovic do të jetë një plus i madh për ekipin që Milan po ndërton. /abcnews.al

Milan-1-e1576937893762.png
Klejdi Kaimi12:34 | 28/02/2020

Edhe pse sezoni ka ende shumë kohë për të përfunduar, Milani po planifikon ekipin e sezonit të ardhshëm. Drejtuesit kuqezi kërkojnë të ndërtojnë një ekip pretendent, i cili do të luftojë për vendet e para në kampionat.

Dhe për të bërë të mundur këtë zbuluesit e talenteve kanë filluar të monitorojnë disa lojtarë në Europë. Europa League është një kompeticion ku talentet e rinj tregojnë aftësitë e tyre dhe disa vëzhgues të Milanit ishin të pranishëm ditën e djeshmë në ndeshjen mes Benfikës dhe Shaktharit.

Sipas “Calciomercato.com”, Milani në klubin ukrainas kërkon shërbimet e sulmuesit anësor, Dodo. Gjithashtu nën vëzhgim janë dhe mesfushori me tipare sulmuese, Alan Patrick, si dhe braziliani Taison i cili në merkaton e verës ishte shumë pranë transferimit në Milano. Ndërsa nga Benfika të preferuar janë Ruben Dias si dhe sulmuesit Rafa Silva dhe Chiquinho. /abcnews.al

 

Braziliani Taison

 

Pioli-Milan-e1579360858478.png
Klejdi Kaimi11:57 | 28/02/2020

Frika nga Coronavirusi në Itali vazhdon. Bota e sportit është ndikuar shumë nga gripi vdekjeprurës, ku ka detyruar Federatën Italiane që të marrë masa. Ajo ka vendosur që pesë takime të kësaj fundjave të Seria A të luhen pa tifozë, ku pjesë e këtyre ndeshjeve është dhe Milan-Genoa.

Ndeshja që është planifikuar këtë të shtunë do të luhet me dyer të mbyllura. Por nuk mjafton me kaq. Një masë tjetër është marrë dhe nga klubi kuqezi. Konferenca për shtyp e trajnerit Pioli, e cila pritej të zhvillohej ditën e nesërme është anuluar.

Kjo për shkak të Coronavirusit, ku drejtuesit kuqezi kërkojnë të jenë të kujdesshëm. Milan ka njoftuar në faqen zyrtare të klubit se konferenca e trajnerit do të zhvillohet nesër në orën 12, por online. Të gjithë mund ta ndjekin Pioli në kanalin e Milanit apo dhe në aplikacionin kuqezi. /abcnews.al

 

rela1-1280x640.jpg
Klejdi Kaimi09:36 | 28/02/2020

Legjendat e Real Madrid dhe Portos do të rikthehen në fushë. Ish-lojtarët do të bëhen bashkë për të zhvilluar një ndeshje bamirësie, në ndihmë të fëmijëve. Lajmin e ka konfirmuar klubi portugez në faqen zyrtare të saj.

Ndeshja do të zhvillohet në Madrid, në datën 29 mars. Do të jetë mitiku “Santiago Bernabeu” stadiumi që do të hapë dyert për këtë ndeshje. Fitimet nga biletat do të shkojnë për ata fëmijë që i janë bashkuar projektit të madrilenëve në çdo kontinent.

Në foton e publikuar janë edhe disa nga lojtarët që do të marrin pjesë në këtë event. Nga ana e Realit janë të konfirmuar emra si Kaka, Roberto Carlos, Arbeloa dhe Seedorf. Ndërsa për Porton do ta ri veshin bluzen bardheblu emra si Deco, Vitor Baia, Bosingwa dhe Raul Meireles. Futbollistët e tjerë dhe detajet e tjera do të publikohen në ditët në vijim nga ana e të dy klubeve. /abcnews.al

gunnar-solskjaer-e1577606035124.jpg
Klejdi Kaimi08:39 | 28/02/2020

Manchester United nuk është në momentin më të mirë të historisë. Rezultatet në këtë sezon gjithmonë kanë pasur luhatje dhe tifozët nuk janë të kënaqur nga ekipi i tyre i zemrës. Zgjidhjen për të dalë nga kriza e ka menduar pikërisht trajneri, Ole Solskjaer.

Tekniku norvegjez ka vendosur të ftojë në një nga seancat stërvitore Tyson Furyn. Anglezi u shpall kampion bote në WBC ditën e diel, ku mposhti rivalin amerikan Deontay Wilder. Solskjaer e ka ftuar boksierin të mbajë një fjalim përpara lojtarëve për t’i motivuar ata. Fury nuk do të jetë personi i parë që ftohet nga trajneri i “Djajve të Kuq”.

Ai ka ftuar më parë dhe legjendën e klubit, Alex Ferguson. Skocezi e vizitoi ekipin në muajin tetor, përpara ndeshjes me Liverpool, e cila është ndeshja e vetme e të besuarve të Klopp që nuk e kanë fituar. Një i ftuar tjetër është ish-shoku i tij i ekipit, Roy Keane. Pas fjalimit të tij, United arriti fitoren në derbi madje dhe në “Etihad Stadium”. Mesa duket lojtarët kanë nevojë për më shumë motivim dhe trajneri tashmë e di zgjidhjen. /abcnews.al

 

 

 

 

Guardiola-2.jpg
Klejdi Kaimi18:32 | 27/02/2020

Trajneri i Manchester Cityt, Pep Guardiola, mësohet se është sulmuar nga një pirat interneti. Personi në fjalë ia ka arritur me sukses të futet në email-in e spanjollit, ku ka zbuluar çdo bisedë të tij. Policia e Manchesterit e ka arrestuar hakerin, i cili më parë ka punuar për “Qytetarët” në vitin 2017.

Programuesi ka deklaruar për policinë se të hakoje Guardiolën ka qenë një nga gjërat më të lehta për të. Ai ka pasur akses në celularin e 49-vjeçarit, ku ka hyrë në adresën e email-it si dhe në listën e tij të kontakteve. Aty pirati ka zbuluar biseda me lojtarë të ndryshëm dhe transferime të cilat ai ka qenë në bisedime.

Ish-punonjësi i Cityt ka zbuluar bisedat e Guardiolës me Matthijs de Ligt dhe Sokratis Papastathopoulos. Gjithashtu në email-in e teknikut gjenden dhe detaje për lojtarë të ndryshëm si për shembull, ato për Vincent Kompany dhe për Joe Hart. Mësohet se personi i arrestuar ka punuar për Manchester Cityn për dy vite dhe më pas marrëdhënia me kompaninë e tij u ndërpre. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono