in a

jani.jpg
in a17:26 | 28/01/2020

Jan Prenga i cili rezultoi i zhdukur prej 17 janarit. Dyshohet se pas rrëmbimit, viktima është asgjësuar për të humbur gjurmët e krimit.

Të vetmit persona që qëndrojnë në banesën e viktimës, e cila ndodhet në rrugën “Azem Hajdari” në Bathore janë të afërm të familjes Prenga, ndërsa shprehen se policia duhet të zbardhë krimin e rëndë.

Si autorë të mundshëm të ngjarjes makabre janë katër persona dhe disa të tjerë janë shpallur në kërkim. Policia bëri të ditur detaje të operacionit të koduar “Resorti” i nisur të dielën,  ku në pranga përfundoi, Leonard Hajri 36 vjeç, babai i tij Bajram Hajri 64 vjeç, kushëriri Elton Hajri 32 vjeç dhe shoku i tyre Olsi Turja 36 vjeç, të gjithë banues në Shijak.

Nga hetimet rezultoi se, autorët e kanë marrë me forcë në makinë 49-vjeçarin Jan Prenga për ta çuar në kompleksin “Golden” pranë Xhafzotaj të Shijakut, që është në pronësi të Altin Hajrit. Vdekja e Prengës ka ndodhur gjatë rrëmbimit ku edhe ka pasur një përleshje në makinën e tip Range Rover të përdorur nga pengmarrësit, në rrugën “Londër” të Kamzës. Ky automjet u gjet i djegur mëngjesin e 18 janarit në Shkallnur të Durrësit.

Ndërkohë policia konfirmon faktin se trupi i pajetë dyshohet se u dërgua në kompleksin luksoz ku më pas nuk ka më asnjë gjurmë. Dyshimet janë se ekzekutimi dhe asgjesimi i trupit të 49-vjeçarit të jetë kryer për shkak të prishjeve të pazareve të drogës.

Uniformat blu theksojnë se vëllai i Jan Prengës, Astrit Prenga, nuk ka dorëzuar një sasi të konsiderueshme droge që dyshohet se i përkiste vëllezërve Hajri. Kjo është një nga pistat më të forta sipas grupit hetimor ku janë përqendruar kërkimet. Astrit Prenga vuan një dënim në Angli me 8 vite burg, ndërsa vëllai tjetër është në kërkim po për trafik të lëndëve narkotike në Mbretërinë e Bashkuar.

Personat e arrestuar akuzohen për “Rrëmbim personi”, “Fshehja ose asgjesimi i kufomës”, dhe  “Armëmbajtja pa leje./abcnews.al

 

te-moshaurit.jpg
in a17:07 | 28/01/2020

Tërmeti i 26 nëntorit shkaktoi dëme të mëdha në banesën e familjes Xhaferri në Bubq, banesë e cila është e pabanueshme.

Kryefamiljari Xhemali 65 vjeç dhe e zonja e shtëpisë Sanija 64 vjeç shprehen se po jetojnë në kushte të vështira dhe se askush nuk është kujtuar për t’i ndihmuar, ndërsa kryefamiljari tregon se nuk u është ofruar asnjë ndihmë deri më tani dhe gjithçka po e përballojnë me pensionin e tyre të kooperativës.

“Është shumë e vështirë. Kërkojmë ndihmë. Ishalla vë dorë shteti. Ne nuk kemi më moshë për të ndërtuar shtëpinë, na kanë thënë që është e pabanueshme, por nuk po shohim asgjë. Nuk jemi në gjendje për të ndërtuar, thonë mes lotësh të moshuarit.

Prej 26 nëntorit familja me 6 anëtarë jeton në çadër, ku i ftohti dhe lagështira e vështirëson më tej jetesën e tyre.

“Shumë e vështirë, uji ka hyrë brenda, na janë lagur të gjithë rrobat”, tregon e moshuara.

Mes lotësh 64-vjeçarja i bën apel shtetit që të paktën t’u siguroje një strehë për të futur kokën.

“I lutem shtetit ishalla vë dorën në zemër, të mos na lënë në këtë situatë. Duam diçka sa të fusim kokën, mos na lenë në këtë situatë, të mos flemë në çadër”, thotë e moshuara Sanije Xhaferri.

Bubqi është një nga zonat ku tërmeti i 26 nëntorit shkaktoi dëme të mëdha dhe dhjetëra familje jetojnë në çadra, pasi shtëpitë e tyre janë të pabanueshme./abcnews.al

nishani.jpg
in a16:23 | 28/01/2020

Ish-Presidenti i Republikës, Bujar Nishani e sheh pozitiv uljen e mazhorancës dhe opozitës në një tryezë për zgjedhjet e parakohshme, por shprehet i bindur se edhe pas kësaj reforme, kryeministri Rama nuk do ta çojë vendin drejtë zgjedhjeve të parakoshhme.

Në një intervistë për “ABC News”, Nishani thekson se mazhoranca është koshiente për konsumimin politik dhe se përballjen e rradhës që do të ketë në zgjedhje do të shkojë në opozitë.

“Mazhoranca e di fare mirë konsumin e madh politik dhe elektoral që ka te qytetarët. Kjo është e dukshme dhe nuk mbulohet dot me asnjë lloj propagande. Jam i bindur që 70-80% e qytetarëve shqiptarë e ndjejnë mirë peshën elektorale se në cilin krah të politikës ka shkuar. Nuk besoj se ka ndonjë interes mazhoranca për të shkuar në zgjedhje të prakohshme, do të mundohet që ta shtyjë me manipulime që i ka përdorur gjatë këtyre viteve për ta shtyrë deri në fund mandatin e saj”, tha Nishani.

Për Nishanin një sfidë të madhe ka edhe opozita për t’i ofruar një alternativë të besueshme qytetarëve.

 “Çdo moment që do të kemi proces elektoral do të kemi edhe një rotacion të pushtetit. Është e ndjeshme që opozita po vjen shumë afër pushtetit, kjo nuk ka asnjë diskutim. Nuk është e mjaftueshme në gjykimin tim ndryshimi i numrave të përfaqësimit parlamentar. Është shumë e rëndësishme të kemi ndryshim cilësor dhe jo të numrave në Parlament”, tha ndër të tjera Nishani.

Thelbi i reformës zgjedhore për të cilën mazhoranca dhe opozita janë ulur në të njëjtën tryezë, sipas ish-Presidentit duhet të përqëndrohet te dënimi i krimeve zgjedhore.

“Problemi më i madh i yni ka qenë inkriminimi i proceseve zgjedhore, interferimi i krimit dhe i korrupsionit në proceset zgjedhore duke deformuar vullnetin politik të qytetarëve shqiptarë”, tha ish-presidenti Nishani./aabcnews.al

serbi-2.jpg
in a16:17 | 28/01/2020

Në pikën kufitare në mes të Bosnjës dhe Serbisë, një grup turistësh ishte nisur për pushime, por tani udhëtimin e bëjnë në përcjellje për shkak se vijnë nga Vuhan, vendi që u shpall karantinë në Kinë. Xhiroja e tyre në Kroaci e Bosnje u ndoq ka autoritetet e të trija vendeve, ndonëse pa shenja së mund të bartnin virusin vdekjeprurës. Ata tani kanë arritur për disa ditë në Serbi.

“Në bazë të protokolit që kemi dhe nëse gjendet dikush i infektuar që vjen nga Vuhan, atëherë do të izolohet në hapësira të vecanta dhe masa të tjera”, deklaroi epidemiologu Vlladan Shaponic.

Për festën e Vitit të Ri Kinez, me kalendarin lunear, mijëra turistë kinezë kanë shtuar vizitat e tyre viteve të fundit në Ballkan pasi të paktën në Serbi, Bosnje dhe Shqipëri mund të udhëtojnë pa viza. Lehtësira kanë në vendet tjera nëse janë grup. Vetëm në Serbi nëntë muajt e parë të vitit që shkoi kanë zbarkuar 77 mijë turist kinez.

Autoritetet thonë se nuk ka rrezik, por apelojnë tek qytetarët të ndjekin organet zyrtare në rast se gjendja ndryshon. Por, turistët duket se janë mirë.

“Së pari i këshillojmë qytetarët të mos krijojnë panik pasi nuk ka hapësirë për këtë. Qytetarët duhet të ndjekin ministrinë, institutet dhe qëndrat e tjera shëndetësore. Nëse ka diçka qytetarët do të informohen më kohë, por ne nuk presim ndonjë gjë alarmante”, tha më tej Shaponovic.

Ndërkohë kishte dyshime për një rast të një pacienti në Ballkan, por nuk kishte rezultuar i infektuar. Ministria serbe e Shëndetësisë ka thënë se masat janë marrë dhe deri më tani nuk ka raste pacientësh të infektuar./abcnews.al

dd-1.jpg
in a16:06 | 28/01/2020

Kriza institucionale mes Rektorit të Universitetit të Tiranës dhe Dekanëve të disa prej fakulteteve ka bllokuar procesin e Doktoraturave ne institucionin e Arsimit të Lartë më të madh në vend.

Përmes një shkrese drejtuar personelit akadamik të Fakultetit të Shkencave Sociale Rektori, Mynyr Koni vë në pikëpyetje ligjshmërinë e komisionit të përhershëm për dhënien e gradës shkencore “Doktor” dhe akuzon Dekanin, Edmond Rapti për shpërdorim detyre.

Ndërkohë pedagogia e Shkencave Sociale njëkohësisht kryetare e Komisionit Institucional të Zgjedhjeve në Universitetin e Tiranës, Majlinda Keta në një intervistë për “ABC News” thotë se Rektori ka tejkaluar kompetencat e parashikuara në nenin 36 të ligjit për Arsimin e Lartë.

“Rektroi i Universitetit të Tiranës është një nga autoritetet e përgjedhur me anë të votës dhe si i tillë, autoriteti i tij del deri në atë pikë ku vendimi i organeve kolegjiale cënon kompetencën më tej të tij, pasi prish mbarëvajtjen e Universitetitt të Tiranës”, u shpreh Keta.

Në një sistuatë të ngjashme ndodhet Fakulteti Ekonomik, Drejtësia dhe Gjuhët e Huaja. Përplasja po vë në pikëpyetje çeljen e Shkollës Doktorale këtë sezon dhe po pengon pajisjen me titull të atyre që kanë përfunduar ciklin e tretë të studimeve vite më parë.

“Kemi shumë doktorantë që kanë mbrojtur punimet e tyre doktorale dhe ngërçi i tyre ka krijuar që këto të mos jenë pajisur me dokumentacion që për çdo të ri apo të re apo çdo njeri aspirant për këtë titull i pengon karrierat e veta. Të mos harrojmë që në Universitetin tonë këtë lloj karriere e bën aspirant në të gjithë hapësirën shqipfolëse”, theksoi pedagogia e Shkencave Sociale.

Kriza në Universitetin e Tiranës ridel në pah pak ditë pasi ministrja e Arsimit shpalli datën e zgjedhjeve për strukturat drejtuese ne Universitete dhe u la afat këtyre të fundit 15 shkurtin për të aplikuar për Doktoraturat.

“I vë para Minsitres kërkesën që të jenë Asamblatë Akademike që të zgjidhin situatën e ngërçit dhe kjo është lehtësisht e zgjidhshme sepse organet kolegjiale dalin mbi autoritetet dhe e dyta në raportin autoritet asnjë nga palët nuk mund shkelë etikën. Gjithashtu Rektori mbi gjithçka të vendosë interesin e Universitetit të Tiranës”, tha ndër të tjera Keta.

Përplasja mes autoritetit dhe organeve kolegjale në Universitetin e Tiranës vjen si pasojë e vakumit ligjor. Ky insitucion i Arsimit të Lartë në katër vite nuk ka miratuar rregulloren e brendshme të tij dhe funksionon me rregullore të vjetër dhe Statut të 2018./abcnews.al

pensione.jpg
in a15:41 | 28/01/2020

Rreth 16 mijë qytetarë në moshë pensioni do të aplikojnë online për të përfituar pension pleqërie gjatë këtij viti. Por shumë prej tyre nuk janë në gjendje të hyjnë në internet. Sipas tyre aplikimi duhet të vijojë të bëhet në mënyrë tradicionale me dokumenta.

“Nuk di të aplikoj, ne duam të shkojmë ti marrim dhe të vendosim firmën”, thotë një pensioniste.

Por ka edhe nga ato pensioniste që kanë aplikuar  me ndihmën e njerëzve të afërt.

“Nuk mar vesh unë online, edhe pse aplikova nuk kam marrë një përgjigje”, shprehet e moshuara, ndrësa një tjetër qytetare tregon se aplikimin ia ka bërë nusja sepse vetë nuk dinë se si përdoret.

Drejtori i Institutit të Sigurimeve Shoqërore, Astrit Hado sqaron se personat që janë në moshë pensioni dhe nuk mund të aplikojnë nëpërmjet internetit do të asistohen nga ky institiucion.

“Në këto tre katër javë që po aplikohet kjo lloj procedure, pensionistët po asistohen nga punonjësit tanë. Të gjitha atë pensionistë që nuk munden ti bëjnë vetë, e gjejnë derën të hapur”, u shpreh Hado.

Ndërkohë për personat që nuk kanë mundësi të dorëzojnë dokumentat elektronikisht ekziston përsëri mundësia që të aplikojnë me dokumenta fizikë.

“Krahas aplikimit onlinë një lehtësim tjetër që bëhet është numri i dokumenteve që duhet të sjellin. Në ato vende ku nuk kanë pasur mundësi për të aplikuar i kanë sjellë dokumentet si më parë”, tha më tej Hado.

Janë rreth 37 shërbime pranë Institutit të Sigurimeve Shoqërore të cilat që nga 1 janari ofrohen online për të gjithë qytetarët midis të cilëve mund të përmendim pensionin e pleqërisë, të invaliditetit ose pension i ushtarakëve./abcnews.al

roskovec.jpg
in a15:24 | 28/01/2020

Banorët e Roskovecit, ndërtesat e të cilëve duhet të shemben nga projekti për rehabilitim e qendrës së qytetit kundërshtojnë vendimin e bashkisë.

Edhe pse pronarët e një godine janë në proces gjyqësor me bashkinë, ata kanë marrë njoftimin për prishjen e saj.

“Ku do të fle, jam veti i gjashtë, kërkoj zgjidhje të menjëhershme. Dje më kanë thirrur në Bashki më kanë thënë prona i takon bashkisë, me ç’të drejtë. Kur të mbarojë procesi gjyqësor le të vijë aty”, shprehet një banore.

Avokati i banorëve tha se njoftimi për të ndërhyrë forcat e IKMT për të prishur këto objekte është shtyrë.

“Nëse bën një njoftim publik, qytetari quhet i njoftuar pas dhjetë ditëve. Edhe sikur ta marrim të mirëqenë shkresën që për mua është e kundraligjshme, duhen dhjetë ditë që të vijnë dhe ta prishin”, thotë avokati i banorëve.

Nënkryetari Bashkisë Roskovec, Maks Goga u shpreh se plani rregullues për rehabilitimin e qendrës do të vazhdojë sipas projektit.

“Mbështetur në planin rregullues të qendrës së qytetit të Roskovecit të zonës numër dy kanë vazhduar të gjitha procedurat ligjore për problemet e prishjes dhe të shpronësimit. Për problemin në fjalë me vendimin e Këshillit të Ministrave të datës 31 tetor 2019 është shpronësuar i gjithë objekti, kati i parë dhe i dytë. Kati i tretë ka qenë jashtë kushteve ligjore”, u shpreh Maks Goga.

Në bazë të kërkesave ligjore, qytetarëve iu është lënë 5 ditë afat për të liruar godinën./abcnews.al

honda.jpg
in a22:28 | 27/01/2020

Honda ka publikuar detaje të reja rreth modelit Jazz 2020, i cili mbërrin në tregun evropian gjatë verës.

Për herë të parë, blerësve do t’u ofrohet gjithashtu një version crossover për të gjitha terrenet.

Jazz i ri pati premierën botërore në Panairin e veturave në Tokio në tetor 2019, dhe do të arrijë në rrugët evropiane pas gjysmë viti.

Modeli nënkompakt i Honda është modernizuar me stil, por ka ruajtur formën tipike të trupit që karakterizonte gjeneratat e mëparshme të kësaj makine.

Materialet në enterier janë të papërshkueshëm nga uji dhe të qëndrueshme.

Pulti është i përbërë nga një ekran digjital 7 inç, ndërsa në krye të tastierës qendrore është një ekran me prekje multimediale 9 inç.

Sikurse edhe disa Honda të tjera, Jazz i ri ka ulëse praktike të pasme që mund të palosen në dy mënyra – lart dhe poshtë (të ashtuquajturat “ulëse magjike”), duke rritur më tej funksionimin e automjetit.

ku-1.jpg
in a21:47 | 27/01/2020

Ti përkushtoheni punës, të shijoni jetën dhe të flini aq sa të dëshironi, është një sfidë e vështirë për tu arritur. Shumica e njerëzve nuk mund t’i balancojnë angazhimet e ditës duke shkaktuar stres dhe një ngarkesë të tepërt për trurin.

Më poshtë gjeni disa mënyra se si të mund t’i balanconi ato.

Hani ushqime energjike

Nëse dëshironi që të keni energji për të vepruar, hani ushqime që kanë nivele të larta të antioksidantëve, proteinave dhe niveleve të ulëta të sheqerit, yndyrës dhe karbohidrateve.

Peshku, sallata e gjelbër, frutat si avokado, arrat dhe lajthizat janë vetëm disa nga ushqimet që bëjnë pjesë në këtë listë. Ata të cilët nuk konsumojnë ushqime të shëndetshme kur të kthehen në shtëpi nga puna do të ndjehen të lodhur dhe do të dëshirojnë që të flenë menjëherë.

Bëhuni sa më aktiv, ushtrimet të mbajnë në formë

Ushtrimet mund t’iu mbajnë jo vetëm në formë por edhe të shëndetshëm. Ato e forcojnë sistemin tuaj imunitar dhe e përshpejtojnë metabolizmin. Të ushtroni kur zgjoheni nga gjumi, do t’iu ndihmonte për të qenë më energjik gjatë ditës.

Mos flisni për punën në shtëpi

Mbani bisedat për punën larg shtëpisë tuaj. Përveç pjesës kur i tregoni familjes tuaj se si ishte dita juaj mos flisni për punën, por kushtoni kujdes dhe dashuri ndaj familjes tuaj.

Dilni me shoqërinë apo të dashurin/dashurën tuaj

Caktoni një ditë të javës në të cilën do të dilni me shoqërinë apo të dashurin/dashurën tuaj. Mos dilni me kolegët tuaj dhe mos flisni për punën. Shkoni të shikoni një film apo pini kafe.

Kushtojini kohë vetes

Kushtojini kohë vetes duke u marrë me ndonjë hobi apo me gjëra të tjera të cilat iu interesojnë dhe ua largojnë vëmendjen tuaj nga puna. Përmirësojeni veten dhe kualitetin e jetës tuaj.

Fikeni telefonin e punës dhe mbylleni e-mail-in

Pas punës gjithnjë fikeni telefonin dhe mbylleni e-mail-in dhe fokusohuni në jetën tuaj personale. Ngadalë shtoni aktivitete të tjera në jetën tuaj të cilat nuk kanë të bëjnë me punën. Madje edhe gjatë një dite të zënë kushtoni pesëmbëdhjetë minuta në ditë vetes për të bërë një shëtitje të vogël apo për të dëgjuar muzikë.

Capture-148.jpg
in a21:21 | 27/01/2020

Pa marrëveshje ka përfunduar edhe takimi i së hënës ndërmjet udhëheqësve të Lëvizjes Vetëvendosje dhe atyre të Lidhjes Demokratike të Kosovës.

Ndonëse para takimit kreu i LDK-së Isa Mustafa kishte shfaqur vullnetin për arritjen e kësaj marrëveshje.
“Për atë po shkojmë, ne jemi të gatshëm të përfundojmë marrëveshjen”, u shpreh Isa Mustafa. Nënkryetarja e LVV-së, Albulena Haxhiu ka thënë se nuk është arritur marrëveshje por pajtueshmëri për të vazhduar takimet.

Në një postim në “Facebook” Lëvizja Vetëvetëndosje njofton se takimi i radhës do të mbahet nesër në të cilin do të jenë edhe ambasadorët e QUINT-it si dhe shefja e misionit të BE-së në Prishtinë.

Kësaj radhe madje edhe mediat ishin lejuar që të qëndronin në hollin e Kuvendit ku edhe po mbahej takimi. Por me të përfunduar takimi i pari ishte Mustafa që u largua fshehtas nga mediat, ndërsa Kurti shfrytëzoi hyrjen tjetër të Kuvendit edhe ai duke u ikur mediave.
Mediat brenda hollit nuk janë lejuar që të dalin nga objekti i Kuvendit pa u larguar krerët e këtyre partive.
Janë bërë dy muaj nga certifikimi i rezultateve e rreth 4 muaj nga mbajtja e zgjedhjeve në Kosovë, ndërsa Kosova ende është pa qeveri. Mandatari për kryeministër, Albin Kurti ka afat deri më 4 shkurt që të sigurojë shumicën parlamentare për të formuar qeverinë.

/abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono