G. P.

vi-ne-shengjin.jpg
G. P.16:05 | 14/09/2019

Gatimet dhe recetat speciale të kuzhinierëve të njohur në Lezhë janë promovuar në një feste të organizuar nga bashkia në bashkëpunim me ministrinë e Turizmit. Gjatë aktivitetit “Vi n’Shëngjin”, vizitorë të shumtë shijuan ushqimin nën ritmet muzikore.

Lezha sfidon me kulinari. Festa “Vi n’Shëngjin” ku u promovuan gatimet tradicionale mblodhi shumë turistë dhe qytetarë. Pamja e shëtitores është e njëjtë si ajo e sezonit veror.

Kuzhinierët jo pak të njohur të Lezhës prezantuan recetat speciale të restoranteve të zonës. Në aktivitete të tilla nuk mund të mungojnë as këngë dhe valle.   Agroturizmi do të jetë një prioritet për bashkinë dhe do marrë vëmendjen e duhur tha Pjerin Ndreu.

Organizime të tilla bëhen në bashkëpunim edhe me Ministrinë e Turizmit për të mbajtur gjallë interesin e vizitorëve duke e shndërruar Lezhën në një destinacion të turizmit kulinar./ABC News Albania 24/7

70466833_10156987170691523_7845526754268545024_n.jpg
G. P.15:40 | 14/09/2019

Kryeministri Rama ka bërë bilancet e aksionit informalitet të nisur nga qeveria që nga muaji Korrik. Në një postim në rrjetet sociale, Rama ka njoftuar se vetëm në 24 orët e fundit janë kontrolluar 130 pika të tregtimit të karburantit.

Sipas kreut të qeverisë, qysh prej nisjes së operacionit anti-informalitet janë bllokuar nga ana e Inspektoratit Shtetëror Teknik dhe Industrial afro 10 mijë tonë karburant dhe janë penalizuar me gjoba dhe bllokime, për shkelje të cilësisë dhe sigurisë së tregtimit, 24 subjekte.

Kryeministri theksoi se ndaj abuzuesve toleranca do të jetë zero dhe se operacioni anti-informalitet nuk do të ndalet./ABC News Albania 24/7

gazment-bardhi.jpg
G. P.15:29 | 14/09/2019

Në fillim të javës së ardhshme Partia Demokratike do të publikojë dokumentacionin që sipas demokratëve fakton të shkuarën e errët të kryebashkiakut të Vaut të Dejës, Mark Babani. Në një prononcim nga Shkodra sekretari i përgjithshëm Gazment Bardhi njoftoi se aksioni opozitar do të vijojë me një strategji të re që do të jetë gati në ditët në vazhdim.

Ngrenë një akuzë, presin reagimin e më pas publikojnë dokumente që zbardhin denoncimin e bërë më herët. Këtë skemë ka zbatuar Partia Demokratike me Valdrin Pjetrin kryebashkiakun e dorëhequr të Shkodrës, Agim Kajmakun, kryebashkiakun e Vorës ndaj të cilit ka nisur verifikimet Prokuroria e po kështu do të ndodhë me Mark Babanin, kryebashkiakun e Vaut të Dejës. Paralajmërimin ia bën i njëjti që ua ka drejtuar të gjithëve, Sekretari i Përgjithshëm i demokratëve Gazment Bardhi.

“Në fillim të javës që vjen çdo informacion i disponuar nga ne do i bëhet i ditur publikut. Do u prezantojmë qytetarëve dokumentacionin e plotë që kemi me këtë rast”.

Kryebashkiaku i Vaut të Dejës i kundërshtoi më herët akuzat, por numri dy i Partisë Demokratike i dërgon një mesazh nga Shkodra.

“Edhe Valdrin Pjetri e mohoi dënimin e tij në Itali, por më pas u detyrua ta pranonte. Në momentin që PD-ja bën një denoncim ka informacionin e nevojshëm që vërteton akuzën. Ne i jemi drejtuar prokurorisë për të kryer një proces ligjor, por nuk do të presim në pafundësi”.

Në Shkodër gjendej për të marrë pjesë në procesin e zgjedhjeve të sekretariateve në degën e PD Shkodër, por një përgjigje ia dha përsëri ambasadorit të delegacionit të Bashkimit Evropian që ftoi palët të dialogojnë për reformën zgjedhore.

“Shqiptarët nuk kanë nevojë për pazare, apo marrëveshje që zgjidhin kriza momentale , kanë nevoja për marrëveshje afatgjata që kriza të tilla mos të përsëriten më kurrë në Shqipëri”.

Javën e ardhshme do të vendoset edhe strategjia që do të përdoret për të vazhduar aksionin opozitar kundër qeverisë Rama./ABC News Albania 24/7

magazina.jpg
G. P.15:03 | 14/09/2019

Një magazinë me materiale ndërtimi u përfshi nga flakët mesditën e sotme në zonën industriale të Kukësit.

Dy zjarrfikëse prej disa orësh po punojnë për shuarjen e zjarrit. Në magazine ndodhen edhe materiale të ndryshme si goma makinash apo bojëra e kimikate që nxisin zjarrin të përparojë akoma më shumë.

Aktualisht situata është nën kontroll. Nuk dihen ende shkaqet e rënies së zjarrit në magazinë./ABC News Albania 24/7

infektivi.jpg
G. P.14:48 | 14/09/2019

Viroza që mbushi spitalet me pacientë të vegjël e të rritur në fillim të Shtatorit sipas Institutit të Shëndetit Publik ka ardhur për shkak të temperaturave të larta. Përmes një njoftimi për shtyp, ISHP thotë se ka dalë në këtë përfundim pasi ka analizuar mostrat e marra nga pacientë me shqetësime të traktit tretës.

Nga të gjitha rastet e ekzaminuara vetëm 5 raste kanë rezultuar me salmonelë. ISHP thekson se nuk rezulton evidencë për përhapje të këtij bakteri. Ndërkohë në shërbimin infektiv në QSUT fluksi i rasteve me probleme gastrointestinale ka rënë. Instituti i Shëndetit Publik thotë se do të vijojë monitorimin e situatës ndërsa apelon për respektim të higjienës personale./ABC News Albania 24/7

bledi-cuci-1.jpg
G. P.14:44 | 14/09/2019

Rritja e standardeve të sigurisë ushqimore sidomos tek produktet me origjinë shtazore është në fokus të punës së Ministrisë së Bujqësise dhe Zhvillimit Rural. Ministri Bledi  Çuçi e bëri të ditur nga Lezha ku ishte për të parë një nga thertoret ngritur dhe zgjeruar më tej falë fondeve të dhëna nga qeveria.

“Kjo thertore është shembulli më i mirë për të treguar se tashmë i kemi dhënë fund gjithë asaj batërdie që bëhej me therjen e kafshëve jashtë dhe me mungesën e disiplinimit të një prej proceseve më të rëndësishme të sigurisë ushqimore”, tha ministri Çuçi.

Sipas tij Ministria e Bujqësisë dhe Zhvillimit Rural bashkë me agjencitë që ka në varësi, ka nxitur ngritjen e thertoreve me standarde bashkëkohore pasi ky shërbim lidhet direkt me sigurinë ushqimore./ABC News Albania 24/7

pakti-rama-basha.jpg
G. P.14:41 | 14/09/2019

Mundësia e një pakti të ri Rama-Basha, i nxitur nga ndërkombëtarët, trazoi jo pak politikën e brendshme këtë javë. Hapja e negociatave të anëtarësimit me kushte është opsioni që po artikulohet më qartë, e që mund të diktojë fort zhvillimet e ardhshme në vend. Ndjekim Mimoza Koçiun me Politika në ABC News./abcnews.al

190912233528-04-hong-kong-protest-0912-restricted-1280x720.jpg
G. P.14:30 | 14/09/2019

Protesta dhe dhunë mëngjesin e të shtunës në Hong Kong. Qindra mbështetës të Pekinit u mblodhën për të manifestuar në një qendër tregtare, duke mbajtur në duar flamuj kinezë dhe parulla pro Policisë së Kinës.

Mbështetës të reformave pro demokracisë organizuan një kundër protestë. Mes tyre fillimisht kishte ofendime e më pas situata degjeneroi në sulme fizike. Situata u qetësua vetëm pas ndërhyrjes së policisë e cila arrestoi një numër të madh personash./ABC News Albania 24/7

85331cf38f464e8a886572a53b3aeab5_18.jpg
G. P.14:13 | 14/09/2019

Pas shkatërrimeve që la pas uragani Dorian, Bahamas përgatitet të përballet me stuhinë tropikale Humberto, e cila sipas parashikimeve do të shoqërohet me reshje të dendura dhe me erëra me një shpejtësi prej 45 kilometrash në orë.

Autoritetet në vend paralajmëruan skuadrat e shpëtimit, të cilat po kërkojnë ende të zhdukurit si pasojë e uraganit Dorian, se përmbytjet e stuhisë së re mund të pengojnë kërkimet.

Uragani shkaktoi të paktën 52 viktima, rreth 1300 të humbur dhe 15 mijë të pastrehë. Humberto mund të transformohet në uragan dhe të drejtohet në Florida brenda tre ditëve. Aeroportet në ishull janë hapur, por fluturimet janë të kufizuara./ABC News Albania 24/7

protesta-te-reja-ne-france.jpg
G. P.13:59 | 14/09/2019

Paralizohen linjat e metrosë në Paris, pas grevës së paralajmëruar të sindikatave kundër reformave të pensionit të mbështetura nga presidenti Emmanuel Macron. Të hënën në grevë do të hyjnë, mjekë, avokatë, infermierë dhe pilotë avionësh.

Përdoruesit francezë të metrove janë të parët që vuajnë pasojat e përplasjes mes presidentit Emmanuel Macron dhe sindikatave franceze të transportit për sa u përket reformave të pensioneve. Një reformë që anulon mundësinë e punëtorëve të këtij sektori që të dalin në pension në moshën 52 vjeç, pra 10 vjet më parë se pjesa tjetër e punonjësve publikë.

Protestuesit shpjegojnë se sektori i transporteve në Paris nuk ka asnjë privilegj si pretendojnë mediat. Mundësia për të dalë në pension para të tjerëve është shpërblim për kushtet e vështira të punës që ata përballojnë çdo ditë për të ofruar shërbimin publik.

Greva e tyre që sipas organizuesve është më masivja që nga viti 2007, ka paralizuar 10 nga 16 linjat e metrove, duke lënë në këmbë me mijëra persona që u detyruan të gjejnë mënyra alternative për të shkuar në punë.

Një sinjal për presidentin Macron, i cili synon të reduktojë 42 regjime të ndryshme pensionesh, në një sistem të vetëm të bazuar në pikë. Një sezon i ri grevash mund të shkaktojë jo pak problem për presidentin i cili është dobësuar politikisht dhe nga protestat e “Jelekëve të Verdhë”.

Të hënën do të hyjnë në grevë avokatë, mjekë, infermierë dhe pilotët e avionëve. Ndërsa në datat 21 dhe 24 shtator do të hyjnë në grevë dhe tre sindikata të tjera./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono