G. P.

zaev.jpg
G. P.23:59 | 13/02/2019

Liderët politikë në Ballkan kanë reaguar lidhur me aksidentin e së mërkurës në Maqedoni. Kryeministri Zaev ka deklaruar se do të bëjë gjithçka për familjet e viktimave dhe të mbijetuarit, ndërsa Ali Ahmeti, Ramush Haradinaj dhe Edi Rama kanë shprehur pikëllimin e tyre.

Kryeministri i Maqedonisë, Zoran Zaev ka shprehur dhimbjen dhe pikëllimin e tij në lidhje me aksidentin e ndodhur në aksin Shkup-Tetovë, ku humbën jetën 13 persona. Ndërsa u ka bërë ngushëllimet e tij familjarëve të viktimave, Zaev ka theksuar se, qeveria po mobilizon të gjitha forcat dhe kapacitetet për të ndihmuar të mbijetuarit që janë në rrezik për jetën, në mënyrë që të kthehen sa më shpejt tek të dashurit e tyre. Kryetari i BDI-së, Ali Ahmeti, përmes një mesazhi në profilin e tij në Facebook , ka ndarë dhimbjen e tij me familjarët e viktimave.

“Do të jemi pranë tyre dhe të lënduarve, duke vijuar me mobilizimin maksimal të zjarrfikësve, policëve dhe mjekëve për t’iu ardhur në ndihmë të gjithëve”, ka thënë Ahmeti.

Përmes Twitterit, kryeministri shqiptar Edi Rama ka shprehur pikëllimin e tij për tragjedinë e autobusit në vendin fqinj.

“Numri i viktimave e të plagosurve ka tronditur e shqetësuar aq shumë familje. U jemi pranë shpirtërisht të gjitha familjeve dhe të gjithë vendit mik”, ka thënë Rama.

Nga Kosova, kryeministri Ramush Haradinaj është shprehur i tronditur nga ngjarja, të cilën e ka konsideruar një tragjedi të rëndë.

“Një tragjedi që po prek shumë familje, me dhjetëra të lënduar e për fat të keq shumë të vdekur. Ngushëllime të sinqerta për familjet që humbën të dashurit e tyre dhe shërim sa më të shpejtë për të lënduarit”, ka thënë Haradinaj në Facebook.

Edhe presidenti Hashim Thaçi, po përmes rrjeteve sociale, u ka shprehur ngushëllimet më të thella familjeve dhe u ka uruar shërim të shpejtë të lënduarve./abcnews.al

tabelat-maqedoni.jpg
G. P.23:40 | 13/02/2019

Në pikat kufitare të Maqedonisë janë vendosur tabelat e reja me emërtimin e ri të vendit, Maqedonia Veriore. Në gjuhën shqipe janë vetëm tabelat në Tabanoc, Bllacë dhe Qafëthanë, ndërsa në pikat e tjera shqipja mungon.

Fillimisht u mbuluan tabelat ku shkruante emri tanimë i vjetër i shtetit. E më vonë arritën edhe tabelat e reja. Në shqip është tabela me emrin e ri që u vendos në kufirin me Serbinë, e doganat e Maqedonisë së Veriut kanë afat 3 ditor që t’i ndryshojnë të gjitha.

Por kjo nuk është ajo që populli grek e ka kërkuar, thotë gazetari, Hristos Nikolaidis, për shkak se edhe tek emri i ri, përdoret termi “Maqedoni”.

Hristos Nikolaidis, gazetar: “Shumica e opinionit grek beson se termi “Maqedoni” është grek, dhe nuk guxon askush ta përdor pa lejen greke. Ky është mendimi i opinionit grek dhe mediat në Maqedoni nuk e kanë të qartë se çfarë ndodh në Greqi. Mendoj që shumica e votuesve do të duan që ta ndëshkojnë qeverinë greke dhe Sirizën për këtë marrëveshje”.

Edhe tabela pas zëdhënësit të qeverisë ishte me emrin e ri dhe në dy gjuhë, e do të ndërrohen edhe në institucionet tjera, por kanë afat 4 mujor./abcnews.al

arrestime.jpg
G. P.23:01 | 13/02/2019

Policia italiane ka gjetur kokainë dhe një arsenal të vërtetë armësh në banesën e dy të rinjve shqiptarë 25 dhe 27 vjeç në Pontasieve, Firence. Efektivët shkuan në banesën e të rinjve, pasi kishin arrestuar 27-vjeçarin. Ai u prangos me urdhër të Prokurorisë së Firences, për llogari të një dënimi penal të pakryer prej 2 vjet e 9 muajsh burg për vjedhje banesash dhe largim nga masa e “arrestit shtëpiak”.

Gjatë kontrollit të banesës, karabinierët gjetën një sasi prej gati 1 kilogramë kokaine, ende e pandarë në doza të vogla, disa gram marijuanë, 5 pistoleta, 3 armë gjysmë-automatike dhe 2 revolverë. Efektivët gjetën edhe shumë aparatë telefonësh celularë dhe tableta, që mendohet të jenë të vjedhura. Ndërsa shoku i tij i shtëpisë, 25-vjeçari me origjinë shqiptare, u arrestua për mbajtje lëndësh narkotike dhe mbajtje e paligjshme e armëve dhe sendeve të vjedhura./abcnews.al

sali-berisha-1-2.jpg
G. P.21:31 | 13/02/2019

Qëllimi i opozitës nuk është bojkotimi i zgjedhjeve. I ftuar në emisionin “Byro Politike”, ish-kryeministri Sali Berisha u shpreh se opozita nuk do t’i braktisë zgjedhjet.

“Kjo është një tur interesant që fjalën e kanë qytetarët. Mesazhi i Bashës është që 16-a është fjala juaj, dita juaj. Opozita nuk braktis zgjedhjet. Qëllimi i asj final janë zgjedhjet. Opozita po bën gjithçka për zgjedhje të vërteta. Koha është dytësore. Në funskion të këtyre është edhe koha. Rëndësi ka që opozita para shqiptarëve dhe botës të krijojë, të sakrifikojë për një proces zgjedhor që e meritojnë qytetarët e këtij vendi”, u shpreh Berisha.

Kur para dy vitesh opozita luftoi kundër kanabizimit, sipas Berishës tani kemi kaluar nga shiu në breshër, pasi është zëvendësuar me drogat e forta.

“Tani që kanabisi u zëvendësua me kokainë dhe heroinë, u kalua nga shiu në breshër. Për fatin tonë më të keq ne kemi përdorimin më të lartë të kokainës. Ne jemi renditur vendi i parë në botë për përdorimin e kokainës. Pakësimi i kanabisit është njëlloj si të thuash anafalbetizmi u zhduk, por u shtua injoranca”, tha Berisha./abcnews.al

sali-berisha-3.jpg
G. P.20:59 | 13/02/2019

Para pak javësh në Kuvend pati një debat me tone të ashpra mes kryeministrit Rama dhe ish-kreut të qeverisë, Sali Berisha. Edi Rama gjatë fjalës së tij tha se Sali Berishës i është refuzuar viza për në SHBA.

Por i ftuar në emisionin “Byro Politike”, ish-kryetari i Partisë Demokratike deklaroi sërsih se nuk ka aplikuar, madje as nuk ka ndërmend të aplikojë. Ai tregoi gjithashtu se Donald Lu i kishte sugjeruar që të bnte dhe një vizitë në SHBA, por Berisha e refuzoi pasi nuk është më person zyrtar.

“Nuk kam marrë kurrë një mesazh të tillë. Që nga data e fundit kur kam qenë për një vizitë për pavarësinë nuk kam aplikuar asnjëherë dhe po ta them që nuk kam ndërmend të aplikoj. Këtë gjë ia kam përcjellë, para tre vjetësh Donald Lu. Ai në mënyrë të sinqertë më sugjeroi që duhet të bëja një vizitë.

Jo ambasador i thashë, jo aty po askund. Pse? Sepse nuk jam më person zyrtar. Miqtë e mi mund ti takoj në udhëtime turistike. Nuk kam aplikuar dhe nuk kam marrë kurrë mesazh. Kush më njeh mua e di që nuk kam pasion udhëtimet. Ishte invension i një shpifaraku që nuk ka moral. Të shkoj në një zyrë dhe në emër kujt të flas unë?”, theksoi Berisha./abcnews.al

byro-1280x594.jpg
G. P.20:33 | 13/02/2019

Marrëveshja e 18 Majit mes Lulzim Bashës dhe Edi Ramës ka pasur shumë kritika, por ish-kryeministri ka deklaruar në emisionin “Byro Politike” se e ka mbështetur gjithmonë atë. Megjithatë ai theksoi se ajo marrëveshje ka vdekur, pavarësisht se Edi Rama përpiqet ta përdorë për interesa të tij.

Për Berishën, marrëveshja e 18 Majit kishte qëllim që shqiptarët të votonin të lirë.

“Sot nuk ka njeri që mund të thotë se këtu mund të bëhen zgjedhje. Mos harroni, nuk jam unë autori i marrëveshjes së 18 Majit, por jam mbështetës i saj. E deklaroj edhe sot. Marrëveshja ka vdekur dhe nuk kthehet më. Edi Rama e paraqet për interesa të veta që të duket sikur nuk ka vdekur. Lulzim Basha ia ka bërë të qartë që ajo marrëveshje ka vdekur. Qëllimi i saj ishte vetëm që shqiptarët të votonin të lirë. Nuk ka zgjedhje të lira nëse kryeministri vendos të vjedhë zgjedhjet”, tha Berisha.

Përsa i përket protestës që pritet të mbahet më 16 Shkurt në Tiranë, kryeministri Berisha tha se ajo do të jetë një përballe historike./abcnews.al

berisha-1280x608.jpg
G. P.20:25 | 13/02/2019

Për ish-kryeministrin Sali Berisha, protesta që pritet të mbahet të shtunën është një përballje historike. Ai solli në vëmendje në emisionin “Byro Politike”, dy nga vjedhjet më të mëdha të zgjedhjeve sipas tij. Përsa i përket zgjedhjeve të 2017-s, ai theksoi se raporti i OSBE/ODHIR rrëzon çdo zgjedhje pasi blerja e votave arriti në 20%.

“Protesta është një përballje historike, në një mision historik. Në pluralizmin shqiptar dy kanë qenë grabitjet më të mëdha elektorale. Ishte viti 2001 vit në të cilin opozita ia doli të mbledhë dokument pas dokumenti dhe të ndryshojë raportin e OSBE, të detyrohet të thotë në raportin përfundimtar ku opozita solli fakte që provuan dhunimin dhe marrjen e mandateve. Çfarë ndodhi në 2017-n? Një raport i OSBE-së që thekson se blerja e votave arriti në 20%. Mjafton kjo për ata që lexojnë që të rrëzojnë çdo zgjedhje. Me 20% të blerjeve të votave nuk ka më vlerë. Opozita u gjet pa provat e nevojshmë të këtij 20%. Kaloj koha dhe doli dosja famoze 339”, tha Berisha.

Kjo dosje, e cila është e insitucioneve shtetërore tha Berisha faktoi se në qytetet kryesore në Shqipëri u përdorën bandat për të vjedhur zgjedhjet. Sipas ish-kreut të PD-së dosja 339 ka ende mijëra faqe të pazbardhura.

“Tani jo më dokument i opozitës, por institucioneve shtetërore, ku faktohet se në Durrës, në Lezhë, në Elbasan, u përdorën bandat dhe qenë ato që përcaktuar zgjedhjet. Bandat u përdorën të lidhur me ministra gjer dhe kryeministrin. Dosja edhe sot ka mijëra faqe të pazbardhura sepse duhet që nuk ka ndëshkueshmëri për qeveri, nuk ka ligj për Edi Ramën. Opozita ka meritën e madhe. Një mirënjohje Zërit të Amerikës që ka dhënë vetëm një pjesë, majën e ajsbergut të asaj dosje”, u shpreh Berisha./abcnews.al

aksidenti.jpg
G. P.19:49 | 13/02/2019

13 persona kanë humbur jetën dhe dhjetëra të tjerë kanë mbetur të plagosur si pasojë e një aksidenti rrugor të ndodhur në Maqedoni, ku një autobus humbi kontrollin dhe doli nga korsia e qarkullimit, në aksin Tetovë-Shkup.

 

Një aksident tragjik me 13 viktima ndodhi pasditen e së mërkurës në Maqedoni, në autostradën Tetovë-Shkup, pranë fshatit Llaskarcë. Një autobus me pasagjerë ka humbur kontrollin, ka dalë nga rruga dhe është përmbysur. Bilanci i viktimave u konfirmua nga ministri i Shëndetësisë, Venko Filipçe në një konferencë për shtyp, ndërsa zëvendësministri i Brendshëm, Agim Nuhiu deklaroi se ekipet e policisë, shëndetit publik dhe zjarrfikësit koordinuan operacionet për t’u ardhur në ndihmë të mbijetuarve.

Nga goditja e fortë, rreth 40 persona të tjerë mbetën të plagosur dhe u dërguan nga ekipet e emergjencave në spitalet e Shkupit. Një  pjesë e mirë e tyre janë nga Gostivari. Lajmin e bëri të ditur kryetari i kësaj komune, i cili saktësoi se disa prej të lënduarve janë në gjendje kritike për jetën. Ndërkohë raportohet se mes pasagjerëve është edhe një grua shtatzënë, e cila ndodhet po ashtu në gjendje të rëndë në Qendrën e Urgjencës në Shkup. Për zbardhjen e shkaqeve të aksidentit është hapur një hetim nga Prokuroria Themelore, e cila ka dërguar ekspertët e saj në vendin e ngjarjes. Burime nga ky institucion kanë deklaruar se prokurorët e çështjes do të urdhërojnë autopsinë e viktimave, si dhe analizat e gjakut të shoferit të autobusit./abcnews.al

 

PANUCI-FLET-PER-SKOCINE-1280x720.jpg
G. P.19:25 | 13/02/2019

Gjykata e Tiranës hodhi poshtë padinë e trajnerit të kombëtares shqiptare të futbollit, Kristian Panuçi, ndaj ish-Presidentit të Republikës, Bujar Nishani. Panuçi kishte kërkuar dëmshpërblim nga ish-kreu i shtetit për prishje të imazhit.

Nishani e quajti Panuçin “sharlatan që po shkatërronte atë që ishte ndërtuar”, pas ndeshjes mes Shqipërisë dhe Kosovës ku kuqezinjtë u mundën thellë me rezultatin 3 me 0. Për këtë koment trajneri italian kërkoi 100 mijë Euro dëmshpërblim, por që u rrëzua nga Gjykata e Tiranës./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono