G. P.

nafta.jpg
G. P.23:45 | 21/10/2019

SHBA-ja po mban disa trupa pranë fushave të naftës në verilindje të Sirisë për t’i mbrojtur ato nga militantët e Shtetit Islamik, njoftoi të hënën Sekretari i Mbrojtjes Mark Esper.

Një autokolonë prej më shumë se 100 mjetesh mbushur me trupa amerikane kaloi në Irak nga Siria të hënën, një lëvizje që pason urdhërin për tërheqje nga Siria veriore dhënë nga Presidenti Donald Trump. Por zoti Esper tha se disa forca amerikane do të vazhdojnë të patrullojnë ende pranë fushave të naftës përkrah Forcave Demokratike Siriane të udhëhequra nga kurdët.

Shefi i Pentagonit tha se nuk është marrë ende ndonjë vendim afatgjatë “në lidhje me numrin e trupave apo diçka të lidhur me të” dhe se asnjë plan nuk i është paraqitur Presidentit Trump. Të dielën zoti Trump shkruante në twitter se “SHBA po garanton fushat e naftës”.

Tërheqja e trupave me urdhër të Presidentit Trump ka zemëruar kurdët në veri të Sirisë, të cilët kanë luftuar përkrah forcave amerikane kundër terroristëve të Shtetit Islamik. Tërheqja u pasua nga ofensiva turke në veri të Sirisë.

Të hënën zoti Trump i tha anëtarëve të kabinetit të tij se SHBA-ja “nuk është angazhuar të luftojë krah kurdëve për 400 vjet” për t’i mbrojtur ata.

Javë e kaluar SHBA-ja ndërmjetësoi një armëpushim pesëditor me Turqinë për t’i dhënë luftëtarëve kurd mundësinë për t’u larguar nga kufiri ku Turqia dëshiron të vendosë një “zonë të sigurt” 32 kilometra të gjerë.

Zoti Trump tha se armëpushimi kryesisht po respektohet pavarësisht disa përleshjeve të armatosura.

Ai tha se luftëtarët kurdë po largohen nga zona e sigurt “ndonëse jo me shpejtësi, por me kujdes” siç tha ai.

Zoti Trump tha se “nëse Turqia nuk sillet siç duhet SHBA-ja do t’i vendosë tarifa e sanksione”, ndonëse siç tha nuk do të donte që një gjë e tillë të ndodhte.

Presidenti turk Rexhep Tajip Erdogan përsëriti të hënën se ofensiva kundër luftëtarëve kurdë do të rifillojë nëse ata nuk tërhiqen nga kufiri turk deri në momentin e përfundimi të afatit të asaj që ai e quan pauzë e ofensivës. Armëpushimi përfundon të martën në mbrëmje.

Falë vendimit për tërheqje të trupave amerikanë, Rusia, aleati i Presidentit sirian Bashar al-Asad, po mbush vakumin e krijuar në veri të Sirisë. Edhe pse Turqia është një vend aleat i NATO-s, zoti Erdogan pritet të takohet me Presidentin rus Vladimir Putin në Moskë për të hartuar strategjinë e tyre për Sirinë.

Pa dhënë shumë detaje zoti Erdogan tha gjatë një forumi në Stamboll të hënën, se me zotin Putin do të ndërmarrin hapat e nevojshëm për verilindjen e Sirisë.

Të hënën autokolona me trupa amerikane që u fut rajonin e Kurdistanit të Irakut u gjuajt me patate të kalbura nga banorë të zonës ndërsa kalonte në qytetin e Duhok-ut. Sekretari i Mbrojtjes Mark Esper tha se të gjitha forcat amerikane që do të largohen nga Siria do të vendosen në Irakun perëndimor dhe mund të kryejnë operacione antiterror kundër Shtetit Islamik.

SHBA-ja ka aktualisht rreth 5 mijë trupa në Irak bazuar në një marrëveshje mes Bagdadit dhe Uashingtonit. Trupat u tërhoqën në vitin 2011 kur operacionet uashtarake atje përfunduan, por u rikthyen pas tre vitesh kur Shteti Islamik mori kontrollin e pjesës më të madhe të vendit, territor që e humbi sërisht më vonë.

Sekretari Esper tha se marrëveshja e nënshkruar të enjten e kaluar për armëpushim pesëditor mes forcave turke e kurde në veri të Sirisë “duket se po respektohet”.

Turqia njoftoi se një prej ushtarëve të saj u vra dhe një tjetër u plagos të dielën pas një sulmi të milicisë kurdo-siriane YPG në Tel Abyad në verilindje të Sirisë.

Ndërkohë një përfaqësues i grupit kryesor kurd në Siri i Forcës Demokratike Siriane (SDF) ndodhet në Uashington për bisedime me zyrtarët amerikanë./VOA

vrasjaa.jpg
G. P.23:10 | 21/10/2019

Një biznesmen me lidhje të forta politike dhe 3 persona të tjerë do të përballen në gjykatë me akuzën e vrasjes së një gazetari sllovak dhe të fejuarës së tij, vitin e kaluar. Kjo ngjarje u pasua me dorëheqjen e kryeministrit Robert Fico dhe disa demonstrata në shenjë proteste ndaj ekzekutimit të tij.

Autoritetet sllovake ngritën këtë të hënë akuza ndaj një biznesmeni të njohur si dhe tre personave të tjerë të dyshuar për vrasjen e një gazetari dhe të fejuarës së tij vitin e kaluar, ngjarje që çoi në dorëheqjen e kryeministrit Robert Fico.

Sipërmarrësi me lidhje politike Marian Kocner dhe dy bashkëpunëtorë të dyshuar të tij, u deklaruan të pafajshëm. Një i dyshuar i katërt pranoi se ka qëlluar ndaj gazetarit Jan Kuçiak dhe të fejuarës së tij Martina Kusnirova. Ndërkohë një person i pestë ka pranuar se ka ndihmuar për të kryer vrasjen. Ai ka bërë një marrëveshje me prokurorët duke pranuar fajin dhe po shërben si dëshmitar në procesin ndaj katër të tjerëve mbi të cilët rëndojnë akuzat për vrasje.

Një zëdhënëse e zyrës së prokurorit të shtetit, e cituar nga Zëri i Amerikës, tha se 4 të dyshuarit mund të përballen me burgim të përjetshëm për gjashtë akuza, përfshirë vrasjen me paramendim. Njoftimi nënkupton përfundimin e fazës hetimore të çështjes, e cila është parë si një provë për policinë sllovake dhe pavarësinë e gjyqësorit.

Vrasja e Jan Kuçiak-ut nxiti demonstrata masive kundër korrupsionit vitin e kaluar dhe detyroi kryeministrin Fico të japë dorëheqjen, pas rreth 12 vitesh në këtë pozicion. Zbulimi i lidhjeve mes biznesmenit Koçner dhe zyrtarëve të sigurisë të cilat u ekspozuan gjatë hetimit çuan në dorëheqje të tjera gjatë javëve të fundit. 27-vjeçari Jan Kuçiak dhe fejuara e tij Martina Kusnirova u qëlluan në shtëpinë e tyre në ndodhej në periferi të kryeqytetit, Bratislavë në shkurt të vitit 2018. Prokurorët thanë se biznesmeni Kocner, subjekt i një materiali investigativ lidhur me një çështje korrupsioni që po përgatiste gazetari Kuçiak, kishte porositur vrasjen gjë që biznesmeni e ka mohuar./ABC News Albania

zv-ministri.jpg
G. P.22:56 | 21/10/2019

Pothuajse të gjithë shtetasit shqiptar që ndodhen në kampin e kontrolluar nga kurdët në Siri, janë të identifikuar nga autoritetet shqiptare. Zv/ministri i Jashtëm Eltien Xhafaj, i ftuar në emisionin “Opinion” në Tv Klan për të folur për rastin e 11-vjeçarit Alvin që gjendet në këtë kamp i vetëm, thotë se operacioni në situata të tilla është delikat.

Sipas tij, autoritetet shqiptare janë në kontakt të vazhdueshëm me shtetet partnere të angazhuara në riatdhesimin e shtetasve të huaj që ndodhen në Siri, të cilët kanë luftuar apo kanë qenë pjesë e ISIS. Zv/ministri Xhafaj theksoi se shqiptarët që kanë shkuar në Siri për të luftuar me ISIS, nuk kanë hyrë apo regjistruar me emrat e tyre realë, por me emra arabë.

Për të rikthyer Alvinin, Eltien Xhafaj thotë se do të përdoret e njëjta procedurë sikurse do të veprohet me të gjithë shtetasit e tjerë.

“E gjithë historia në fjalë është një gjë shumë prekëse. Është një gjë shumë e vështirë për të komunikuar. Pavarësisht momentit kur emisioni ka zgjedhur të kontaktojë ambasadorin, ka pasur prej muajsh përpjekje aktive të shtetit shqiptar për të arritur të lidheshin kontaktet.

Mënyra që kanë zgjedhur dhe shtete të tjera është duke vendosur kontakt në terren. Nëpërmjet partnerëve të huaj jemi lidhur prej kohësh. Kemi të dhëna mbi ato që janë presupozime. Por një nga pjesët e domosdoshme për t’u bërë edhe identifikimi në terren. Nuk mund të kaloj në detaje operacionale. Ajo që mund të them është që ne jemi në komunikim të vazhdueshëm për të mundësuar këtë kthim. Kemi informacion të detajuar, por nuk është ndarja specifike. Shumica e shqiptarëve nuk kanë më dokumentin e tyre shqiptar. Ose emrat me të cilët janë të regjistruar nuk janë emrat e tyre shqiptarë, por emrat arabë.

Me djalin do të veprohet në të njëjtën mënyrën që do të veprohet me të gjithë të tjerët. Ajo që bëhet duke i mediatizuar këto raste është që ekspozohet. Ka një operacion, ka një konsensus të lartë. Kosova ka bërë një operacion tepër specifik që ka qenë i pari i llojit të vetë. Pasi e bëri Kosova kemi nisur edhe ne kontaktet. Shqipëria ka bërë disa hapa që ka qenë ndërtimi i të gjithë strukturës operacionale”, deklaroi zv/ministri i Jashtëm i Shqipërisë, Eltien Xhafaj. /tvklan.al

protesta-2.jpg
G. P.22:09 | 21/10/2019

Të paktën 11 persona kanë humbur jetën në Kili si pasojë e protestave të dhunshme që kanë përfshirë vendin pas rritjes së çmimit të biletës së metrosë. Por, ky vendim është pezulluar nga presidenti i vendit, ndërkohë në kryeqytet është shpallur gjendja e jashtëzakonshme.

Ka shkuar në 11 të vdekur bilanci i viktimave gjatë protestave në Kili, aty ku prej ditësh protestohet për shkak të rritjes se çmimeve të transportit publik. Situata vijon të jetë kaotike, për shkak të përplasjes së dhunshme mes forcave policore dhe protestuesve.

Në kryeqytet është shpallur gjendja e jashtëzakonshme. Policia konfirmoi plagosjen e 156 agjentëve dhe 11 civilëve si dhe arrestimin e 300 personave. Të gjitha aktivitetet kulturore dhe sportive janë anuluar dhe dyqanet janë të mbyllura ashtu si dhe i gjithë rrjeti i transportit.

Gjendja kaotike ka shkaktuar dhe plaçkitjen e supermarketeve dhe dyqaneve. Sipas mediave në vend, tre persona mbetën të vrarë si pasojë e një zjarri të shpërthyer në një supermarket në San Bernardo.

Zjarrfikësit gjetën dy trupa të djegur, ndërsa viktima e tretë ndërroi jetë në spital. Pesë persona të tjerë humbën jetën në zjarrin që iu v një fabrike veshjesh e cila u plaçkit, në periferi të kryeqytetit. Dhe 3 viktima të tjera humbën jetë si pasojë e zjarrit këtë herë në nje magazinë materialesh për ndërtim.

Presidenti i Kilit deklaroi pezullimin e rritjes së çmimit të biletave të metrosë, një nga vendimet më të fundit për rritjen e çmimit të jetesës, që shkaktoi dhe zemërimin popullor.

Në një deklaratë për mediat kreu i shtetit tha se kishte vendosur të dëgjonte me përulësi zërin e popullit dhe do të vazhdonte ta bënte, sepse vetëm kështu ndërtohen demokracitë./ABC News Albania

arben-pellumbii.jpg
G. P.21:41 | 21/10/2019

Sekretari organizativ i Partisë Socialiste, Arben Pëllumbi, deklaroi në televizionin ABC News se selia rozë është e gatshme të futet në zgjedhje të parakohshme nëse e kërkon elektorati.

Por sipas tij është shumë e rëndësishme që të realizohet reforma zgjedhore. Kjo pasi, reforma do të plotësonte kushtet që zgjedhjet e ardhshme të njihen nga forcat politike.

Mirela Milori: Më thatë që PS është e gatshme të hyjë në zgjedhje. Nëse e keni këtë siguri përse nuk mendoni që të hyni në zgjedhje të parakohshme dhe të fitoni?

Arben Pëllumbi: Politika nuk është kështu. Nuk është se na mbushte mendja dhe bëjmë çdo gjë. Ne jemi përfaqësues. Jemi votuar dhe një elektorat i caktuar i joni na ka votuar për të bërë qeverisjen e vendit në katër vjet. Humbja e mazhorancës, zgjedhjet e parakohshme duhet të kenë arsye shumë të forta. Ose duhet të humbësh mazhorancën në parlament ose duhet të ndiesh që nuk ke mbështetjen e elektoratit.

Mirela Milori: Edhe JO-ja e negociatave është arsye e fortë.

Arben Pëllumbi: Ne mendojmë që çështja e negociatave bën mirë të mos artikulohet kaq shumë se në fund fare në elektorat përkthehet si në një mbështetje për ne. Patëm një mbështetje të qeverisë gjermane, asaj italiane, të DASH. Franca nuk e ka ndryshuar pozicionin e Francës dhe është drejtpërdrejtë në raport me BE-në.

Mirela Milori: Nëse jeni kaq të bindur për fitoren pse nuk hyni në zgjedhje?

Arben Pëllumbi: Duhet fillimisht të kemi kushtet e përshtatshme për të bërë një palë zgjedhje për të mos qenë një palë zgjedhje që prapë s’njihen. Hë për hë është reforma zgjedhore.

Mirela Milori: Nëse do e keni këtë reformë zgjedhore mund të filloni të mendoni për opsionin e zgjedhje të parakohshme?

Arben Pëllumbi: Nëse elektorati na e kërkon, PO./abcnews.al

opelii.jpg
G. P.21:21 | 21/10/2019

Katër anëtarë të një familje mbetën të plagosur pas një aksidenti që ndodhi në Bradashesh të Elbasanit pasditen e së hënës. Bëhet fjalë për dy prindërit, Matilda dhe Marjus Çela si dhe dy fëmijët e mitur Ergi dhe Marvi.

Familja Çela po udhëtonte me një automjet tip “Opel” në momentin që u përplas me një “Benz”. Të katër anëtarët e familjes pësuan lëndime për shkak të tronditjeve të forta.

Raportohet se ata ndodhen nën kujdesin e mjekëve dhe fatmirësisht janë jashtë rrezikut për jetën. Abcnews.al ka siguruar fotot e aksidentit ku duken qartë dëmtimet që kanë pësuar dy makinat.

Makinat e përfshira në aksident

“Opeli” me të cilin udhëtonin katër familjarët ka pësuar dëmtime të shumta në krahun e majtë të saj.

Makina ku udhëtonte familja Çela

Policia po vazhdon punën për të zbuluar shkaqet dhe rrethanat e plota të ngjarjes./abcnews.al

arben-pellumbi.jpg
G. P.20:48 | 21/10/2019

Do të presin për PD-në, por jo në pafundësi. Është ky përfundimi i PS-së në lidhje me komisionin për reformën zgjedhore.

Deputeti i saj, Arben Pëllumbi, deklaroi këtë të hënë në televizionin ABC News se nëse PD është e interesuar për reformën duhet të ulet dhe të fillojë puna.

Nëse PD nuk ulet, por vazhdon me qëndrimet ultimative, atëherë sipas deputetit do të realizohet një Kod i ri Zgjedhor i bazuar vetëm në rekomandimet e ODIHR.

“Ne mendojmë që rruga e vetme në të cilën mund të kryhet reforma është në përmjet komisionit që është rruga institucionale. PD nëse është e interesuar i ka të gjitha mekanizmat brenda këtij komisioni për t’i arritur çështjet që asaj i interesojnë sikurse ne kemi pikësynimet tona. Ne duhet të ulemi dhe të flasim për këtë gjë, duhet të fillojë puna për këtë gjë. Ne nuk do të presim në infinit. Nëse PD mban këtë qëndrimi refraktar si sot që thotë o kështu siç them unë o jo ne do të ecim përpara me reformën në parlament. Ne kemi bërë një sugjerim tonin që në raste se do të ecim në këtë rrugë që nuk e duam, por do jemi të detyruar të ecim, atëherë ndryshimet që do bëjmë në Kodin Zgjedhor do kenë të bëjnë vetëm nga rekomandimet e OSBE/ODIHR dhe nuk do reflektojmë në to asnjë nga kërkesat që kemi ne si forcë politike”, tha Pëllumbi.

Sekretari organizativ në PS ta gjithashtu se problemi në Shqipëri nuk është me sistemin zgjedhor. Sipas tij, duhet të ketë një administratë zgjedhore, e cila duhet të jetë jo politike.

“Ne si forcë politike jemi të hapur për ta diskutuar, por mendojmë që sistemi nuk ka nevojë për ndryshime, por ne jemi të hapur për të diskutuar nëse gjenden argumentet për të na bindur në këtë gjë. Shqipërisë nuk i vjen e keqja nga lloji i sistemit, por si e përdor sistemin që ka në dispozicion. Çdo lloj sistemi në vetvete është demokratik dhe nxjerr një produkt demokratik po e zbatove siç duhet. Çdo sistem ka të mirat dhe të këqijat e veta.

Kjo është një gjë që dëshirojmë ta zbatojmë që ta çdepolitizojmë sistemin e administratës zgjedhore. Që nga KQZ dhe gjithçka poshtë. E gjithë administrata zgjedhore duhet të jetë jo politike. Në 2003-2004 kemi patur administratë jo politike”, tha Pëllumbi./abcnews.al

ambulancee-933x445.jpg
G. P.20:29 | 21/10/2019

Një i ri është gjendur i vdekur nga familjarët e tij në Ksamil. Bëhet fjalë për 30-vjeçarin Ervis Oruçi. Ai është një person me precedentë të mëparshëm penal për vjedhje dhe shitje narkotikësh.

I riu ishte i divorcuar dhe përdorues i lëndëve narkotike. Prej një muaji Oruci kishte dalë nga spitali psikiatrik i Vlorës dhe paraprakisht dyshohet se shkak për vdekjen është bërë mbidoza e ilaçeve.

Megjithatë pritet hetimi nga autoritetet për të zbuluar shkaqet dhe rrethanat e plota të vdekjes së të riut./abcnews.al

ISLAMAJ-KPA-1280x720.jpg
G. P.20:26 | 21/10/2019

Kolegji i Posaçëm i Apelimit lë në fuqi vendimin e KPK për prokurorin Ramadan Troci, i cili është shkarkuar nga detyra. Komisioni i Pavarur i Kualifikimit e kishte shkarkuar prokurorin Ramadan Troci më 15 Nëntor 2018.

Prokurori Ramadan Troci e kishte ankimuar vendimin më 8 Janar 2019. Troci ka punuar në Bulqizë, Dibër dhe Tiranë. Troci në 2014-n u komandua në krye të Prokurorisë së Vlorës dhe prej 2016 ishte prokuror në Prokurorinë e Përgjithshme./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono