G. P.

rrethrrotullim-sauku.jpg
G. P.16:23 | 24/06/2019

Pas aksidentit tragjik në rrethrrotullimin e Saukut, janë shtuar disa elemente te sigurisë rrugore. Por, sipas ekspertëve të fushës ka shumë shkaqe për aksidente të tilla fatale.

Kjo ishte tek rrethrrotullimi i Saukut në Tiranë rreth 1 javë më parë. Sot pamja që gjeti kamera e ABC News ishte e tillë. Duket se diçka ka ndryshuar sa i takon rritjes së sigurisë.

Fatkeqësisht shumë vonë për një familje nga Tirana që një javë më parë humbi  3 anëtarë të saj në një aksident pranë këtij vendi.

Përfundimet e ekspertizës zyrtare për shkaqet e këtij aksidenti që i mori jetën dy bashkeshortëve dhe vajzës së tyre ende nuk kanë dalë. Por Autoriteti Rrugor Shqiptar mori disa masa, duke vendosur tabela pulsuese dhe fosforeshente në mënyrë që drejtuesit e mjeteve të kenë disa lehtësi më shumë kur qarkullojnë në këtë aks.

Por, sipas ekspertit autoteknik të sigurisë rrugore Islam Qibini, sinjalistika në këtë rrethrrotullim përsëri ka mangësi edhe pse sapo është vendosur.

“Në segmentin rrugor ku ka ndodhur ky aksident dhe drejtimi i veturës tip “BMË” kemi sinjalistikë vertikale dhe horizontale. Kemi sinjalistikë vertikale për kufizim shpejtësie nga 80, 60, 40 deri në 20, por kemi pa plotësuar me sinjalistikë të ndritshme. Bordura e këtij rrethrrotullimi duhej të ishte me fosforeshente. ME vendosjen e pulsanteve të ndritshme, i tërheqin vëmendjen drejtuesit të mjetit, i cili detyrohet për të ulur shpejtësinë  dhe për të qarkulluar në mënyrë normale në rrethrrotullim”, tha ai.

Ndër shumë shkaqet për numrin e lartë  të aksidenteve rrugore me pasoja fatale për jetën, sipas Qibinit është edhe mungesa e patrullave të Policisë Rrugore në akset problematike.

“Nuk është organizuar, planifikuar dhe dislokuar forcat e shërbimeve të policisë rrugore  në pikat ku ka fluks dhe volum të madh të lëvizjes së mjeteve”, u shpreh Qibini.

Për të ulur vdekshmërinë nga aksidentet rrugore, eksperti sugjeron zbatim më të rreptë dhe në vazhdimësi të Kodit Rrugor.

“Kohët e fundit këto detyra që janë të përcaktuara në Kodin Rrugor nuk po zbatohen. Janë zbehur kërkesat e Policisë Rrugore nga atyre drejtuesve, të cilët përdorin pije alkoolike, ecin me shpejtësi ose përdorin celular gjatë drejtimit të automjetit”, tha Qibini./ABC News Albania 24/7

MBULIM-SHULLAZI.mpg_snapshot_00.32-1280x720.jpg
G. P.16:01 | 24/06/2019

Dështon sërish nisja e procesit gjyqësor në Gjykatën e Apelit për Krime të Rënda për grupin e Emiljano Shullazit. Shkak për këtë dështim është bërë fakti se gjyqtari i tretë i caktuar nga Këshilli i Lartë Gjyqësor Arben Vrioni nuk është paraqitur.

Drejtuesja e seancës Albana Boksi u shpreh se nga kancelaria e Gjykatës së Apelit Durrës i ka mbërritur një shkresë ku i komunikohet se Gjyqtari Vrioni ka marrë raport shëndetësor deri më datë 29 Qershor.

Gilmando Dani i kërkoi drejtueses së seancës Albana Boksi që të japë dorëheqjen. Kjo për shkak se, sipas të pandehurit Dani, kjo gjyqtare ka dhënë një vendim pro Ylvi Beqajt, ndaj nuk mund të jetë e paanshme.

I pandehuri Dani i kërkoi  gjithashtu gjykatës që të thirren në gjyq avokatët e zgjedhur prej tyre dhe të mos njoftohen më ata të caktuar kryesisht./ABC News Albania 24/7

zaev-2.jpg
G. P.15:35 | 24/06/2019

Pas paralajmërimeve të shumta, në fundjavë u konfirmuan ndryshimet në qeverinë e Maqedonisë së Veriut, me propozimet që u dorëzuan në parlamentin e vendit. Por cilët janë ministrat e rinj në një kohë që kryeministri Zaev është vetëpropozuar për postin e ministrit të Financave.

Kryeministri Zaev veten e ka propozuar Ministër të Financave, kurse ministri i deritashëm Dragan Tevdovski do të jetë këshilltar i tij. Në biografinë e Kryeministrit, krahas karrierës profesionale, shkruan se është rritur në një familje modeste, tradicionale dhe se që nga rinia e hershme është kycur në biznesin familjar të bujqësisë.

Për Goran Milevskin, liderin e Partisë Liberal-Demokrate, i cili do të jetë ministër i Pushtetit Lokal, shkruhet se para se të bëhet deputet, ka qenë profesor i lëndëve ekonomike në një shkollë të mesme të Manastirit, kurse lidhur me njohuritë përmenden MS Office dhe Internet, kurse flet edhe anglishten.

Hysni Ismaili, është propozimi i alternativës për Ministër të Kulturës. Ai me profesion është Doktor i Shkencave Mjekësore, kurse para se të bëhet docent në Universitetin e Tetovës, ka qenë profesor në shkollën e mesme të mjekësisë në Tetovë.

Krahas gjuhës shqipe, flet edhe gjuhët maqedonase, turke, angleze, e boshnjake. Lidhur me aktivitetet e kulturës, në biografi shkruhet se ka qenë redaktor i librit, organizator i panairit të parë të librit të botuesve privat shqiptar, redaktor i radio-dramave dhe të 90 radio-emisioneve nga fusha e kulturës, redaktor dhe udhëheqës i 80 programeve dokumentare televizive na gjuhën shqipe dhe njëri prej themeluesve të shtëpisë botuese “Logos A”. Në biografinë e tij përmenden edhe një numër i madh i punimeve shkencore nga fusha e mjekësisë.

Ministër i ri i Ambientit Jetësor do të jetë Naser Nuredini, i cili është shkolluar për Biznes Ndërkombëtar në Austri, Gjermani dhe Britaninë e Madhe. Në grafën për gjuhët, thuhet se flet shqipen, anglishten, gjermanishten dhe italishten, kurse flet edhe gjuhën maqedone dhe serbo-kroate.

Sadulla Duraku do ta udhëheq Ministrinë për sistem politik. Përveç funksioneve politike, në përvojën e punës përmenden edhe punësimet në dy shkolla të mesme në Kumanovë.

Në Ministrinë e Bujqësisë duhet të emërohet Trajan Dimkovski, i cili deri më tani ka qenë shef i kabinetit të paraardhësit të tij Lupço Nikolovski. Përveç punës në Ministri, ka përvojë edhe në Këshillat drejtuese dhe shoqata nga fusha e bujqësisë./ABC News Albania 24/7

izmir-smajlaj.jpg
G. P.17:45 | 23/06/2019

Atleti shqiptar Izmir Smajlaj vendos rekord të ri kombëtar në kërcim së gjati. Shkodrani u shpall kampion i Shqipërisë me rezultatin 8 metra e 11 centimetra.

Synon ta përsërisë këtë rezultat të jashtëzakonshëm. Izmir Smajlaj dëshiron të jetë sërish kampion i Europës, siç u bë dy vjet më parë në Beograd, por ndërkohë nuk rresht së arrituri suksese të tjera.

Jo vetëm u shpall sërish kampion kombëtar në kërcim së gjati, në garën e zhvilluar në “Loro Boriçi” të Shkodrës, por edhe sepse vendosi një rekord të ri. Hedhja e tij, që e postoi vetë kampioni në rrjetet sociale, ishte 8 metra e 11 centimetra, plot 8 centimetra më shumë sesa rekordi i mëparshëm që mbahej po nga ai vetë.

Atleti shkodran mund të thuhet se krijoi një normalitet, pasi përpara këtij rekordi, kërcimin më të mirë e kishte në salla të mbyllura, dhe pikërisht në finalen e Kampionatit Europian të vitit 2017 në Serbi, ku fitoi medaljen e artë me rezultatin 8 metra e 8 centimetra.

Sportisti më i mirë i Shqipërisë për meshkuj falenderoi publikisht në Facebook, familjen, trajnerin Gjergj Ruli njëkohësisht president i Federatës së Atletikës, miqtë dhe tifozët.

Në moshën 26-vjeçare dhe me shtatlartësinë e admirueshme prej 1 metër e 96 centimetrash, Smajlaj besohet se mund ta përmirësojë disa herë në të ardhmen rekordin e tij, për t’iu afruar rekordit botëror prej 8 metrash e 95 centimetrash, dhe rekordit europian prej 8 metrash e 86 centimetrash.

Tashmë, Smajlaj është pjesë e klubit sportiv Tirana, i financuar nga bashkia e kryeqytetit, duke qenë në kushte më të mira se në të kaluarën./ABC News Albania 24/7

goditje-dielli.jpg
G. P.17:15 | 23/06/2019

Temperaturat e larta kanë shtuar fluksin e pacientëve në spitale. Mjekët apelojnë për kujdes të shtuar ndërsa thonë se shqetësimi kryesor këto ditë të nxehta janë goditjet nga dielli.

Pa një çadër apo një shishe ujë vështirë se mund të lëvizësh nëpër qytet. Temperaturat kanë arritur pikun ndërkohë që jo të gjithë i kanë gjetur të përgatitur.

Mjekët tregojnë për një fluks të shtuar të pacientesh. Shqetësimi më i shpeshtë i tyre janë goditjet nga dielli.

“Shenjat kryesore,janë lëkura. Edhe pse temperatura e organizmit është mbi 40 gradë nuk ka djersitje, është si e skuqur në prekje dhe e nxehtë. Personat shpeh ankohen për një dhimbje koke të fortë dhe mund të shkojë në të vjella. Janë shenja që duhen marrë seriozisht sepse janë deri kërcënuese për jetën”, tha mjeku i përgjithshëm Renald Daka.

Apeli i mjekëve vjen për kujdes të shtuar sidomos për të sëmurët me hipertension, probleme kardiovaskulare, diabet apo probleme të shëndetit mendor.

“Personat kardiopatë ose diabetikët, duhet të bëjnë kontroll tek mjeku i familjes ose mjeku specialist në qoftë se është nevoja për të ndryshuar terapinë”, tha mjeku Daka.

Shmangia e aktivitetit fizik në orët e nxehta të ditës, konsumi i sa më shumë lëngjeve, vakteve të lehta, por dhe mos ekspozimi në diell do të evitonte problemet shëndetësore në këto ditë me temperatura të larta./ABC News Albania 24/7

gazment-bardhi-1.jpg
G. P.16:30 | 23/06/2019

Kanë për qëllim të rrëzojnë mendësinë shqiptare se çudia më e madhe zgjat tre ditë. Pas përgjimeve të publikuara nga gazeta gjermane Bild, demokratët nuk duan të qëndrojnë vetëm tek konstatimi i krimit elektoral, por edhe te ndëshkimi i vjedhësve të votave.

Krimet zgjedhore të Edi Ramës nuk mund dhe nuk do të kalojnë pa u ndëshkuar. Dhënia fund e pandëshkueshmërisë së politikanëve dhe kriminelëve që kanë vjedhur zgjedhjet është rruga e vetme për të garantuar se në Shqipëri nuk do të ketë më masakra elektorale me bashkëpunimin e qeverisë me krimin”, tha Bardhi.

Duke i risjellë në vëmendje përgjimet e fundit të publikuara nga gazeta Bild, sekretari për çështjet ligjore në Partinë Demokratike Çlirim Gjata ndalet në bisedën e ish-ministrit Damian Gjiknuri me Imer Lalën.

Dhënia e parave nuk kalon pa u ndëshkuar u kujton Çlirim Gjata. Sipas demokratëve përgjimet e Dibrës faktuan se ne kryeministrin Rama nuk ka fshehtësi të votës. Në mënyrë të përmbledhur sekretari i përgjithshëm tregon se çfarë i pret ata që kanë kryer krime elektorale.

“Këto janë krime zgjedhore që një drejtësi e pavarur do ti kishte ndëshkuar me të paktën 30 vjet burg për të gjithë ata që janë përfshirë në shkelje të ligjit”, u shpreh Bardhi.

Për Partinë Demokratike kjo kohë nuk është e largët, kur si kryeministri, si krimineli,si qytetari i zakonshëm janë të gjithë të barabartë përpara ligjit./ABC News Albania 24/7

shurdhim.jpg
G. P.16:15 | 23/06/2019

Kufjet për të dëgjuar muzikë janë bërë pjesë e pandashme e të rinjve, por kjo tendencë e tyre po shihet me shqetësim nga mjekët. Specialistët apelojnë për kujdes, ndërsa shprehen se përdorimi sistematik i tyre çon deri në shurdhim.

Rruga bëhet më e këndshme, por kjo mund të shoqërohet me kosto të lartë. Përdorimi sistematik i kufjeve për të dëgjuar muzikë mund t’ju çojë deri në shurdhim. Tendenca e të rinjve shihet me shqetësim nga mjekët otorinolaringolog.

“Me përdorimin kronik të kufjeve për një periudhë mbi tre-mujore e sipër mund të japë dëmtime kronike të nervit të dëgjimit. Niveli i zhurmës që të japë dëmtime kronike duhet të jetë mbi 80 decibel, pra 65-70 mund të jetë niveli i zhurmës që prodhohet kur bashkëbisedojmë. Mund të shkaktojë dhe probleme të tjera, janë dhe infeksionet e kanalit”, tha mjekja Anjeza Kuçi.

Mjekët shpjegojnë se problemet nuk shfaqen në mënyrë të menjëhershme ndërkohë apelojnë për kujdes.

“Pas përdorimit mbi tre muaj gradualisht mund të ndiejë një zhurmë në vesh. Gjatë bashkëbisedimit me të tjerët, mund të humbë informacion, mund të ngatërrohen fjalët, shpeshherë disa fjali mund të mos i dëgjojë të gjitha dhe kjo i krijon probleme, të cilat nëse pacienti nuk paraqitet direkt tek mjeku mund të krijojë probleme kronike, dëmtime të nervit të dëgjimit, të cilat mund të jenë edhe të parikthyeshme”, u shpreh Kuçi.

Rënia e nivelit të dëgjimit sipas specialistëve nis pas të 40-tave, por të shumte janë 20-vjeçarët që aktualisht po shfaqin këtë problem. Veç uljes së dëgjimit, zhurmat e vazhdueshme shkaktojnë stres madje dhe neurozë./ABC News Albania 24/7

image-1429684-860_poster_16x9-arer-1429684.jpg
G. P.16:00 | 23/06/2019

Një grup intelektualësh grekë i kanë bërë thirrje liderit të opozitës Qirjakos Micotaqis të anulojë marrëveshjen e Prespës nëse zgjidhet kryeministër. Përmes një letre, ku argumentojnë se marrëveshja në fjalë dëmton Greqinë, intelektualët i kërkojnë kryetarit të Demokracisë së Re që ta shpallë vendimin e tij përpara zgjedhjeve të 7 Korrikut.

Dhjetëra personalitete greke kërkojnë nga lideri i opozitës Kyriakos Mitsotakis, që të anulojë marrëveshjen e Prespës në rast se do të jetë kryeministri i ardhshëm i Greqisë pas zgjedhjeve të 7 Korrikut. Letra e hapur kërkon që në rreshtat e parë që lideri i opozitës greke të bëhet, siç shkruajnë, “flamurtari i anulimit të kësaj marrëveshjeje të rëndë për Greqinë”.

Shumica e grekëve e perceptojnë Marrëveshjen e Prespës si një humbje kombëtare dhe katastrofë, nënvizohet në letrën e nënshkruar nga pedagogë, historianë, ushtarakë, juristë, diplomatë dhe biznesmenë, dhe që është nisur nga Selaniku. Ata i bëjnë thirrje zotit Mitsotakis që ta shpallë vendimin e tij për anulimin e marrëveshjes së Prespës, para zgjedhjeve të 7 Korrikut.

“Është e sigurt që populli grek do t’ju shpërblejë me votën e tij”, nënvizohet në këtë letër që u publikua pasditen e të shtunës në portalin e gazetës konservatore Kathimerini.

Sipas tyre, “marrëveshja shkel Kushtetutën e Greqisë, por edhe parime themelore të së drejtës ndërkombëtare”. Ende nuk ka ndonjë reagim nga ana e partisë më të madhe opozitare greke, Demokracia e re, kryetarit të së cilës i drejtohet letra e hapur. Demokracia e Re e ka kundërshtuar në mënyrë konstante marrëveshjen e Prespës.

“Mirëpo Kyriakos Mitsotakis ka deklaruar vazhdimisht që përderisa marrëveshja është votuar nga parlamenti, një qeveri e drejtuar prej tij do të kujdeset që ajo të zbatohet në mënyrë sa më korrekte dhe germë për germë. Gjithsesi, publikimi i letrës së hapur është dhe një sfidë për liderin e opozitës, i cili deri tani duket se u ka rezistuar tundimeve populiste”./ABC News Albania 24/7

festa-e-grurit.jpg
G. P.15:45 | 23/06/2019

Në Pojan të Fierit, Festa e Grurit është kthyer në tradite. Në këtë ditë këndohet e kërcehet ndërsa sipas traditës pulat e detit piqen në saç.

Pojani i Fierit, një nga 100 fshatrat turistike shqiptare, u kthye në qendër të festimeve dhe traditës myzeqare. Dita e grurit, mblodhi bashkë me qindra banorë, të zonës. Myzeqesë si dikurshme mund t’i jenë ulur statistikat e sipërfaqeve me grurë, por jo këngët, vallet dhe gatimet që lindën 50 vite më parë dhe nuk u shuan kurrë.

Është Qershor dhe në Myzeqe, ky muaj është nga më të rëndësishmit për ekonominë bujqësore. Edhe pse në sipërfaqe më të vogla, rrallë gjen familje rurale fierake të mos kultivojë grurë.

Midis legjendave të dikurshme për sigurimin e bukës së përditshme, të garantimit të një ekonomie të qëndrueshme familjare, e përcjellë mes një gëzimi të pashoq folklorik dhe gastronomik, në Pojan të Fierit u festua Festa e Grurit.

“Festa është krejt e veçantë pasi vjen nga ajo që është thelbi i jetës, gruri, buka, nga mirëqenia, nga ajo çfarë përpiqemi të gjithë sëbashku për të krijuar më shumë mirëqenie për njerëzit dhe komunitetet”, tha Blendi Klosi.

“Ne do ta vazhdojmë këtë gjë edhe në muajt në vijim, edhe në vitet në vijim dhe duam që të promovojmë të gjitha vlerat e vendit tonë”, tha kryetari i Bashkisë së Fierit, Armando Subashi.

Aq i rëndësishëm është prodhimi i grurit dhe bukës në Myzeqe, saqë vit pas viti, myzeqarët e Fierit i krijuan gati një festival të tërë folklorik me këngë edhe valle.

Madje myzeqarët, për këtë festë, krijuan edhe një nga recetat kulinare më autentike dhe më me shije: bibën në saç. Gatuhet vetëm këtu dhe sapo bie drapri i parë në fushat me grurë.

Biba në saç shoqëron gjithë fushatën e korrjes dhe shirjes së grurit dhe ikën bashkë me të. Gatuhet në çdo familje myzeqare që korr grurë, ndërsa në restorantet tradicionale, për një muaj qëndron në top menynë e tyre.

Festa e Grurit, me një histori gati 50-vjeçare në Myzeqe, i solli të gjitha si dikur: bukën dhe grurin e ri, lëmin e fshatit dhe mekanikën, këngët dhe vallet, bibën në saç dhe dhallën e ftohtë./ABC News Albania 24/7

mot-i-nxhete-tirane.jpg
G. P.15:38 | 23/06/2019

Situata meteorologjike gjatë së dielës dhe të hënës pritet të jetë me kthjellime dhe vranësira të herëpashershme në të gjithë territorin, ku nuk do të mungojnë edhe shirat e dobët në zonat malore. Sipas sinoptikanëve fundjava e ardhshme pritet të shënoje temperatura mbi 37 gradë celcius.

Për të gjithë ata që kishin planifikuar që ditën diel ta kalonin buzë detit për të marrë rrezet e para të diellit, moti duket se ka qenë disi jo në favor të tyre.

Sipas Meteoalb, dita e diel shoqërohet me kthjellime dhe vranësira  në të gjithë vendin gjatë orëve të paradites, ndërsa gjatë mesditës dhe mbrëmjes pritet të ketë dhe shira të dobët kryesisht në zonat malore.

Temperaturat do të jenë të freskëta të dielën dhe të hënën. Meteoalb bën me dije për ABC News se fillimi i javës do të vijojë me mot të kthjellët dhe vranësira kalimtare, më të theksuara në zonat malore duke sjellë shira lokalë gjatë mesditës kryesisht ditën e hënë .

Sipas sinoptikanëve dita e martë dhe në vijim do të ketë rritje të temperaturave, të cilat fundjavën e ardhshme do të shkojnë mbi 37°C./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono