G. P.

ITALI-VARRIMI-1280x720.jpg
G. P.16:14 | 18/08/2018

Mbarë Italia i ka dhënë lamtumirën viktimave të tragjedisë së urës Morandi. Të pranishëm në ceremoninë e celebruar nga arqipeshkvi Banjasko kanë qenë edhe krerët e shtetit, mes të cilëve presidenti Matarela, që është takuar personalisht me familjet e të ndjerëve, përfshirë ato shqiptare.

Mes lotëve dhe lutjeve, Italia i ka dhënë të shtunën lamtumirën viktimave të tragjedisë së urës Morandi. Nën kujdesin e shtetit italian, në kompleksin “Fiera di Xhenova” janë mbajtur homazhet në nder të viktimave. Në sallën gjigante janë rreshtuar arkivolët me trupat e të ndjerëve, që sipër mbanin flamujt kombëtarë, si dhe kurora me lule të bardha e objekte personale të viktimave.

Të parët që bënë homazhet ishin zjarrfikësit e angazhuar në operacionet e shpëtimit, të cilët morën edhe duartrokitjen më të gjatë.

Efektivët kanë ndaluar pranë çdo arkivoli, kanë shtrënguar duart me familjarët e viktimave dhe kanë bërë shenjën e kryqit. Ndërsa janë pritur me vërshëllima disa deputetë të Partisë Demokratike të Italisë, janë pritur me duartrokitje dy zëvendës kryeministrat Di Maio e Salvini, të shoqëruar nga ministri i Infrastrukturës, Tonineli.

E mirëpritur ka qenë edhe ardhja e Presidentit, Serxho Matarela, i cili është ndalur për të takuar familjet e të ndjerëve, përfshirë ato shqiptare Djerri dhe Bokrina.

Më pas, arqipeshkvi i Xhenovës, Anxhelo Banjasko ka celebruar meshën.

 “Shembja e urës Morandi ka lënduar zemrën e Xhenovës. Plaga është e thellë dhe mbi të gjitha mban dhimbjen e pakufijshme për ata që kanë humbur jetën, për ata që janë ende të humbur, për ata që janë lënduar, apo për ata që kanë braktisur shtëpitë e tyre”.

Kardinali është shprehur se në këto momente fjalët, sado të ngrohta e njerëzore, janë të kota përpara përmasave të tragjedisë. Madje, ka vijuar ai, as drejtësia që është një detyrim nuk mund të shuajë dhimbjen.

 “Rritja e përmasave të tragjedisë, humbja e kthjelltësisë, shpërthimi i ndjenjave dhe inati prekën edhe njëherë, në mënyrë brutale, brishtësinë e njeriut”.

Përveç fjalëve të kardinalit, një tjetër moment prekës ishte edhe momenti kur presidenti Matarela përqafoi përzemërsisht një djalë, që kishte humbur të afërmit.

Gjithashtu, në shenjë respekti të pranishëm ishin edhe lojtarët e ekipeve rivale të futbollit Xhenoa dhe Sampdoria, të cilat kanë shtyrë ndeshjet në nder të viktimave. Bilanci i të ndjerëve u rëndua mëngjesin e së shtunës, kur skuadrat e shpëtimit nxorrën nga rrënojat mjetin ku udhëtonte një familje prej 3 anëtarësh, një vajzë 9 vjeçe dhe dy prindërit. Sipas mediave italiane, makina e familjes Çekala ishte shtypur tërësisht nga një bllok i madh betoni që ishte pjesë e copës së shembur të urës. Ndërkohë, operacionet e kërkim-shpëtimit vazhdojnë dhe autoritetet druhen se mund të ketë viktima të tjera. /abcnews.al

 

KRONIKE-KPK-SHKARKON-VETEM-PER-PASURI.mpg_snapshot_00.22-1280x563.jpg
G. P.15:34 | 18/08/2018

Komisioni i Pavarur i Kualifikimit ka shkarkuar gjyqtarë dhe prokurorë të sistemit të drejtësisë për shkaqe të mos-deklarimit të saktë të pasurisë, duke dështuar të gjejë raste të dënueshme me masa disiplinore për shkak të cënimit të figurës apo mungesës së profesionalizmit të gjyqtarëve dhe prokurorëve që kanë kaluar sitën e Vettingut.

21 shkarkime nga detyra ka vulosur çekiçi i shkallës së parë të Vettingut, të gjithë për probleme të deklarimit të pasurisë. Pjesë e listës prioritare për rivlerësim me 57 subjekte ishin gjyqtarët e gjykatave edhe prokurorive më të rëndësishme në vend, si dhe kandidatë për organet e reja të drejtësisë, në pritje kto të përfundimit të këtij procesi, në kapërcim të afateve kushtetuese prej mbi 16 muajsh. 37% e subjekteve të rivlerësuar derimë tani nga Komisioni i Pavarur i Kualifikimit kanë marrë dritën e kuqe, kryesisht si shkak i mospërmbushjes së një prej tre kritereve që ky proces skanimi parashikon, atë të pasurisë.

Sipas nenit 59 të ligjit të Vettingut, në përfundim të procesit, Komisioni mund të vendosi konfirmimin në detyrë, pezullimin për një periudhë 1-vjeçare me detyrim për ndjekjen e një trajnimi të aprovuar nga shkolla e magjistraturës, si dhe shkarkimin nga detyra. Sipas po këtij ligji, konfirmimi në detyrë vjen kur subjekti ka nivel të besueshëm në vlerësimin e pasurisë, nivel të besueshëm në kontrollin e figurës dhe nivel minimal të vlerësimit profesional. Pezullimi nga detyra me detyrimin për ndjekjen e programit të trajnimit, nuk është dhënë ende si masë disiplinore nga KPK në asnjë nga 57 rastet në total të rivleresuara.

Shkarkimi nga detyra, nga ana tjetër, sipas ligjit vjen kur subjekti ka kontakte të papërshtatshme me persona të përfshirë në krimin e organizuar, ka bërë deklarim të pamjaftueshëm për kontrollin e figurës dhe pasurisë, kur rezulton i papërshtatshëm nga vlerësimi i aftësive profesionale, ka deklaruar më shumë se dyfishi i pasurisë së ligjshme, si dhe nëse rezulton se ka cënuar besimin e publikut tek sistemi i drejtësisë. Mes tyre vetëm dy të fundit, problemet me pasurinë dhe cënimi i besimit tek drejtësia kanë penalizuar rastet e rishikuara derimë tani.

Vendimet e Komisionit të Pavarur të Kualifikimit, zbardhin problemet e pasurisë si arsyen kryesore të identifikuar nga Komisioni për çdo shkarkim të kryer deri sot, duke dështuar në gjetjen e atyre rasteve ku mungesa e profesionalizmit, apo cënimi i figurës së magjistratit janë arsye të shkarkimit të tij nga detyra. A tregon kjo se procesi i vettingut po funksionon bazuar vetëm në një shtylle të saj, apo se gjyqtarët dhe prokurorët e shkarkuar për pasuri të pajustifikuar, e kanë vënë atë duke mos cënuar figurën apo profesionalizmin e tyre?/abcnews.al

OK-BRUNA-CIFLIGU-INTERVISTE-ME-ENVER-BYTYCIN.mpg_snapshot_04.14-1280x720.jpg
G. P.15:16 | 18/08/2018

Edhe këtë javë “Balkan ABC” e Bruna Çifligut trajton çështjen e korrigjimit të kufijve mes Kosovës dhe Serbisë e deklaruar publikisht nga presidenti Kosvës Hashim Thaçi. Çështja në fjalë vazhdon të ngjallë reagime dhe debat ku në të janë përfshirë edhe zyrtarë europianë. Materiali i përgatitur përmban intervistën me drejtorin e qendrës për studime të Europës juglindore Enver Bytyçi./abcnews.al

 

STUHIA-SHKUND-LUSHNJEN_ABC-M2-T1.mpg_snapshot_01.02-1280x720.jpg
G. P.15:07 | 18/08/2018

Një stuhi e cila ka zgjatur vetëm 30 minuta ka dëmtuar plotësisht 25 hektarë vreshtash. Fermerët ishin në prag të mbledhjes së prodhimit, por pas kësaj stuhie thonë se falimentuan.

Edhe shtyllat prej betoni janë shkulur. Hektarë të tërë mbjellë me vreshta u shkatërruan në Toshkëz të Lushnjes pas një stuhie që mbërtheu zonën mbasditen e së premtes. Cikloni aty ku kaloi ka rrafshuar gjithçka. Situata zgjati vetëm 30 minuta. Filloi me breshërin e përfundoi me stuhinë. Nëse prodhuesit do të kishin qenë nëpër ara do të kishte patur dhe jetë të humbura.

Banori: “Në orën 6 filloi një stuhi e fortë erdhi breshëri në fillim fare pastaj dhe pastaj i ktheu bimët përpjetë.”
Banorja: “Ja burri im ka hyrë poshtë rimorkios, rrinte tek rimorkio se s’kishte ça bënte tjetër.”

Sipërfaqja e dëmtuar në vreshta llogaritet në 25 ha në Toshkëz. I gjithë prodhimi ishte gati në të vjelur. Pronarët kishin përfunduar marrëveshjet tregtare të shitjes. Tani ata po vjelin ata ç’ka la pas stuhia. Dëmi i shkaktuar arrin në disa miliona lekë, kurse asnjë nga fermerët nuk e ka të siguruar prodhimin ç’ka do të thotë që nuk mund të përfitojnë nga ligjet e dëmshpërblimeve./abcnews.al

DEKLARATAT-PAS-NDESHJES-NE-KORCE.mpg_snapshot_00.34-1280x687.jpg
G. P.14:51 | 18/08/2018

Fitorja ishte e merituar për Skënderbeun. Kështu gjykon trajneri i korçarëve, Orges Shehi, ndërsa tekniku i Partizanit, Skënder Gega mbetet me besim tek ekipi i tij.

U zgjidh nga një episod, por si ishte si ndeshje? Trajneri i Skënderbeut, Orges Shehi, dhe ai i Partizanit, Skënder Gega, padyshim nxorrën përfundimet e tyre nga sfida e parë e Superligës, dhe pavarësisht humorit, nuk ndryshonin shumë. Tekniku durrsak i korçarëve vlerësoi jo vetëm rezultatin, fitoren 1-0, por sidomos lojën.

Orges Shehi, trajner i Skënderbeut: “Sigurisht që të vjen mirë dhe jam shumë i kënaqur jo vetëm për fitoren, por jam i kënaqur për atë që skuadra dha në fushë. Më vjen mirë sepse kemi fituar kundër një rivali direkt. Më vjen mirë edhe për faktin se vijmë pas një fitimi trofeu para një jave dhe fitorja sot është pjesë e vazhdimësisë dhe sigurisht kjo të bën që të ndjehesh mirë.”

Padyshim Gega ishte i dëshpëruar që u kthye pa pikë në Tiranë. A ia ka prerë shpresat kjo humbje trajnerit të Partizanit?

Skënder Gega, trajner i Partizanit: “Besoj tek ky ekip. Do të eci mirë, është vetëm ndeshja e parë. Sigurisht ishte një trepikësh shumë i rëndësishëm por lujtëm bashkë me një ekip që është shumë i mirë. Sot luajtëm me entuziazëm, gabuam edhe ne edhe ata. Dolëm pa pikë dhe futbolli kështu është.”

Nuk mundej që trajnerët të mos jepnin gjykimin e tyre për dhunën që thuajse shkatërroi ndeshjen.

Shehi: “Shpreh keqardhje që akoma në vitin që jemi ne ndodhin situata të tilla futbolli është një sport që i bashkon njerëzit. Futbolli është një sport që ka bashkuar klasa politike, ka bashkuar shtresa njerëzish.”

Gega: “Besoj se është ndërtuar një kulturë jo e mirë e gjithë tifozerisë tonë me sharje e ofendime. Megjithatë, s’besoj se duhet të marrim shembullin e keq të vendeve të tjera, por të marrim atë më të mirën.”/abcnews.al

KRONIKE-VELIAJ-UKT-LINJA-E-RE.mpg_snapshot_01.29-1280x720.jpg
G. P.13:56 | 18/08/2018

Kryetari i Bashkisë Tiranë Erjon veliaj dhe ai i ujësjellës Kanalizimeve, Redi Molla, kanë inspektuar punimet e nisura për zëvendësimin e rrjetit të ujit për njësinë 7 në Rrugën e Kavajës. Sipas Veliajt, kjo do të përmirsojë shpërbdarjen dhe cilësinë e ujit, si dhe do të rrisë presionin për katet e sipërme të pallateve.

Bashkia e Tiranës dhe UKT ka nisur shtrimin e një linje të re përgjatë Rrugës së “Kavajës”, ç’ka pritet të sjellë një shpërndarje më të mirë në rrjetin e ujësjellësit, si dhe ujë më cilësor për banorët e kësaj njësie. Kryebashkiaku Erion Veliaj gjatë inspektimit e quajti investimin si shpërblim për një nga lagjet më korrekte në pagesën e ujit.

“E gjithë zona e Njësisë 7 ka rreth 28 mijë banorë, të cilët përfitojnë nga ky rrjet i ri ujësjellësi. Është një nga njësitë model dhe më shembullore me mbi 95% në pagesat e ujit, do të thotë që do të marrin mbi 95% të investimeve të zonës. Besoj se shpërblimi me punë i atyre që janë të rregullt ne pagimin e këtij malli të çmuar, si uji, është jashtëzakonisht i rëndësishëm dhe është fabula e bashkisë sonë”.

Rrjeti i ri zëvendëson rrjetin e vjetër, duke mundësuar ujë në mënyrë të rrjedhshme edhe për katet më të larta të pallateve, si shpjegon dhe kreu i Ujëzjellës kanalizimeve, Redi Molla.

“Është zëvendësimi i tubit të gizës që rrit presionin, nga 1.5 e çon në çdo kat, pra presioni i ujit mund të arrijë deri në kat të pestë apo të gjashtë të çdo pallati të vjetër, pa sistemin e pompimit. Përveç kësaj eliminon edhe të gjitha humbjet e tubit të gizës të amortizuar që është shtruar në vitin ’63, eliminon ndotjet që është një ndër gjërat më të rëndësishme”.

Veliaj thkesoi se puna do të vazhdojë edhe me dy projekte madhore, pjesë e marrëveshjes me BERZH dhe nga të cilat pritet të rritet kapaciteti filtrues në Bovillë dhe do të shtrihet linja e re për zonën e Astirit./abcnews.al

QARKULLI-NE-DURRES_ABC-M2-T1.mpg_snapshot_00.32-1280x726.jpg
G. P.13:50 | 18/08/2018

Pushuesit e shumtë që vërshojnë fundjavave në plazhet e Durrësit kanë bërë që rrugët drejt këtij qyteti, por edhe brenda tij të bllokohen. Lëvizja e mjeteve bëhet me vështirësi dhe për udhëtarët është rraskapitëse.

Lëvizin për t’u relaksuar, por trafiku i rënduar gjatë udhëtimit kthehet në një sfidë dhe lodhje per përdoruesit e rrugës. Në segmentet që lidhin zonat turistike në Durrës, levizja kryesisht në fundjavë është rraskapitëse. Radhë të gjata kilometrike dhe bllokime në rrugë. Përballë dynjes së madhe të automjeteve policia rrugore, e cila që prej fillimit të sezonit ka kaluar në shërbim të përforcuar, këshillon përdoruesit e rrugës. Shefi i qarkullit Durrës thotë se drejtuesit gjatë fundjavës duhet të bëjnë kujdes më orarin kur nisin udhëtimin. Ata duhet të përdorin autostradat më shumë se sa rrugët dytësore për të shmangur radhët e gjata.

Valentin Floriri, shefi i qarkullimit Durrës: “Të shtunën dhe të dielën mund të zgjedhin rrugë alternative, sidomos në kulmin e trafikut siç është pasdite në kthim.”

Rrugët më problematike me dyndjen më të madhe të automjeteve mbeten Maminas-Gjiri i Lalësit dhe anasjellat, rruga dytësore Plepa-Golem, si dhe rruga e plazhit. Këto segmente policia apelon të shmangen, duke këshilluar përdorimin e rrugëve alternative siç është autostrada Durrës-Kavajë, Unaza e Shkozetit apo edhe rruga e vjetër Manëz-Sukth, për automjetet që lëvizin nga Gjiri i Lalësit./abcnews.al

PHOTO-2018-08-18-11-08-50-1280x853.jpg
G. P.13:41 | 18/08/2018

Mëngjesin e sotëm pas një operacioni, policia italiane ka vënë në pranga bosin e mafias kalabreze, Ndrangheta. 29-vjeçari Luixhi Abruceze kërkohej intensivisht që nga viti 2015. Ai ishte përfshirë në listën e të kërkuarve më të rrezikshëm.
Operacioni për arrestimin e tij u zhvillua nga ekipet e policisë në Cosenza dhe Catanzaro, me mbështetjen e Policisë Shkencore. Në momentin e ndalimit ai kishte me vete 2 armë, municion dhe një dokument të rremë.
Luixhi Abruceze ishte dënuar me 20 vjet burg për trafik droge./abcnews.al

SINKRON-SALJANJI-ABC-M5-T1.mpg_snapshot_00.09-1280x720.jpg
G. P.13:25 | 18/08/2018

Deputeti demokrat, Ervin Salianji nga foltorja e selisë blu ka akuzuar Prokurorinë dhe kryeministrin se po heshin përpara një të vërtete të faktuar dhe bërë publike tashmë, se deputeti i mazhorancës Jurgis Çyrbja është pjesë e bandës së Emiliano Shullazit.

Pas denoncimit të një dite më parë, që akuzon deputetin socialist në Shijak Jurgis Çyrbja, si anëtar i banës së Emiljano Shullazit, demokratët kërkojnë reagimin e organit të akuzës por edhe atij që Çyrbes i dha karrigen e deputetit në parlamentin Shqiptar.

Ervin Salianji, deputet i PD: “Është e papranueshme sesi nga Prokuroria nuk ka asnjë reagim për komunikimet e përgjuara në mënyrë të ligjshme prej saj, ku deputeti i Edi Ramës ka komunikuar të paktën dy herë në telefon me Gilmano Danin, krahun e djathtë të Emiljano Shullazit për çeshtjen e hotel Vollgës. Kjo pronë është rregjistruar në pronësi të Emiljano Shullazit nga Jurgis Çyrbja, por ndryshe nga Shullazi që është në burg, Çyrbja është në parlament nën mbrojtjen e Edi Ramës. Edi Rama, njësoj si prokuroria që ka në varësi, hesht prej 24 orësh”.

Arsye e ksaj heshtje për Salianjin është e njëjta që shtyu kryeministrin të mbrojë ata me të cilët zbaton planin e asaj që demokratët quajnë “bashkëqeverisje me krimin”.

“Kështu po mbron Rama: Saimir Tahirin, Fatmir Xhafën, Vangjush Dakon, Qazim Sejdinin, Damian Gjiknurin, Mark Frrokun, Arben Ndokën, Armando Prengën dhe çdo lidhje të krimit brenda dhe jashtë parlamentit”.

Nëse prokuroria nuk do të ishte kukull e qeverisë, ajo do të zbatonte ligjin duke çuar në Kuvend kërkesën për arrestimin e deputetit Çyrbja, përfundon Salianji./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.


Kontakt

Telefono