ent ela

IRANI-PER-TRUMP-1280x720.jpg
ent ela14:00 | 25/04/2018

Irani ka refuzuar propozimet e Trump dhe Macron për rishikimin e marrëveshje bërthamore. Sipas presidentit Rouhani, askush nuk ka të drejtë të bëjë ndryshime tek akordi i firmosur nga 7 vende.

Presidenti i Iranit, Hassan Rouhani vendosur në pikëpyetje legjitimitetin e përpjekjeve nga SHBA dhe aleatëve Europianë për të ndryshuar marrëveshjen bërthamore mes palëve. Kjo erdhi pasi lideri amerikan Donald Trump dhe ai i Francës, Emmanuel Macron njoftuan të martën se po punojnë për një marrëveshje të re, që do të zgjerojë dhe zgjasë kushtet e akordit të 2015-ës.

Por Rouhani nënvizon se ata nuk kanë asnjë të drejtë që të rinegociojnë marrëveshjen 7-palëshe. Ai gjithashtu e përkufizoi Presidentin Amerikan Donald Trump si një “tregtar” i cili nuk është i kualifikuar për të komentuar mbi traktatet globale. “Ju nuk keni ndonjë të kaluar në politikë apo me ligjet. Ju nuk keni formim për traktatet ndërkombëtare”, nënvizoi presidenti Iranian.

Ndërsa më tej ai shton: “Sëbashku me liderin e një vendi Europian, amerikani thotë: ‘Ne duam të vendosim për një marrëveshje’ të arritur nga 7 palë. Për çfarë? Me çfarë të drejte”. Gjithashtu Rouhani thekson se Irani ka treguar vullnetin e tij të mirë për botën kur nënshkroi akordin dhe ka provuar se nuk dëshiron që të posedojë armë të shkatërrimit në masë.

Trump ka njoftuar se SHBA do të rivendosë sanksionet ndaj Teheranit të pezulluara sipas marrëveshjes më 12 maj, përveç nëse Kongresi dhe autoritetet evropiane rregullojnë “gabimet e tyre të tmerrshme”. Zyrtarët amerikanë dhe evropianë raportohen se kanë bërë përparim në dy kërkesat e tij – që Irani t’u japë inspektorëve ndërkombëtarë qasje të menjëhershme në të gjitha vendet që ata duan të shohin dhe për Iranin të ndalojë zhvillimin dhe testimin e raketave balistike. /abcnews.al

rama-dw-1280x610.jpg
ent ela13:46 | 25/04/2018

Kryeministri Edi Rama përsërit edhe gjatë vizitës në Gjermani se Shqipëria meriton hapjen e negociatave me Bashkimin Evropian.Në intervistën për median Deutche Welle kreu i qeverisë kërkon që Shqipëria të mos bëhej peng e asnjë dinamike të brendshme politike dhe të mos përdoret si një “kokë turku” për të avancuar axhenda që nuk kanë të bëjnë aspak me atë që qeveria ka bërë.

Rama: “Morëm rekomandimin se kemi përmbushur detyrimet. Ajo çfarë do të doja që Shqipëria të mos bëhej peng dhe të mos përdorëet nga forcat politike apo individët si një kokë turku për të avancuar axhendat”.

Në intervistën e tij dhënë për  Deutsche Welle, kryeministri Rama deklaroi se kancelarja Merkel do të jetë në favor të çuarjes përpara të procesit të integrimit.

DW: A prisni ndihmë diplomatike nga Berlini që të shmnagen këto pengesa?

Rama: Ka mjaft miq e partnerë të Shqipërisë në këtë proces dhe besoj se kancelarja e cila është kampione europiane do të jetë në favor të çuarjes përpara të këtij procesi dhe në jemi gati të bashkohemiemi në një rrugëtim të gjatë e thelbësor për ta ndryshuar Shqipërinë.

DW: Sa kohë mendoni se i duhet Shqipërisë për të ecur në këtë proces?

Rama: Varet nga kendvështrimi. Nëse i shihni këto cështje në fazën ku gjendemi nuk kemi bërë vetëm progres thelbësor por befasues.

Kemi 21 gjyqtarët e prokurorë, pesha të rënda, jahstë sistemit, pra sistemi po pastrohet. Ky ëhstë një model që duhet përhapur në vendet e rajonit. Ka vende që po negociojnë të bazuar në këtë model.

Diskutimi në një fazë të re është i mjaftueshëm, por jam dakord me zotërinë ka ende shumë punë për të bërë.  Ka të bëjë me nisjen e një pune shumë të madhe për të qenë gati. Nuk ka të bëjë me anëtarësimin, por ka të bëjë me vazhdimin e përpjekjeve për të arritur përpara. Kemi raporte që pranojnë progres të rëndësishëm.

DW:Stabiliteti rajonal, sa i rëndësishëm është?

Rama: Euroskeptikët apo individë antieuropianë po predikojnë se Europa nuk ka nevojë të shohë përtej kufijve të saj, Evropa ka nevojë për Ballkanin, për sigurinë e sigurimin së pari, sepse një Evropë e sigurt është e lidhur me Ballkanin, që bëhet pjesë e saj në të kundërt është më e pasiguruar.

/abcnews.al

VETINGU-NE-POLICI-1-1280x720.jpg
ent ela13:32 | 25/04/2018

Ritmet e dorëzimit të formularëve të vetëdeklarimit për procesin e vettingut në Polici nga efektivët blu, është shumë i ulët. Nga 13 mijë punonjës që shërbejnë në policisë e shtetit vetëm 10% kanë mundur t’I dorëzojë formularët pranë drejtorive vendore përkatëse.

Kur duhet edhe 10 ditë nga dorëzimi i formularëve të vetëdeklarimit për vettingun në radhët e policisë, vetëm 10 % e tyre i kanë dorëzuar ato.  Sipas kreut të sindikatës së punonjëseve të policisë, pritet që të largohen edhe shumë punonjës të cilët kanë mbushur moshën 47 vjeç, pasi përfitojnë pensionin suplementar.

Sadedin Fishta, Kreu i Sindikatës së Punonjësve të Policisë: “Deklarata mund të jetë 10% e efektivëve. Ne parashikojmë që deri më datën 30 të largohen me kërkesë të tyre deri 15% e punënonjsve. Pjesa më e madhe me moshë mbi 47 vjeç që përfitojnë pensionin suplementar”.

Është përgjegjësi e shtetit theksoi Fishta, rasti i flijimit të punonjësit të policisë së Fierit brenda ambienteve të shërbimit.

Sadedin Fishta, Kreu i Sindikatës së Punonjësve të Policisë: “Vetingu është pjesë që e ka çuar në ekstrem gjendjen e tij psikologjike. Kjo është përgjegjësi kolektive e institucionit, shtetit e jona që ne duhet t’i trajtojmë punonjëist  epolicisë me dinjitet”.

Aktualisht janë larguar nga radhët e policisë rreth 300 efektivë, ku Tirana mban numrin numrin më të lartë me 70 të dorëhequr.

Sadedin Fishta, Kreu i Sindikatës së Punonjësve të Policisë: “300 punonjës policie që të largohen vetë, në qarkun e Shkodrës janë 20 numri i personave që kanë bërë kërkesë në Tiranë 75, në qarqet e tjera sidomos në Jug ka edhe më tepër”.

ABC News u interesua pranë Minsitrisë së Brendshme lidhur me këtë pretendim të sindikatës, por përgjigja zyrtare ishte se pas datës 5 maj do të ketë edhe shifra të detajuar se sa efektiv nuk pranuan të jenë pjesë e vetingut. /abcnews.al

RRUGA-NE-SHEGAS-LUSHNJE-1280x720.jpg
ent ela13:19 | 25/04/2018

Në Lushnjë shumë fshatra nuk kanë infrastrukturë. Një ndër to është edhe Shegasi, banorët e të cilit kanë protestuar disa herë. Por megjithatë bashkia nisi disa punime, rruga e tyre është bërë më keq nga sa ishte më parë.

60 vjet duke pritur t’u shtrohet rruga. Për banorët në Shegas të Lushnjës, kalimi përmes  4 kilometrave i ka lodhur. Gropa, pluhur në verë e baltë në dimër. Fshati është i izoluar. Këtu lëvizet vetëm me motora dhe kafshë. Kamionet nuk hyjnë të marrin prodhimet.

Ata nuk duan shumë. Nuk duan rrugët pranë paracelave, por të paktën segmentin kryesor.  Pas protestës para bashkisë dy muaj më parë, nisi zgjerimi i rrugës në gjatësinë 1.2 km. U larguan dherat, por banorët thonë makineritë ikën duke e përkeqësuar edhe me tepër situatën.  Banorët do të ngrihen sërish në protestë për të tërhequr vëmendjen e bashkisë. Por tregtarët kanë frikë.

Dhe pse vetëm 5 km larg qytetit, ky segment nuk është në planet e bashkisë për t’u asfaltuar në vitin 2018.  Sipas drejtorisë së shërbimeve, mungesa e fondeve e ka përjashtuar nga lista e investimeve. /abcnews.al

 

RAMA-NIS-VIZITEN-NE-GJERMANI-1280x720.jpg
ent ela11:48 | 25/04/2018

Rama është pritur në Bundestag nga Presidenti i Parlamentit gjerman Volfgang Shojble. I shoqëruar dhe nga kreu i grupit parlamentar të PS, Taulant Balla, kreu i qeverisë shqiptare ka biseduar me kryeparlamentarin gjerman për bashkëpunimin dypalësh dhe hapat e Shqipërisë drejt anëtarësimit në BE.

Në Bundestag është planifikuar nesër një seancë bashkëbisedimi mes Kryeministrit shqiptar Edi Rama dhe Komisionit të Jashtëm, i cili drejtohet nga Gunther Krichbaum, një deputet i partisë së kancelares Merkel, që është shprehur më herët se hapja e negociatave me Shqipërinë është e parakohshme.
Kjo vizitë dy ditore e kreut të qeverisë në Gjermani ndodh një javë, pasi Komisioni Europian dha rekomandimin pa kushte për çeljen e negociatave me Shqipërinë.
Gjithë kjo periudhë deri në Qershor, kur Këshilli Europian të vendosë mbi rekomandimin e Komisionit, do të jetë veç të tjerash për autoritetet shqiptare edhe një kohë takimesh dhe lobimesh për të bindur vendet anëtare për votën pro hapjes së negociatave mes Shqipërisë dhe BE.

romana_vlahutin.jpg
ent ela11:35 | 25/04/2018

Ambasadorja e Bashkimit Europian Romana Vlahutin ka prezantuar në Këshillin Kombëtar të Integrimit vlerësimet e Komisonit Europian në raportin për Shqipërinë, i cili rekomandoi hapjen e negociatave pa kushte për vendin tonë.

Ambasadorja e BE, Romana Vlahutin i ka paraqitur Komisionit Parlamentar të Integrimit raportin e Komisionit Europian për rekomandimin për hapjen e negociatave për anëtarësim. Ajo deklaroi se të gjitha përpjekjet për reforma duhet të ruhen dhe të thellohen. Ambasadorja e BE renditi arritjet që e bënë Shqipërinë të merrte rekomandimin, ndërsa theksoi sfidat që e presin deri në marrjen e vendimit në qershor.

“Së pari nuk ka vend për vetëkënaqësi për gjithëkënd, por duhet të përqëndrohen te fakti se si duhet të punojnë më shumë. Është thelbësore që ky proces reforme të jetë me ritëm të qëndrueshëm. Të kemi të gjitha elementët e nevojshëm për një zbatim të shpejtë të reformës në drejtësi.

E dyta është lufta kundër korrupsionit.  Ngritja e SPAK besoj se do sjellë kapacitet për të luftuar korrupsionin. Është e nevojshme që të kemi progres serioz. Shumë sfida për Ballkanin Perëndimor si rajon”- deklaroi Vlahutin.

Për ambasadoren e BE-së  ajo që shtë me rëndësi është vullneti politik, cili është thelbësor për reformat./abcnews.al

 

 

 

 

thaci.jpg
ent ela11:12 | 25/04/2018

Presidenti Hashim Thaçi, gjatë Konferencës Rajonale “Dekada e Ardhshme e Kosovës: Bashkëpunimi rajonal dhe integrimi në BE”, nënvizoi se politika kosovare ka nevojë për reformë të thellë, por që sipas tij kjo ju takon partive politike që ta bëjnë. Kreu I shteti bën dhe një parashikim sa I përket 10-vjeçarit të dytë të pavarësisë së Kosovës.

Hashim Thaci, President i Kosovës:  “Dekada e dytë e shtetit do të sjellë anëtarësimin e Kosovës në NATO dhe OKB. Gjithashtu shpresoj që anëtarësimi në BE është i mundshëm nëse ne punojmë. Edhe shoqërinë civile e falënderoj shumë për mbështetje ndaj proceseve. Roli i mediave do të vazhdojë të mbetet kyç. Është fat që mediat i kemi më mirë se në Serbi, edhe se në rajon. Kjo është e vërtetë”.

Më tej, Thaçi nënvizoi se i mirëpret platformat e prezantuara nga kryeparlamentari Kadri Veseli për konsensus të përgjithshëm politik, si dhe të qeverisë për finalizimin e dialogut me Serbinë.

Hashim Thaci, President i Kosovës:  “Unë i mirëpres platformat që po prezantohen nga liderët politik. Në veçanti për arritjen e një konsensusi për fazën finale të dialogut Kosovë-Serbi. Marrëveshja obligative është në favor të të dyja vendeve. E lehtëson rrugëtimin drejt BE-së. E di se dialogu me Serbinë është shumë i vështirë dhe po ashtu përkushtimi për pajtim, por kjo është rruga e vetme për të ecur përpara”.

Ndër të tjera komentoi edhe ngjarjet e ndodhura në kuvendin e Kosovës. Thaçi u shpreh se përdorimi i gazit lotësjellës ka treguar një pamje jo reale të vendit në botë. /abcnews.al

SPANJE-TURIZMIN-1280x720.jpg
ent ela10:58 | 25/04/2018

Bashkia e Palma di Majorka ka vendosur që këtë verë duke filluar nga muaji korrik, të mos jepen më vila apo apartamente me qera për turistët. Sipas kryebashkiakut, kjo masë merret pas incidenteve të shumta të shkaktuara nga turistët e dehur, si dhe për të plotësuar kërkesën e banorëve, që nuk i duan me në qytetin e tyre.

Këtë verë do të jetë shumë e vështirë që të gjendte një vend për turistët në Palma di Majorka. Duke filluar që nga muaji korrik, asnjë pronar apartamenti apo vile në qytet nuk do të lejohet ta japë me qera pë turistët. Bashkia, e para në Spanjë që mer një masë të tillë, në deklaratën e saj për media thekson se turistët mund të përfitojnë vetëm nga banesa që ndodhen në zona të mbrojtura si për shembull pranë aeroportit apo në zona industriale. Kjo masë është marrë për të ndaluar dhënien me qera pa licencë, një fenomen në rritje ky sipas  të dhënave të fundit. Por ato që kishin më shumë peshë në marrjen e këtij vendimi ishin dhe protestat e banorëve të lodhur nga kaosi dhe mungesa e edukatës së turistëve që cdo verë zgjedhin ishullin duke krijuar situate ndonjëherë dhe të rrezikshme.

Kryebashkiaku i qytetit Antoni Noguera, e cilësoi këtë masë si një model për qytetet që vuajnë si pasojë e turizmit masiv. Sipas tij ky vendim do të përhapet dhe në bashki të tjera qytetesh tursitike, duke theksuar se turistët më problematikë janë ata gjermanë. Një vit më parë pas një sherri masiv në plazh mes turistëve gjermanë të dehur, Noguera i kishte kërkuar Berlinit që të mbajë në shtëpi turistët e pisët. /abcnews.al

hahn-1.jpg
ent ela10:57 | 25/04/2018

Çështja e emrit mes Maqedonisë dhe Greqisë mund të zgjidhet brenda 15 ditësh. Kështu deklaroi komisioneri për zgjerim Johanes Hahn para Parlamentit Europian, por kryeministri maqedonas Zoran Zaev, tha se kaq pak ditë, janë të pamjaftueshme për një zgjidhje përfundimtare.

Komisioneri për zgjerim Johanes Hahn u shpreh optimist për sa i përket cështjes së emrit mes Greqisë dhe Maqedonisë, duke theksuar se mund të jetë një marrëveshje përfundimtare Brenda 15 ditësh. Hahn foli para Komitetit për politikë të jashtme të Parlamentit Europian. Ai shtoi se Maqedonia ka tejkaluar krizën e thellë politike dhe ka shënuar progress në zbatimin e reformave dhe ruajtjen e marrëdhënieve ndërfqinjësore.

Por nga ana tjetër kryeministri I Maqedonisë Zoran Zaev nuk u shpreh me të njëjtin optimizëm të Hahn duke thënë se cështja e emrit nuk mund të zgjidhet për kaq pak kohë. Madje ai theksoi se Hahn, një mik i vendit, mund të ketë ndonjë iformacion më shumë rreth kësaj cështjeje, dhe nëse e ka duhet t’ia thotë dhe të tjerëve. Zaev përsëriti dhe njëherë se në momentin që cështja e emrit do të marrë një zgjdihje përfundimtare, atëherë Maqedonia do të marrë një datë të saktë për hapjen e negociatave si dhe ftesën për anëtarësimin në NATO.

Zaev këto komente i bëri në konferencën e përbashkët me ish sekretarin e përgjithshëm të NATO-s, Xhorxh Robertson, i cili tha se inkurajon palët në bisedime për zgjidhjen e cështjes së emrit e cila zgjat prej vitesh tashmë.

Robertson drejton delegacionin e lartë të ish diplomatëve të cilët në Shkup formuan të ashtuquajturin “Grupi i Ohrit” i cili ka për qëllim që nëpërmjet këshillave të ndihmojë Maqedoninë në rrugën drejt integrimit në NATO dhe BE. /abcnews.al

 

LIVERPUL-ROMA-CHAMPIONS-1280x720.jpg
ent ela10:54 | 25/04/2018

Liverpuli arriti një fitore të madhe ndaj Romës, në gjysmëfinalen e Ligës së Kampionëve. Anglezët triumfuan 5-2, por italianët shpresojnë të përsërisin mrekullinë si ndaj Barcelonës.

Nuk mungoi mbërritja njëlloj si e gladiatorëve.

Mijëra tifozë, me apo pa biletë, pritën dhe mbështetën fuqimisht Liverpulin, ndërsa skuadra shkonte në “Anfild” për ndeshjen e Championsit ndaj Romës.

Policia britanike kishte marrë masa të forta që të mos përsëritej sulmi ndaj autobusit të Mançester Sitit në çerekfinale, por tifozët këtë herë e patën me të.

Dhjetëra prej tyre u ngjitën mbi ndonjë fugon policie, duke e përdorur si tribunë për të brohoritur.

Prag ndeshja e gjysmëfinaleve, për fat të keq, e pati momentin negativ, veçse diku tjetër dhe të llojit të huliganizmit.

Tifozë të Romës dhe të Liverpulit u përleshën, dhe një anglez mbeti i plagosur.

Në stadium, atmosfera ishte krejt ndryshe, dhe ashtu siç pritej.

Ishin 54 000 njerëz, shumica dërrmuese liverpulas përpara fillimit kënduan himnin “Ju kurrë nuk do të jeni vetëm”.

Ndeshja i përmbushi shpresat e tyre.

Liverpuli arriti një fitore të thellë, 5-2, madje duke kryesuar deri në 5-0.

Edhe pse Roma e trajnerit Di Françesko e kishte përgatitur me kujdes duelin, siç e tregoi në 30 minutat e para, nuk mundi të mbahej deri në fund.

Treshja e mrekullive, me sulmuesit Salah, Mane e Firmino, bëri diferencën, ashtu siç bëri dallimin stili agresiv dhe vertikal i futbollit të praktikuar nga trajneri Jurgen Klop.

Për pjesën më të madhe të ndeshjes, vendasit ushtruan presion duke e hutuar kundërshtarin, që nuk arriti të mblidhet veten, dhe as të mbrohej siç duhet, as të sulmonte siç kishte menduar.

Dy herë shënoi Salah, një herë Mane, dhe dy herë Firmino, me egjiptianin që dha edhe dy asiste, duke qenë njeriu i ndeshjes.

Sidoqoftë, krenaria romane nuk mund të mos e tregonte veten.

Në vetëm 5 minuta, italianët shënuan dy gola pas një reagimi të madh, veçse pa Salahun në fushë.

Xheko, më I miri I të tijve, dhe Peroti me penallti, I dhanë kuptim gjysmëfinales së dytë, pasi diferenca e golave është e njëjtë si ajo pas ndeshjes së parë ndaj Barcelonës.

Trajneri liverpulas, Klop, nuk u duk shumë i tronditur nga fakti që fitorja nuk ishte e pastër.

Klop: “Nuk është mirë që të pësosh dy gola në fund, por kjo gjë nuk mund të ndryshohet dhe ne duhet të pranojmë realitetin siç është. Djemtë luajtën një ndeshje brilante për periudha të gjata kohe. Madje, luajtëm mirë edhe kur pësuam dy gola. Rezultati është shumë më I mirë sesa unë do të kisha shpresuar para ndeshjes. Do të kishte qenë e vështirë edhe sikur të kishim fituar 5-0, pasi Roma nuk do të dorëzohej kurrë, ndaj nuk ka ndonjë ndryshim të madh. Gjëja kryesore që mësova sonte është që ne mund të fitojmë edhe në Romë”.

Euzebio Di Françesko, trajneri i Romës, bëri analizën e tij të ndeshjes.

Ai tregoi se pse ekipi I tij u ndëshkua, dhe tregoi nëse ka apo jo shpresë në “Olimpiko”.

Di Françesko: “Nëse humbet aq shumë duele në fushë, është normale që të mundesh në këtë mënyrë. Ne nuk luftuam sa duhet gjatë gjithë ndeshjes, ndonëse pati periudha shumë të mira. Po ashtu, nuk shfrytëzuam mundësitë tona, pasi Liverpuli luante vazhdimisht me 3 sulmues përpara, ndaj ne mund të kishim shfrytëzuar më mirë hapësirat që krijoheshin prapa. Për fat, në fund treguam se nuk u dorëzuam, dhe se skuadra jonë ka zemër të madhe. Tani jemi të detyruar të kemi shpresë për përmbysjen, duhet të bëjmë punën tonë. Le të mos flasim për mrekulli, sepse përmbysja vjen nëse luan mirë dhe nëse ke besim, siç e treguam ndaj Barcelonës”.

Ndeshja e kthimit luhet të mërkurën e ardhshme, në 2 maj, në stadiumin “Olimpiko” të Romës. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.


Kontakt

Telefono