30 ditë paraburgim për autorin e vrasjes së dyfishtë në Gjakovë


13:13 | 10/08/2018

Gjykata Themelore në Gjakovë ka caktuar masën e paraburgimit prej një muaji të pandehurit Pjetër Ndrecaj, pasi dyshohet për vrasjen e dyfishtë, të martën mbrëma në fshatin Brekoc të Gjakovës.

Gjykatësi i rastit Shaqir Zika, seancën dëgjimore e ka mbajtur në Spitalin Rajonal të Gjakovës “Isa Grezda”, në repartin e Psikiatrisë, ku të pranishëm kanë qenë edhe prokurori i shtetit, Agron Matjani, avokatja e të pandehurit Fehmije Zhubi si dhe psikiatri Zef Komani.

I dyshuari ka shprehur keqardhje për vrasjet duke mos shtuar asnjë fjalë tjetër.

Të enjten seanca nuk kishte përfunduar dot, pasi Ndrecajt i kishte rënë të fikët në momentin kur prokurori Matjani, po lexonte aktakuzën dhe aty i pandehuri e kishte kuptuar se përveç ish-bashkëshortes kishte vrarë edhe vajzën e tij nëntë vjeçare.

Ndërkohë Policia e Kosovës bashkë me Prokurorinë në një konferencë për mediat u shprehën se viktima gjatë raportimit të kanosjes nga ish-bashkëshorti në polici nuk kishte kërkuar mbrojtje, sipas tyre rasti nga Policia e Gjakovës është hapur vetëm si “kanosje”.

Në anën tjetër, Agim Pula nga zyra për mbrojtjen e viktimave deklaroi se i kanë ofruar strehim viktimës por ajo nuk ka pranuar, me arsyetimin se është e strehuar te vëllezërit e saj. Në deklaratën para hetuesisë edhe vëllai i viktimës ka deklaruar se do ta mbrojë motrën e tij dhe pesë fëmijët e saj.

Por vëllai i viktimës Shkëlzen Marku ka akuzuar shtetin se nuk ka arritur ta mbrojë dot motrën dhe pesë fëmijët e saj, sepse ajo ishte shtetase e Shqipërisë. Familjarët e të ndjerës si dhe të afërm kanë zhvilluar një protesë në vendin e lindjes së saj, duke kërkuar drejtësi dhe duke akuzuar policinë se nuk ka marrë masat e duhura.

Prokuroria e Shtetit dhe Inspektorati Policor i Kosovës kanë nisur hetimet lidhur me dyshimet për neglizhencë dhe moskryerje të detyrave të Policisë dhe prokurorëve në parandalimin e vrasjes së dyfishtë të 40-vjeçares Valbona Marku-Ndrecaj dhe vajzës së saj 9-vjeçare në Brekoc të Gjakovës./abcnews.al


Lini koment

E-maili nuk do te publikohet. Duhen plotesuar *


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.


Kontakt

Telefono